މާލޭގައި ކަކުލާ ހަމައަށް ފެންބޮޑުވި، ސިފައިން ނުކުމެ 30،000 ޓަނުގެ ފެންހިންދާލަައިފި

ރާއްޖެއަށް ކުރަމުންދާ ވިއްސާރައިގައި މާލޭގައި ކަކުލާ ހަމައަށް ފެންބޮޑުވިއިރު، ސިފައިން ނިކުމެ 30،000 ޓަނުގއ ފެންހިންދާލައިފިއެވެ. ރާއްޖެއަށް ކުރަމުންދާ ވިއްސާރައިގެ ސަބަބުން މާލެ ސަރަހައްދުގައި ކަކުލާ ހަމައަށް ފެންބޮޑުވިއިރު، ރަށްރަށުގައިވެސް ފެންބޮޑުވެ ގެއްލުންތަކެއް ލިބުނެވެ.

މާލެ ސަރަހައްދުގެ އިތުރުން ސިފައިން ފެން ހިންދުމުގެ މަސައްކަތުގައި ހަރަކާތްތެރިވާ ރަށްތަކުގެ ތެރޭގައި ށ. ނަރުދޫ، ކ. ގުރައިދޫ، ކ. ހުރާ އަދި ވެލާނާ އިންޓަނޭޝަނަލް އެއަރޕޯޓް ހިމެނެއެވެ. މާލޭގައި ފެން ހިންދުމުގެ މަސައްކަތް ކުރިއަށް ގެންގޮސްފައި ވަނީ ވެސްޓްޕާކް، އައިޖީއެމްއެޗް، ސަލްމާން މިސްކިތް، ބޮޑުވަޅު، މާފަންނު ފެރީ ޓާމިނަލް އަދި ކުޑަކުދިންގެ ބަގީޗާ ސަރަހައްދުތަކުގައެވެ.

އެމްއެންޑީއެފް އިން ވިދާޅުވީ އިއްޔެ 11:37 ގައި ފެން ހިންދުމަށް މާލޭގައި ކުރިއަށްގެންދިޔަ އޮޕަރޭޝަން މިއަދު 8:30 ގައި ނިންމާލާފައިވާ ކަމަށެވެ. އަދި މި މުއްދަތުގައި ނިޔަލަށް 30،569 ޓަނުގެ ފެން ވަނީ ހިއްކާފައެވެ.

ރާއްޖެއަށް މިހާރު ކުރަމުންދާ ވިއްސާރައިގައި ވޭތުވެދިޔަ 24 ގަޑިއިރު ތެރޭގައި އެންމެ ގިނައިން ވާރޭވެހިފައިވަނީ މާލެ އާއި ހުޅުލެއަށެވެ. އެގޮތުން ވޭތުވެދިޔަ 24 ގަޑިއިރުގެ ތެރޭގައި މާލެއަށް 142.6 މިލިލީޓަރުގެ ވާރޭ ވެހިފައިވާކަމަށް ވަނީ ރެކޯޑް ކުރެވިފައެވެ. އަދި ހުޅުލެއަށް 144 މިލިމީޓަރުގެ ވާރޭ ވެހިފައިވާކަމަށް ވަނީ ރެކޯޑް ކުރެވިފައެވެ.

މިހާރު ކުރަމުންދާ ވިއްސާރާގައި އުތުރުގެ ގިނަ ރަށްރަށަށް ބޯކޮށް ވާރޭވެހި ފެންބޮޑުވުމުގެ ސަބަބުން ބޮޑެތި ގެއްލުންތަކެއް ވަނީ ލިބިފައެވެ. އަދި ރަށްރަށުގެ ކައުންސިލްތަކާއި މުވައްސަސާތަކުގެ އިތުރުން ސިފައިންނާއި ފުލުހުންވެސް ދަނީ ފެން ހިންދުމުގެ މަސައްކަތް ކުރަމުންނެވެ.

މެޓުން ހާމަކޮށްފައިވާ ގޮތުގައި މިހާރު ކުރަމުންދާ ވިއްސާރަ އަލިކުރާނެ ކަމަށް ލަފާ ކުރެވެނީ އަންނަ ހޯމަ އިން ފެށިގެންނެވެ.