މިފްކޯއަށް ކިރި މަހަށްވާ ދެ މިލިޔަން ރުފިޔާ 48 ގަޑިއިރުތެރޭ މަސްވެރިންނަށް ޖަމާކޮށްފި

Read Time:3 Minute, 24 Second

(ފޮޓޯ ކްރެޑިޓްސް: ވަގުތު)

މިދިޔަ އާދީއްތަ ދުުވަހު މަސްވެރިން މިފްކޯއަށް ކިރި މަހަށް ވާ ފައިސާ (2 މިލިޔަނަށް ވުރެ ގިނަ ފައިސާ) މިފްކޯއިން މިއަދު މަސްވެރިންނަށް ޖަމާކޮށްފިއެވެ. މަސްވެރިކަމާއި ބެހޭ ވަޒީރު އަހުމަދު ޝިޔާމު އެކްސްގައި ކުރެއްވި އެކްސްއެއްގައި ވިދާޅުވީ ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މަސްވެރިން މިފްކޯއަށް ކިރުވި މަހަށްވާ ފައިސާ ޖަމާކޮށްފި ކަމަށެވެ.

“ޑިސެމްބަރ 8 ވަނަ ދުވަހު މަސްވެެރިން މިފްކޯއަށް ކިރި މަހަށްވާ 2،045،823.37 ރުފިޔާ މިއަދު މިފްކޯއިން މަސްވެރިންނަށް ޖަމާކޮށްފި. މިއީ އިއްޔެ މަސްވެރިންގެ ޕޭމަންޓުގެ ބެކްލޮގު ސާފުކުރިއިރު ޑިސެމްބަރު 7 ވަނަ ދުވަހު ބޭނިމަހުގެ ޕޭމަންޓު ހިމެނޭގޮތަށް ދެއްކި ޕޭމަންޓުގެ ފަހުން ފުރަތަމަ ފަހަރަށް 48 ގަޑިއިރުތެރޭ މަސްވެެރިންގެ ފައިސާ ރައީސުލް ޖުމްހޫރިއްޔާގެ ވަޢުދުފުޅާ އެއްގޮތަށް ޖަމާކުރެވުނު ތާރީޚީ ދުވަސް.” ޝިޔާމް ވިދާޅުވިއެވެ.

މިފްކޯއިން ހާމަކުރި ގޮތުގައި އެ ކުންފުނިން އިއްޔެވެސް ވަނީ މަސްވެރިން 16 ނޮވެމްބަރު 2024 ވަނަ ދުވަހުން ފެށިގެން 7 ޑިސެމްބަރު 2024 ވަނަ ދުވަހުގެ ނިޔަލަށް ކިރުވި މަހަށްވާ ފައިސާ 38،261،330 ރުފިޔާ މަސްވެރިންނަށް ޖަމާކޮށްފައެވެ. މަސްވެރިންގެ ބެކްލޮގް އެއްކޮށް ކްލިއާކޮށް 48 ގަޑިއިރުތެރޭ މަސްވެރިންނަށް ފައިސާ ޖަމާކޮށްދިނީތީ ޝިޔާމު ވަނީ ރައީސް މުއިއްޒުއަށް ޝުކުރު ދަންނަވާ މަރުހަބާ ދަންނަވާފައެވެ. އަދި 44 ވަނަ މަސްވެެރިންގެ ދުވަހުގެ ހެޔޮއެދުމާ ތަހުނިޔާ ދިވެހި މަސްވެރި އާއިލާ ތަކަށާއި މަސްވެރި ސިނާޢަތުގައި ހަރަކާތްތެރިވާ ހުރިހާފަރާތްތަކަށް ވަޒީރު ވަނީ އަރިސްކޮށްފައެވެ.

ޝިޔާމު ވިދާޅުވި ގޮތުގައި މަސްވެރިންގެ އަދި މަސްވެރި ސިނާޢަތުގައިހުރި ޒަމާންވީ ބޮޑެތި ގޮންޖެހުންތަކަށް ރައީސް ގެންދަވަނީ ޖުމްލަ ހައްލުތަކެއް ހޯއްދަވައި ދެއްވަމުންނެވެ.