ޒަކާތު ފަންޑުން ތައުލީމަށް އެހީދޭއިރު، ފުދުންތެރިކަން ނެތް މީހުންނަށް އިސްކަންދޭނެ

Read Time:5 Minute, 4 Second

(ފޮޓޯ ކްރެޑިޓްސް: ވަގުތު)

މާލީ ގޮތުން ފުދުންތެރިކަން ނެތް މީހުންނަށް ޒަކާތު ފަންޑުން މަތީ ތައުލީމް ހާސިލްކުރަން ފުރުސަތު ދެވޭ ގޮތަށް މަތީ ތައުލީމަށް އެހީ ދިނުމުގެ އުސޫލު އެކުލަވާލައިފިއެވެ. ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލު”ގައި ވަނީ ޒަކާތު ފަންޑުގެ ސްކޮލަޝިޕާއި ހާއްސަ ސްކޮލަޝިޕް އަދި މިހާރު ކިޔަވަމުން އަންނަ ދަރިވަރުންނަށް އެހީ ދެވޭނެ ގޮތްތައް ބަޔާންކޮށްފައެވެ. އެ އުސޫލު މީގެ ކުރިން އޮތީ ސްކޮލަޝިޕާއި ކިޔަވަމުން އަންނަ ދަރިވަރުންނަށް އެހީ ދޭ ގޮތަށެވެ.

ޒަކާތު ފަންޑުގެ ސްކޮލަޝިޕް ދޭނީ އިސްލާމީ ދާއިރާތަކުން ޑިޕްލޮމާ އިން ފެށިގެން ޕީއެޗްޑީއާ ހަމައަށް ކިޔެވުމަށެވެ. މިއުސޫލުގެ ދަށުން ސްކޮލަޝިޕް ދެވޭނީ ހަމައެކަނި މޯލްޑިވްސް ކޮލިފިކޭޝަން އޮތޯރިޓީން ވެލިޑޭޓްކުރާ ކޯސްތައް ހިންގާ އަދި އެއޮތޯރިޓީން ގަބޫލުކުރާ މަރުކަޒުތަކަށެވެ. ރާއްޖެއިން ބޭރުގައިނަމަ މިއުސޫލުގެ ދަށުން ކަނޑައަޅައި އާންމުކުރާ އޯއައިސީ ގައުމުތަކަށް އިސްކަންދެވޭނެއެެވެ.

ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލުގައިވާ ގޮތުން ސްކޮލަޝިޕް ދިނުމުގައި އިސްކަމެއް ދޭނީ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީކޮށްފައިވާ ފަރާތްތަކާއި މާލީ ފުދުންތެރިކަން ނެތް މިންވަރާއި ތައުލީމީ ފެންވަރާއި ގައުމަށް ހިދުމަތްކޮށްފައިވާ މުއްދަތަށެވެ. އެ ސްކޮލަޝިޕަށް ކުރިމަތިލުމުގެ ޝަރުތުތަކުގެ ތެރޭގައި މާލީ ފުދުންތެރިކަން ނެތުމާއި ކިޔެވުމަށް އަމިއްލަ އަށް ހަރަދު ކުރެވެން ނެތުމާއި ސަރުކާރު މެދުވެރިވެގެން ނުވަތަ ދައުލަތުގެ އެހެން މުއައްސަސާއެއްގެ ހިލޭ އެހީގައި މީގެ ކުރިން ކިޔަވަން ފުރުސަތު ލިބުން ނުވަތަ ޒަކާތު ފަންޑު ސްކޮލަޝިޕެއްގައި ކިޔަވަމުން އަންނަ ދަރިވަރަކަށް ނުވުމާއި ސަރުކާރުން ނުވަަތަ ސަރުކާރު މެދުވެރިވެގެން ހިލޭ އެހީ/ޕެއިޑް ލީވް ނުވަތަ ލޯނުގެ ފުރުސަތުގައި ކިޔެވުމަށް ފަހު ބޮންޑު ފުރިހަމަނުކުރާ މީހަކަށް ނުވުން ހިމެނެއެވެ.

ނަމަވެސް ހާސިލްކޮށްފައިވާ ތައުލީމީ ސެޓުފިކެޓަށް ވުރެ މަތީ ފެންވަރެއްގެ ކޯހެއްގައި ތައުލީމު ހާސިލްކުރުމަށް އެދޭ ދަރިވަރުންނާއި ކިޔަވައިފައިވާ ދާއިރާއާ ގުޅޭ އިސްލާމިކް ކޮންސެޕްޓް ހިމެނޭ ކޯހެއް ހެދުމަށް ބޭނުންވާ ދަރިވަރުން އިސްތިސްނާވާނެއެވެ. ދިވެހި ސަރުކާރު މެދުވެރިވެގެން ނުވަތަ ދައުލަތުގެ އެހެން މުއައްސަސާއަކުން ނުވަތަ އެހެން ފަރާތެއްގެ ހިލޭ އެހީގައި ކިޔެވުމުގެ ފުރުސަތު ހަމަޖެހިފައިވާ ފަރާތަކަށް މި އެހީއެއް ނުލިބޭނެއެވެ.

ސްކޮލަޝިޕްގެ ދަށުން ކިޔެވުމަށް ރާއްޖެ އިން ބޭރަށް ކުރާ ފުރަތަމަ ދަތުރު އަދި ކިޔެވުން ނިންމުމަށް ފަހު އަނބުރާ ރާއްޖެ އައުމަށް ކުރާ ދަތުރުގެ ދެކޮޅު ޓިކެޓާއި ކޯހުގެ ޓިއުޝަން އަދި ވިސާ ފީއާ ސްޓައިޕެންޑާއި ބުކިން އެލަވަންސް ދޭނެއެވެ.