އާދީއްތަ ދުވަހު މިނިސްޓްރީގެ މަސައްކަތްތައް ދަރުބާރުގޭގައި ފެށޭނެ: ހައިދަރު

Read Time:3 Minute, 30 Second

(ފޮޓޯ ކްރެޑިޓްސް: ވަގުތު)

ދިވެހިރާއްޖޭގެ އަޑު ކުރިމަތީގައި ހުންނަ ގިނަ މިނިސްޓްރީތަކެއް ހިންގަމުންދިޔަ އިމާރާތުގައި ހިނގި އަލިފާނުގެ ހާދިސާއާ ގުޅިގެން އެތަނުގައި ހިންގަމުންދިޔަ މިނިސްޓްރީތަަކަށް ދަރުބާރެގެއަށް ބަދަލު ކުރުމުގެ މަސައްކަތް ކުރަމުންދާއިރު، ހައުސިންގ މިނިސްޓްރީގެ މަސައްކަތް އާދީއްތަ ދުވަހު އަލުން ފެށޭނެ ކަަަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.

އަމީނީ މަގު، ދިވެހިރާއްޖޭގެ އަޑު ކުރިމަތީގައި ހުންނަ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީގައި ހިނގި އަލިފާނުގެ ހާދިސާގައި އެ ދެ ތަން ބޭނުން ނުކުރެވޭ ވަރަށް ވަނީ އަނދައިފައެވެ. އަދި އެ އިމާރާތާ ކައިރީގައި ހުންނަ ގްރީން ބިލްޑިންގައި ވެސް އަލިފާން ރޯވެ ގެއްލުންތަކެއް ވިއެވެ. އެއީ އެންވަޔަރަމަންޓް މިނިސްޓްރީ އާއި އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) ހިންގަމުން އަންނަ އިމާރާތެވެ.

މިއާއެކު އެ ތިން ވުޒާރާ ދަރުބާރުގެއަށް ވަގުތީ ގޮތުން ބަދަލު ކުރުމުގެ މަސައްކަތް ދަނީ ކުރަމުންނެވެ. ދައުލަތުގެ މީޑިއާ ޕީއެސްއެމްއާ ވާހަކަދައްކަވަމުން ހައިދަރް ވިދާޅުވީ، އާދީއްތަ ދުވަހު އެ ވުޒާރާގެ މަސައްކަތް ފެށޭނެ ކަމަށެވެ. ހައިދަރް ވިދާޅުވީ، އެ ވުޒާރާގެ ސާވާ އެއްވެސް ވަރަކަށް ސަލާމަތް ނުކުރެވުނު ކަމަށާއި، ނަމަވެސް ފްލެޓް ލިސްޓާއި، މަޝްރޫއުތަކާއި ގުޅޭ މުހިންމު މައުލޫމާތު ރައްކާ ކުރެވިފައި އެބަ ހުރި ކަަމަށެވެ.

“ނަސީބަކުން އަޅުގަނޑުމެން ފްލެޓް ލިސްޓުގެ ހުރިހާ މައުލޫމާތަކާއި ގެދޮރުވެރިކަމުގެ މަޝްރޫއާއި ބިންވެރިކަމުގެ ހުރިހާ މަޝްރޫއެއްގެ މައުލޫމާތެއް ރައްކާކުރަމުންދިޔައީ ކްލައުޑުގައި. އެހެންވީމަ ސާވާއަށް ގެއްލުން ލިބުނަސް އަޅުގަނޑުމެންނަށް އެ މައުލޫމާތު ލިބެން ހުންނާނެ ކްލައުޑުން، އެއީ އަޅުގަނޑުމެންނަށް ދުރަށް ވިސްނާފައި ކުރެވުނު މަސައްކަތެއް،”. ޕީއެސްއެމްއަށް ހައިދަރު ވިދާޅުވިއެވެ.