ހުރާ ބަނދަރުގެ މަސައްކަތް ކުރިއަށްދާނީ ރައްޔިތުން އެދިވަޑައިގަންނަވާ ގޮތަށް- ރައީސް

Read Time:6 Minute, 9 Second

(ފޮޓޯ ކްރެޑިޓްސް: ވަގުތު)

ކ. ހުރާގެ ބަނދަރުގެ މަސައްކަތް ކުރިއަށް ގެންދާނީ ރަށުގެ ރައްޔިތުން އެދިވަޑައިގަންނަވާ ގޮތަށް ކަމަށް ރައީސް، ޑރ. މުހައްމަދު މުއިއްޒު ވިދާޅުވެއްޖެއެވެ.

މާލެ އަތޮޅު ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން، ކ. ހުރާ އަށް ވަޑައިގެން ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ވަނީ ރަށަށް ބޭނުންވެފައިވާކަންކަން ރައްޔިތުންގެ ފަރާތުން އެނގިވަޑައިގެންފައިވާ ކަމަށް ވިދާޅުވެފައެވެ. އަދި އެފަދަ މަސައްކަތްތައް ކުރިއަށްގެންދާނީ ރައްޔިތުންގެ ހިޔާލާއި މަޝްވަރާގެ މަތިން ކަމަށް ރައީސް ވިދާޅުވިއެވެ.

ރައީސް ވިދާޅުވީ، އެމަނިކުފާނު އެންމެ އިސްކަމެއް ދެއްވަނީ ރައްޔިތުން އެދޭ ކަންކަން ކޮށްދިނުމަށް ކަމަށެވެ. އެހެން ކަމުން ހުރާގެ ބަނދަރުގެ މަސައްކަތް ކުރިއަށްދާނީ ރައްޔިތުން އެދޭ ގޮތަށް ކަމަށާއި ބަނދަރު ނިންމާނީ އެގޮތަށް ކަމަށް ރައީސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

“އަޅުގަނޑު އިސްކަން ދޭނީ ހަމަ ހަގީގަތުގައި ވެސް ރައްޔިތުން އެދޭކަންކަން ކޮށްދެވޭތޯ ބެލުމަށް. މިރަށުގެ ބަނދަރުގެ މަސައްކަތް އިރާދަކުރެއްވީތީ ކުރިއަށްދާނީ ރައްޔިތުން އެދިވަޑައިގެންނަވާ ގޮތަށް. އެގޮތަށް ނިންމަ ދޭނަން” ރައީސް ވިދާޅުވިއެވެ. ރައީސް ވިދާޅުވީ، މުހިންމު ކަންކަން މި ސަރުކާރުން ރާވާފައިވާ ކަމަށާއި ނަމަވެސް މާ ގިނަ ކަންތައްތަކެއް ނިމިގެން މިދާ އަހަރުގައި ކުރެވިފައި ނުވާ ކަމަށެވެ. އެކަން އެގޮތަށް ދިމާވީ، ކުރީ ސަރުކާރުގެ ފިނޭންސް މިނިސްޓަރު ހުރެގެން މަޖިލީހުން ފާސްކޮށްފައިވާ ބަޖެޓާއި ގުޅިގެން ކަމަށާއި ނަމަވެސް މިހާރު ބަޖެޓު އެބަ އޮތް ކަމަށާއި އެހެން ކަމުން އެކަން ތަކުރާރު ނުވާނެ ކަމަށް ރައީސް ވިދާޅުވިއެވެ.

އަންނަ އަހަރު އެންމެ އިސްކަމެއް ދެނީ ގެދޮރުވެރިކަމަށް ކަމަށާއި ދެން އިސްކަމެއް ދޭ ތައުލީމީ ދާއިރާގެ ތެރެއިން ހުރާ ސްކޫލްގެ މަލްޓިޕާޕޯސް ހޯލް އަންނަ އަހަރު އަޅުއްވައިދެއްވާނެ ކަމަށް ރައީސް ވަނީ ވިދާޅުވެފައެވެ. “އޭގެ އިތުރުން އެންމެ އިސްކަން ދޭ އަނެއް ކަމަކީ ތައުލީމީ ދާއިރާއިން ކުރަން ހުރި ކަންތައްތަކަށް. މިރަށުގަ އެބަ ހުރި ސްކޫލެއް. އަޅުގަނޑު ދަންނަވާލަން ބޭނުން އިރާދަކުރެއްވިއްޔާ ތިބޭފުޅުން ތިއެދިވަޑައިގަންނަވާ މަލްޓިޕާޕޯސް ހޯލު މިއަންނަ އަހަރުގެ ބަޖެޓުން އަޅައިދޭނަން” ރައީސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

ތައުލީމީ ދާއިރާއާއި އެއްވަރަށް ސިއްހީ ދާއިރާގެ ކުރިއެރުމަށް ވެސް އިސްކަމެއް ދެއްވާ ކަމަށެވެ. ރައީސް ވަނީ ސިއްހީ ދާއިރާއިން ވެސް ރަށުގެ ރައްޔިތުން އެދިލައްވާ ކަންކަން އެބަހުރިކަން ފާހަގަކޮށް އެކަންކަން ވެސް ކޮށްދެއްވާނެ ކަމަށް ވިދާޅުވިއެވެ.

“ސިއްހީ ދާއިރާއިން ވެސް ތިބޭފުޅުން އެދިވަޑައިގަންނަވާ ކަންކަން އެބަހުރި. ހެލްތް ސެންޓަރު ތަރައްގީ ކުރުމުގަ. ސްކޭން ކުރެވޭ ހިދުމަތް ގާއިމު ކުރުމާ، އަދިވެސް އިތުރު ވަސީލަތްތައް ގާއިމުކޮށްފަ ފުރިހަމަ ކުރުމަށް. އެކަންކަން އިރާދަކުރެއްވިއްޔާ ކޮށްދޭނަން. އެއީ އަޅުގަނޑުމެން ޕްލޭންކޮށްފަ ވައުދުވެފަ ހުރިކަންކަން” ރައީސް ވިދާޅުވިއެވެ. ރައީސް ވިދާޅުވީ، ތަރައްގީގެ މަޝްރޫއުތައް ކުރިއަށް ދާނީ ވެސް ހުރާ ހިމެނޭހެން މުޅި ރާއްޖޭގެ ރައްޔިތުން ބޭނުންވާ ގޮތަށް ކަމަށެވެ. އަދި 2025 އާއި 2026 ވެގެން ދާނީ އެމަނިކުފާނު އިންތިހާބުގެ ތެރޭގައި ވެވަޑައިގެންނެވި ވައުދުތައް އަމަލީ ގޮތުން ފުދިގެން ދާނެ ދެއަހަރު ކަމަށެވެ.