ކަރަންޓުގައި ޖެހުނު ކައުންސިލަރުގެ ހާލު ބެއްލެވުމަށް ކައުންސިލްތަކާ ބެހޭ ވުޒާރާއިން ޒިޔާރަތްކޮށްފި

Read Time:3 Minute, 28 Second

ކ. ހިންމަފުށީގައި ރޭގައި ކަރަންޓުގައި ޖެހުނު އެރަށު ކައުންސިލްގެ އަންހެން މެމްބަރު، ވަފިއްޔާ އިބްރާހިމްގެ ހާލު ބެއްލެވުމަށް މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ ޓީމެއް އޭޑީކޭއަށް ޒިޔާރަތްކޮށްފިއެވެ.

މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްގެ ވަޒީރު، އާދަމް ޝަރީފް ވިދާޅުވީ ހިންމަފުށީގައި ފެންބޮޑުވުމާ ގުޅިގެން ކައުންސިލްގެ ތަކެއްޗަށް ލިބިދާނެ ގެއްލުންތަކުން ސަލާމަތް ކުރުމަށް މަސައްކަތް ކުރައްވަމުންދިޔަ ކައުންސިލް މެންބަރު ވަފިއްޔާ އިބުރާހީމް ކަރަންޓްގައި ޖެހުމުގެ ސަބަބުން މާލެ ގެނައުމާއެކު، އޭނާގެ ހާލު ބައްލަވާލެއްވުމަށް މިނިސްޓްރީގެ މުވައްޒަފުން އޭޑީކޭ ހޮސްޕިޓަލަށް ޒިޔާރަތް ކުރައްވާފައިވާ ކަމަށެވެ.

ހިންމަފުށީ ކައުންސިލްގެ މެމްބަރު، މުނިޔާތުއްނިސާ ވިދާޅުވީ ވަފިއްޔާގެ ހާލު ސީރިއަސް ކަމަށް އާއިލާއިން މައުލުމާތު ދީފައިވާ ކަމަށެވެ. އެހެން ނަމަވެސް “ރެސްޕޯންޑު” ކުރާ ކަމަށް އޭނާ ވިދާޅުވިއެވެ. “މިހާރު މާލެ ފޮނުވައިފި. މިކޮޅުން ދިޔަ އިރު ރެސްޕޯންޑު ކުރޭ. އެހެން ނަމަވެސް އާއިލާއިން ބުނީ ހާލުބޮޑު ކަމަށް.” މުނިޔާތުއްނިސާ ވިދާޅުވިއެވެ.

ވަފިއްޔާ ކަރަންޓު ޖެހުނީ ސޮކެޓަކުން ޓޮޕެއް ނައްޓަން އުޅުމުގެ ތެރޭގައި މިރޭ އިރާކޮޅުގެ ވަގުތެއްގައެވެ. އޭނާ މާލެ ގެނެސްފައިވަނީ ހިންމަފުށީ ސިއްޙީ މަރުކަޒުގައި ފަރުވާ ދިނުމަށް ފަހު އެވެ. އެކްސްގައި ކުރެއްވި ޕޯސްޓެއްގައި ވަޒީރު އާދަމް ޝަރީފް ވިދާޅުވީ މިހާރު ރާއްޖެއަށް ކުރަމުންދާ ވިއްސާރައާއި އުދަ އެރުމުގެ ސަބަބުން ލިބެމުންދާ ގެއްލުންތަކާއި ރައްޔިތުންނަށް ކުރިމަތިވަމުންދާ ތަކުލީފުތައް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން އެ މިނިސްޓްރީން ރަށްރަށުގެ ކައުންސިލްތަކާ ގުޅިގެން ވަކި ވަކި ރަށްރަށުގެ ހާލަތު ބައްލަވަމުން ގެންދަވާ ކަމަށެވެ.