ސަރުކާރު ކުންފުނިތަކުން ލޯނު ނަގާއިރު، ފިނޭންސްގެ ހުއްދަ ހޯދަން ޖެހޭނެ

Read Time:3 Minute, 59 Second

(ފޮޓޯ ކްރެޑިޓްސް: ވަގުތު)

ސަރުކާރުގެ ކުންފުނިތަކުން ލޯން ނަގާއިރު، ފިނޭންސް މިނިސްޓްރީގެ ހުއްދަ ހުއްދަ ހޯދަން ޖެހޭ ގޮތަށް އުސޫލު ބަދަލުކޮށްފިއެވެ. ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އެކުލަވާލާފައިވާ “ސަރުކާރު ހިއްސާވާ ކުންފުނިތަކުން ލޯނު ނެގުމުގައި އަމަލުކުރާނެ ގޮތުގެ ގައިޑްލައިން” މިހާރު ވަނީ އިސްލާހުކޮށްފައެވެ.

އިސްލާޙުގައިވާ ގޮތުން ލޯނު ނަގަން ބޭނުންވާ ސަރުކާރު ކުންފުނިތަކުން ގައިޑްލައިންގައިވާ ކަންކަން ފުރިހަމަކޮށް، ލޯނު ނެގުމަށް ކުންފުނީގެ ބޯޑުން ނިންމުމަށްފަހު އެކަން ހިއްސާދާރުންގެ ހުއްދައަށް އެދި ފޮނުވަންޖެހޭނެއެވެ. އަދި އެ ހުއްދަ ލިބުމުން، ކުންފުނީގެ ބޯޑުން ލޯނު ނެގުމަށް ފާސްކުރާތާ ފަސް ދުވަހުގެ ތެރޭގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑަށް އެކަން އަންގަންވާނެ ކަމަށް އުސޫލުގައިވެއެވެ.

މި އުސޫލުގެ ދަށުން ގައިޑްލައިންގައިވާ ކަންކަން ފުރިހަމަކުރުމަށްފަހު ހުއްދަ ހޯދުމަށް އެދި ފޮނުވާނީ ފިނޭންސަށެވެ.އަދި ވިޔަފާރިކުރާ ދައުލަތުގެ އެހެނިހެން ތަންތަނުން ވެސް ލޯނު ނެގުމުގައި ގައިޑްލައިންގައިވާ ކަންކަން ފުރިހަމަކުރުމަށްފަހު ހިއްސާދާރުންގެ ހުއްދަ ހޯދުމަށް އެދިފައިވެއެވެ. މީގެއިތުރުން ކުންފުނި އުފައްދާފައިވާ މަގްސަދާއި ކުންފުނީގެ ރައުސުލްމާލަށް ރިއާޔަތްކޮށް މާލީ ވުޒާރާގެ ލަފަޔާއެކު، ކުންފުނިތައް ގިންތި ކުރަން ވާނީ ޕްރައިވަޓައިޒޭޝަން ބޯޑުން ކަމަށް ވަނީ ނިންމައިފައެވެ. އަދި ޕްރައިވަޓައިޒޭޝަން ބޯޑޫން ކަނޑައަޅާ ގިންތިއަށް ބިނާކޮށް، އަލަށް އުފައްދާ ކުންފުނިތަކުގެ ބޯޑު ޑިރެކްޓަރުންނަށް އިނާޔަތް ދޭންވާނީ ގައިޑްލައިންގައިވާ ގޮތުގެ މަތިން ކަމަށް ވެސް އޭގައިވެއެވެ.

އުސޫލުގައިވާ ގޮތުން ކުންފުނީގެ ފުރަތަމަ އަހަރު ނިމުމުން، މިއުސޫލާ އެއްގޮތްވާގޮތުގެ މަތިން ސަރުކާރު ހިއްސާވާ ކުންފުނިތައް އެސެސްމަންޓް ހެދުމަށްފަހު، ކުންފުނި އަލުން ގިންތި ކުރެވޭނެއެވެ. މި ގެނެވުނު ބަދަލާއެކު އަލަށް އުފައްދާ ސަރުކާރު ހިއްސާވާ ކުންފުނިތައް، ކުންފުނީގެ މަޤްސަދާއި، ރައުސުލްމާލަށް ރިއާޔަތްކޮށް، މާލީ ވުޒާރާގެ ލަފަޔާއެކު މިބޯޑުން ގިންތިކުރަމުންދާނެއެވެ.