ގެދޮރު އެޅުމުގެ އެންމެ ގިނަ މަޝްރޫއުތައް ގެންދެވޭނެ އަހަރަށް 2025 ވާނެ: ރައީސް

Read Time:7 Minute, 5 Second

(ފޮޓޯ ކްރެޑިޓްސް: ވަގުތު)

ގެދޮރުބިނާ ކުރުމުގެ އެންމެ ގިނަ މަޝްރޫއުތައް އެއް އަހަރެއްގެ ތެރޭގައި ކުރިއަށް ގެންދެވޭ އަހަރަށް 2025 ވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. މާލެ އަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ކ. ހިންމަފުއްޓާށް ވަޑައިގެން ރަށުގެ ރައްޔިތުންނާއި ބައްދަލުކޮށް ވާހަކަފުޅު ދައްކަވަމުން ރައީސް ވިދާޅުވީ، ރަށުގެ ތަރައްްގީއަށް ކުރަން ހުރި ވަރަށް ގިނަ ކަންކަން އެބަ ހުރި ކަމަށާއި، އެކިއެކި ދާއިރާތަކުން ކުރަން ހުރި ވަރަށް ގިނަ މަސައްކަތްތައް އެބަ ހުރި ކަމަށެވެ.

“އިރާދަކުރެއްވިއްޔާ 2025 ވަނަ އަހަރަށް އަޅުގަނޑުމެންގެ ރައްޔިތުންގެ މަޖިލީހުން ފާސްކޮށްފައިވާ ބަޖެޓަކީ މި ދެންނެވި ކަންކަމުގެ އުފާވެރި މަންޒަރުތައް އަމަލީ ގޮތުން ފެނިގެންދާނެ ބަޖެޓެއް، އިރާދަކުރެއްވިއްޔާ އަންނަ އަހަރު މި ދެންނެވި ގޮތަށް މަސައްކަތްތައް ކުރެވިގެން ދާނެ،”. ރައީސް މުއިއްޒު ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

ރައީސް ވިދާޅުވީ، މި ހިނގާ އަހަރަށް އެމްޑީޕީ މެޖޯރިޓީ އޮތް މަޖިލީހުން ބަޖެޓް ފާސްކޮށްފައި އޮތީ ގިނަ މަޝްރޫއުތަކެއް ކަށީގެންވާ ފަދަ ގޮތެއްގައި ނުކުރެވޭ ގޮތަށް ކަމަށާއި، މިހެންވުމުން ހަގީގަތުގައި މުހިންމު ކަންކަން އެންމެ އެކަށީގެންވާ ގޮތަކަށް ނުކުރެވުނު ކަމަށެވެ. “މި އަހަރު ރައްޔިތުންގެ މަޖިލީހުން ފާސް ކުރި ބަޖެޓްގެ ތެރެއިން އިރާދަކުރެއްވިއްޔާ ތިބޭފުޅުން ތި އެދިވަޑައިގަންނަވާ ކަންކަމުގައި އަމަލީ ސިފަ ޖެއްސޭނެ،”. ރައީސް ވިދާޅުވިއެވެ.

ރައީސް ވިދާޅުވީ، މި ބަޖެޓުން އެންމެ ބޮޑު އިސްކަމެއް ދޭނީ ގެދޮރު ބިނާ ކުރުމަށް ކަމަށެވެ. އަދި ގެދޮރުބިނާ ކުރުމުގެ އެންމެ ގިނަ މަޝްރޫއުތައް އެއް އަހަރެއްގެ ތެރޭގައި ކުރިއަށް ގެންދެވޭ އަހަރަށް 2025 ވާނެ ކަމަށްވެސް ވިދާޅުވިއެވެ. “ގެދޮރުވެރިކަމަކީ މި ސަރަހައްދަށް އަދި އަމުދުން، ވަރަށް ބޮޑުވެފައިވާ މައްސަލަ، އެހެންވީމަ ގެދޮރުވެރިކަމުގެ މަޝްރޫއު ހިންގުން އެއީ އެންމެ މުހިންމު އެއް ކަންތައް، މިރަށުގައިވެސް ބިން ހިއްކުމުގެ މަޝްރޫއެއް ހިންގިފައި އޮތުމާއި އެކީގައި ބިން އެންމެ އެދެވޭ ގޮތުގައި ހިފުމުގައި ގެދޮރުވެރިކަމަކީ މުހިންމު ކަމެއްގެ ގޮތުގައި އަޅުގަނޑު ހިތުން ރައްޔިތުން ގަބޫލު ކުރައްވާނެ،”. ރައީސް ވިދާޅުވެފައި ވެއެވެ.

