ގުޑުގުޑާ ދޫނިތަކަށް އުނދަގޫވާފަދަ އެއްވެސް އަމަލެއް ނުކުރުމަށް ކުޅުދުއްފުށީ ކައުންސިލުން އިލްތިމާސްކޮށްފި

Read Time:3 Minute, 29 Second

ފޮޓޯ ކްރެޑިޓްސް: ކުޅުދުއްފުށި މިހާޒް

އިރުވައި މޫސުމާ ދިމާކޮށް ހދ. ކުޅުދުއްފުށީ ސިޓީގެ ކުޅިއަށް ޒިޔާރަތްކުރާ ގުޑުގުޑާ ދޫނިތަކަށް އުނދަގޫވާފަދަ އެއްވެސް އަމަލެއް ނުކުރުމަށް އެ ސިޓީގެ ކައުންސިލުން އަންގައި އިއުލާނުކޮށްފިއެވެ. ކުޅުދުއްފުށީ ސިޓީ ކައުންސިލުން ކޮށްފައިވާ ޕޯސްޓެއްގައި ވިދާޅުވެފައިވަނީ ކުޅުދުއްފުށީ ކުޅިއަށް އިރުވައި މޫސުމުގައި ޒިޔާރާތްކުރާ ގުޑުގުޑާ ދޫނިތަކާއި ބައެއް ފަރާތްތަކުން މާ ކައިރިއަށް ދިއުމާއި، ދޫނިތަކަށް ގޯނާވާގޮތަށް ކުޅީގައި ކެނޯ ދުއްވާކަމުގެ ޝަކުވާ ގިނަ ރައްޔިތުންގެ ފަރާތުން އެ އިދާރާއަށް އަންނަނީ ހުށައަޅަމުން ކަމަށެވެ.

(ފޮޓޯ ކްރެޑިޓްސް: ޖައުފަރު އަލީ)

“އެހެންކަމުން ގުޑުގުޑާ ދޫނި ކުޅީގައި ތިބޭއިރު ކުޅީގައި ކެނޯ ދުއްވުމަކީ މަނާކަމެއް ކަމުގައިގައި ދަންނަވަން. އަދި ޑްރޯން ދުއްވާ ފަރާތްތަކުން ވެސް ދޫނިތަކަށް އުނދަގޫވާފަދަ އެއްވެސް އަމަލެއް ނުހިންގުމަށް އިލްތިމާސް ކުރަން.” އެ ޕޯސްޓްގައި ކައުންސިލުން ވިދާޅުވެފައިވެއެވެ. ކުޅީގައި ކެނޯ ދުއްވާނަމަ ނުވަތަ ދޫނިތަކަށް އުނދަގޫވާ ފަދަ އަމަލުތައް ރިޕޯޓް ކުރުމަށް 7328831 ގުޅުމަށް ވެސް އެ ޕޯސްޓްގައި ވިދާޅުވެފައިވެއެވެ.

(ފޮޓޯ ކްރެޑިޓްސް: އެމްވީ ކްރައިސިސް)

އެންމެ ފުރަތަމަ އެ ދޫނިތައް ކުޅުދުއްފުށީގެ ކުޅިއަށް ޒިޔާރަތްކުރީ މީގެ ތިން އަހަރު ކުރިންނެވެ. އޭގެ ފަހުން ކޮންމެ އިރުވައި މޫސުމަކާއި ދިމާކޮށް އެ ދޫނިތައް އެ ކުޅިއަށް ޒިޔާރަތްކުރެއެވެ. ކުޅުދުއްފުށީގެ ރައްޔިތުންގެ އިތުރުން ކައިރި ރަށްރަށުގެ މީހުން ވެސް މި ދޫނިތައް ބަލާލުމަށް ކުޅުދުއްފުށްޓަށް ޒިޔާރަތްކުރެއެވެ. މިކަމުގެ ސަބަބުން ކުޅުދުއްފުށީގެ ވިޔަފާރިތަކަށްވެސް ފައިދާތަކެއް ވެސް ލިބެމުންދެއެވެ. ގުޑުގުޑާ ދޫންޏަކީ ރާއްޖެއިން އާންމުކޮށް ކުރިން ފެންނަ ދޫންޏެއް ނޫނެވެ. އަދި އެ ދޫންޏަކީ ރާއްޖޭގައި ހިމާޔަތްކޮށްފައިވާ ދޫންޏެއް ވެސްމެއެވެ.