މަތީ ތައުލީމު ހާސިލުކުރާ ދަރިވަރުންނަކީ، ގާބިލްކަމާ މެދު ޝައްކު ނުއުފެދޭ ބަޔަކަށް ވާންޖެހޭ: މާރިޔާ

Read Time:3 Minute, 30 Second

މަތީ ތައުލީމު ހާސިލުކުރާ ކޮންމެ ދަރިވަރަކީ އެދަރިވަރެއްގެ ކުޅަދާނަކަމާއި ގާބިލްކަމާ މެދު ޝައްކު ނުއުފެދޭ ފަދަ ދަރިވަރަކަށްވުމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވަޒީރު، ޑރ. މަރްޔަމް މާރިޔާ ވަނީ އިލްތިމާސްކުރައްވައިފައެވެ. ވިލާ ކޮލެޖްގެ ހިތަދޫ ކެމްޕަސް އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ވަޒީރު ވިދާޅުވީ، ވިލާ ކޮލެޖަކީ އައްޑޫ ސިޓީއަށް އެތައް ޚިދުމަތްތަކެއް ފޯރުކޮށްދިން ކޮލެޖެއް ކަމަށާއި، މިއަދު ހުޅުވިގެންދާ ހިތަދޫ ކެމްޕަހަކީ އެންމެ ޒަމާނީ ވަސީލަތްތަކާއިއެކު ހުޅުވިގެންދާ ކެމްޕަހެއް ކަމަށެވެ.

“މަތީ ތައުލީމުގެ ހިޔާވަހިކަމުގެ ދަށުން ދަސްވެނިވެގެން ނިކުންނަ ކޮންމެ ދަރިވަރަކީ، އެ ދަރިވަރެއްގެ ކުޅަދާނާނަކަމާމެދު ސުވާލުނުއުފެދޭނެ ފަދަ ދަރިވަރަކަށްވުން މުހިންމު. ވަޒީފާއަކަށް ދިޔަނަމަ، ވަޒީފާ ދިންފަރާތް މާޔޫސްނުވާފަދަ ހުނަރުހުރި ދަރިވަރަކަށް ކޮންމެ ދަރިވަރަކުވެސް ވުން ބޭނުންތެރި. ވަޒީފާއެއް އަދާކުރަން ބޭނުން ނެތް ނަމަ އަމިއްލަ މަސައްކަތަކުން ދިރިއުޅުން އާރާސްތު ކުރެވޭފަދަ ހުނަރުވެރި ދަރިވަރަކަށްވުމަކީ އަޒުމް ކަމުގައި ކޮންމެ ދަރިވަރަކުވެސް ހަދަންވާނެ” މާރިޔާ ވިދާޅުވިއެވެ.

މަތީ ތައުލީމުގެ ދާއިރާގެ ކުރިއެރުމަށް މަސައްކަތްކުރާ ފަރާތްތަކުގެ އެންމެ ކުރީ ސަފުން ވިލާ ކޮލެޖް ޖާގަ ހޯއްދަވާފައިވާކަމާއި، ކޮލެޖްގެ އިތުރުން ވެސް އެހެނިހެން އަމިއްލަ ފަރާތްތަކުން މަތީ ތައުލީމު ކުރިއެރުވުމަށް އެތައް އަގުހުރި މަސައްކަތްތަކެއް ކުރައްވަމުންދާކަން އެކަމަނާ ވަނީ ފާހަގަކުރައްވައި ޝުކުރު އަދާކުރައްވާފައެވެ. މި ރަސްމިއްޔާތުގައި، މިނިސްޓަރު ޑރ. މަރިޔަމް މާރިޔާގެ އިތުރުން އައްޑޫ ސިޓީގެ މޭޔަރު އަލީ ނިޒާރު، ވިލާ ކޮލެޖްގެ ރެކްޓަރ، ޑރ.އަޙްމަދު އަންވަރު އަދި އެހެނިހެން އިސްބޭފުޅުން ވަނީ ބައިވެރިވެވަޑައިގަންނަވާފައެވެ.