ދަނގެތީގެ ބަނދަރުގެ ދަތިކަން ހައްލުކުރުމުގެ އަމަލީ މަސައްކަތް އަންނަ އަހަރު ފަށާނަން: ރައީސް

Read Time:5 Minute, 18 Second

(ފޮޓޯ ކްރެޑިޓްސް: ވަގުތު)

އދ. ދަނގެތީގެ ރައްޔިތުންނަށް ކުރިމަތިވެފައިވާ އެތައް ތަކްލީފުތަކެއްގެ ތެރެއިންވެސް އެންމެ ބޮޑު މައްސަލައެއްގެ ގޮތުގައި ފާހަގަކުރެވޭ ބަނދަރުގެ ދަތިކަމުގެ މައްސަލަ ހައްލު ކުރުމުގެ އަމަލީ މަސައްކަތް، އަންނަ އަހަރު ފަށާނެ ކަމުގެ ފުރިހަމަ ޔަގީންކަން، ރައީސް ޑރ. މުހައްމަދު މުއިއްޒު ދެއްވައިފިއެވެ.

ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ދަނގެއްޗަށް ވަޑައިގެން، އެ ރަށުގެ ރައްޔިތުންނާ ރޭ ބައްދަލުކުރައްވާ ރައީސް ވިދާޅުވީ، ބަނދަރު ތަރައްގީ ކުރުމުގެ މަސައްކަތްތައް ކުރިއަށް ގެންދަވާނީ ރައްޔިތުންގެ ހުށަހެޅުންތައް ވީވަރަކުން ފުރިހަމަ ކުރެވޭ ފަދަ ގޮތަކަށް ކަމަށާއި، މަސައްކަތް ފަށާ ހިސާބުން އަހަރެއް ނުވަތަ ދޮޅު އަހަރުގެ ތެރޭގައި އެ މަސައްކަތްތައް މުޅިން ނިންމާލެވޭނެ ކަމަށެވެ.

މީގެ އިތުރުން، މުޅި ރާއްޖޭގެ އެކި ކަންކޮޅުތަކުގައި ދިރިއުޅެމުންދާ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ ދަތިކަމުގެ މައްސަލައަށް ހައްލު ހޯއްދަވައިދެއްވުމަށް އަދުގެ ސަރުކާރުން ކުރައްވަމުން ގެންދަވާ މަސައްކަތްތަކުގެ ތެރެއިން، މިރަށުގައި މަސައްކަތްތަކެއް ކުރެވޭނެ ކަމަށް އެމަނިކުފާނު ވިދާޅުވިއެވެ. އަދި މިރަަށަށް ދިމާވެފައިވާ ބޯހިޔާވަހިކަމުގެ ދަތިކަމަށް ހައްލު އޮތީ ބިން ހިއްކައިގެން ކަމަށް ވާ އިރު، ފުރުސަތު އޮތް މިންވަރަކުން އަންނަ އަހަރުގެ ތެރޭގައި އެ މަސައްކަތް ފައްޓަވާދެއްވާނެ ކަމަށާއި ނޫން ނަމަ 2026 ވަނަ އަހަރަކީ، އެރަށު ފަޅުތެރެއިން 27 ހެކްޓަރުގެ ބިން ހިއްކަވާދެއްވާ، ގޯތި ދޫކުރުމާއި ގެދޮރުވެރިކަމުގެ މަޝްރޫއު ހިންގަވާދެއްވާނެ ކަމުގެ ޔަގީންކަން އެ މަނިކުފާނު ދެއްވިއެވެ.

އޭގެ އިތުރުން ތައުލީމާއި، ސިއްހީ ދާއިރާއިން އެރަށަށް ބޭނުން ވެފައިވާ ތަރައްގީ ގެނެސްދެއްވާނެ ކަމަށާއި، މިރަށަށް ފަދައިން އެ އަތޮޅުގެ އެހެން ރަށްރަށަށްވެސް ދިމާވެފައި އިޖުތިމާއީ ދަތިތަކަށް ހައްލު ހޯއްދަވައިދެއްވުމަށް މަސައްކަތްޕުޅު ކުރައްވާނެ ކަމަށް ވިދާޅުވިއެވެ. އެގޮތުން ވަކިވަކި ރަށްރަށަށް ބޭނުންވާ ކަންކަމަށް ރިޢާޔަތްކުރައްވައިގެން، ދީނީ ކަންކަމާއި ކުޅިވަރުގެ ރޮނގުން މަޝްރޫޢުތައް ހިންގަވާނެކަމަށްވެސް އެ މަނިކުފާނު ވަނީ ވިދާޅުވެފައެވެ.

ރައީސް ވަނީ ރައްޔިތުންގެ ކަންބޮޑުވުންތަކާ ގުޅިފައިވާ އޮތް ކަލްޗަރަލް ސެންޓަރުގެ މަސައްކަތްވެސް ކުރިއަށްދާނެ ކަމުގެ ޔަގީންކަން ދެއްވާފައެވެ. އަދި މި ސަރުކާރުން މި ހުރިހާ ކަމެއްވެސް ކުރައްވަނީ ވަޅުޖެހިފައި އޮތް އިގްތިސޯދެއް ނަގާ ކޮޅަށްޖަހަމުން ކަމަށާއި، ރައްޔިތުންގެ މާލީ ތަނަވަސްކަން އިތުރުކުރުމުގެ އަމާޒަށް ވާސިލު ވަނީ ފައިސާ ޗާޕުކުރުމަކާއި ނުލާ ކަމަށް ވިދާޅުވިއެވެ. ސަރުކާރުން މަޝްރޫއުތައް ހިންގެވުމުގައި ކުޑަރަށެއް، ބޮޑުރަށެއް ތަފާތު ނުކުރައްވާނެ ކަމަށާއި، އެއްވެސް ރައްޔިތަކު ބާކީ ނުވާނެ ކަމުގެ ފުރިހަމަ ޔަގީންކަން ރައީސް ދެއްވިއެވެ.