Read Time:5 Minute, 56 Second
(ފޮޓޯ ކްރެޑިޓްސް: ވަގުތު)
މިދިޔަ ބުރާސްފަތި ދުވަހު މާލޭގައި ހިނގި އަލިފާނުގެ ހާދިސާގައި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ އެނދުމުން ވަރަށް ބޮޑު އަސަރެއް ކުރި ކަމުގައި ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
އދ. ދަނގެތީގެ ރައްޔިތުންނާ ބައްދަލު ކުރެއްވުމަށް ބޭއްވި ޖަލްސާގައި ރައީސް ޑރ. މުއިއްޒު ވިދާޅުވީ ސަރުކާރަށް އެކި ކަހަލަ ގޮންޖެހުންތައް ކުރިމަތިވާ އިރު، ބައެއް ކަންކަމަކީ ހިނގާ ހާދިސާތައް ކަމަށެވެ. އެ ވާހަކަ ވިދާޅުވުމަށް ފަހު، ރައީސް ފާހަގަ ކުރެއްވީ ތިން މިނިސްޓްރީއެއްގައި ހިނގި އަލިފާނުގެ ހާދިސާއެވެ. ރައީސް ވިދާޅުވި ގޮތުގައި ތިން މިނިސްޓްރީ ވެސް “އަނދައިގެން ތިރިވެގެން” ދިޔައީ އެމަނިކުފާނުގެ ލޯފުޅު ކުރިމަތީގައެވެ.
“ކޮންމެ މިނިސްޓްރީއެއްގެ، ކޮންމެ އިމާރާތަކަށް ލިބުނަސް އޭގެ އަސަރު އަޅުގަނޑަށް ކުރާނެ. ނަމަވެސް ޕާސަނަލީ ވަރަށް ބޮޑު އަސަރެއް ކުރި،” ރައީސް ވިދާޅުވިއެވެ.
(ފޮޓޯ ކްރެޑިޓްސް: ވަގުތު)
ރައީސް ވިދާޅުވި ގޮތުގައި އެ ތަނުގައި ހިނގަމުން ދިޔަ ތިން މިނިސްޓްރީ އާއި މާލެ ސިޓީ ކައުންސިލަކީ މީގެކުރިން އެމަނިކުފާނު އިސްކޮށް މަސައްކަތްޕުޅު ކުރެއްވި ތަންތަނެވެ. ގާތްގަނޑަކަށް ހަތް އަހަރު އެ ތިން މިނިސްޓްރީ އެކި ގޮތް ގޮތުން ހިންގެވި ކަން ރައީސް ފާހަގަ ކުރެއްވިއެވެ.
“ރައީސް ވަހީދު، އެންމެ ފުރަތަމަ އަޅުގަނޑު އައްޔަން ކުރީ ހައުސިން އެންޑް އެންވަޔަރަމަންޓް ކިޔާ މިނިސްޓްރީއަކަށް. އެހެންވީމަ މިހާރުގެ ތިން މިނިސްޓްރީ އެއްކޮށް އެއީ. ދެން ހައުސިން އެންޑް އިންފްރާސްޓްރަކްޗާ އަށް ބަދަލު ކުރެއްވީ. ދެން ރައީސް ޔާމީން ވެސް ހައުސިން އިންފްރާސްޓްރަކްޗާ ހަވާލު ކުރެއްވީ. ދެން މާލެ ސިޓީ މޭޔަރަކަށް ފަހުން ހުރީ. އެހެންވީމަ މި ހުރިހާ ތަނެއް ހިނގާ އިމާރާތް، އެތައް އަހަރެއްގެ މަސައްކަތް ކުރި ތަން، އެތައް މުވައްޒަފުންނާ އެކީގައި މަސައްކަތް ކުރި ތަން ހަމަ ކުޑަ ވަގުތުކޮޅެއްގެ ތެރޭގައި އެއްކޮށް އަނދައި ހުލިވެ، ބިންމައްޗަށް ތިރިވެގެން ދިޔައީމަ ވަރަށް ބޮޑު އަސަރެއް ކުރީ،” ރައީސް ވިދާޅުވިއެވެ.
(ފޮޓޯ ކްރެޑިޓްސް: ވަގުތު)
ރައީސް ޑރ. މުއިއްޒު ވިދާޅުވި ގޮތުގައި އެ ގޮންޖެހުން ނެގީ ވަރަށް ބޮޑު ހިތްވަރަކާ އެކުގައެވެ. އެގޮތުން ވަޒީރުންނާއި ކުންފުނިތަކުގެ ވެރިންނާއި މުވައްޒަފުން އެކުގައި އަތުކުރި އޮޅާލައިގެން ނުކުމެ، އަލުން މަސައްކަތަށް ނުކުތުމުގެ މަސައްކަތް މެދުނުކެނޑި ކުރަމުންދާ ކަމަށް ރައީސް ވިދާޅުވިއެވެ.
“އިރާދަކުރެއްވިއްޔާ މާދަމާ ހެނދުނު 8 ޖަހާއިރު، މި ތިން މިނިސްޓްރީގެ ހިދުމަތް ވެސް ރައްޔިތުންނަށް ދޭން ފަށާނެ. ދަރުބާރުގޭގައި އެ މަސައްކަތް ފެށެނީ،” ރައީސް ވިދާޅުވިއެވެ. ރައީސް ވިދާޅުވީ މިފަދަ ގޮންޖެހުން ކުރިމަތިވި ކަމުގައި ވިޔަސް، ހިތްވަރު ބައްޔެއް ނުވާނެ ކަމަށެވެ. އަދި ހިތްވަރާ އެކުގައި ވަރުގަދަ އަޒުމެއްގައި ކުރިމަތިވާ ކޮންމެ ކަމަކާ ކުރިމަތިލައިގެން ރައްޔިތުންނަށް ހިދުމަތް ދިނުމުގައި ކެރިގެން ކުރިއަށް ވަޑައިގަންނަވާނެ ކަމަށް ވެސް އެމަނިކުފާނު ވިދާޅުވިއެވެ.
(ފޮޓޯ ކްރެޑިޓްސް: ވަގުތު)
“އެއީ ރައްޔިތުންނަށް ހިދުމަތް ދިނުމުގައި މި ސަރުކާރުން ކުރިއަށް ދާނެ ގޮތަކީ. އިރާދަކުރެއްވިއްޔާ އޭގެ ނަތީޖާ ރައްޔިތުންނަށް ފޮނިވާނެ،” ރައީސް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0