(ފޮޓޯ ކްރެޑިޓްސް: ވަގުތު)

ދެވަނައަށް އެންމެ ބޮޑު އިސްކަމެއް ދެއްވާނީ ތައުލީމީ ދާއިރާ އާއި ސިއްހީ ދާއިރާއަށް ކަމަށްވެސް ރައީސް ވިދާޅުވެފައި ވެއެވެ. “މިރަށުގައިވެސް މި ދެ ދާއިރާއަށް ކުރަން ހުރި ކަންކަން އެބަ ހުރި، ސްކޫލްގެ މަސައްކަތްތަކެއް ކުރަން އެބަ ހުރި، ސިއްހީ ހިދުމަތުގައި އިތުރުކުރަން ހުރި ފުޅާކުރަން ބޭނުންވާ ކަންކަން އެބަ ހުރި، އެހެންވީމަ މި އަންނަ އަހަރު އެ ބަޖެޓްގެ ތެރެއިން އަލަށް ހިންގާ އިނީޝިއޭޓިވްގެ ތެރެއިން މި ދެންނެވި ދެ ދާއިރާއިން ކުރާނަން، އިރާދަކުރެއްވިއްޔާ،”. ރައީސް ވިދާޅުވިއެވެ.

ތިން ވަަނަ ކަމެއްގެ ގޮތުގައި ރައީސް ފާހަގަކުރެއްވީ މަގުތަކާއި ގުޅޭ މައްސަލައެވެ. ރައީސް ވިދާޅުވީ، ގިނަ ރަށްތަކެއްގައި މަގުތައް އޮތީ ހަލާކުވެފައި ކަމަށާއި، މިގޮތުން ފުރަތަމަ ތަރުތީބުކޮށްފައި ވަނީ ފެނާއި ނަރުދަމާ އަޅަން ކަމަށެވެ. މިކަންކަން ނިމިފައި ހުރި ރަށްރަށުގައި މަގުތައް ހެދުން ކަަމަށްވެސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

އެއާއެކު އެކި ކަހަލަ އިޖުތިމާއީ މަޝްރޫއުތަކަށްވެސް ބަޖެޓުން ހޭދަކުރައްވާނެ ކަމަށް ރައީސް ވިދާޅުވިއެވެ. އޭގެ ތެރޭގައި ކުޅިވަރާއި ގުޅުން ހުރި މަޝްރޫއުތަކަށް އިސްކަން ދިނުން ކަމަށްވެސް ވިދާޅުވިއެވެ. “އެހެންވީމަ މިކަހަލަ ގޮތަކަށް ތަރުތީބު ކުރެވިގެން މި އަންނަ އަހަރު ތެރޭގައި އަޅުގަނޑުވެފައި ހުރި ވައުދުތަކަށް، އަދި ރަށްރަަށަށް ބޭނުންވާ މުހިންމު ކަންކަން ފުއްދުގައި އަމަލީ މަސައްކަތްތައް ފަށާނަން، އަދި ދެން އަންނަ އަހަރަށް އޭގެ ބާކީ ހުރި މަސައްކަތްތައް ފެށުމަށް ރޭވިފައި މި އޮތީ،”. ރައީސް ވިދާޅުވެފައި ވެއެވެ.