ބޭރު ފައިސާއާ ބެހޭ ބިލް މަޖިލިހަށް މާ ބޮޑު ބަދަލެއް ނުފެނޭ

Read Time:6 Minute, 51 Second

(ފޮޓޯ ކްރެޑިޓްސް: ވަގުތު)

ފަތުރުވެރިކަމުގެ ދާއިރާއަށް ލިބޭ ޑޮލަރު ރާއްޖޭގެ ބޭންކްތައް މެދުވެރިކޮށް މާރު ކުރުމުގައި ދެ އިހްތިޔާރެއް ލިބޭ ގޮތަށް ސަރުކާރުގެ ފަރާތުން ހުށަހެޅި ބޭރު ފައިސާއާ ބެހޭ ބިލް ނުވަތަ ފޮރެކްސް ބިލް ރައްޔިތުންގެ މަޖިލިހަށް މިއަދު ހުށަހަޅައިފިއެވެ. މަޖިލީހަށް އެ ބިލް ހުށަހެޅުއްވީ ޕީއެންސީގެ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހުއެވެ. މިއީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުންގެ ހިޔާލު ހޯދުމަށްފަހު މަޖިލިހަށް ފޮނުވި ބިލެކެވެ.

މި ބިލު ހުށަހެޅުމުގެ މަގުސަދަކީ ރާއްޖޭގައި ބޭރު ފައިސާއިން ކުރެވޭ މުއާމަލާތްތައް ކަނޑައަޅައި، ބޭރު ފައިސާ ރާއްޖެއަށް އެތެރެކުރުމާއި، ބޭރުކުރުމާއި، ބޭރު ފައިސާ ރާއްޖޭގައި ގެންގުޅުމާއި، ޖަމާކުރުމާއި ބެހޭ އުސޫލުތައް ކަނޑައެޅުމެވެ. އަދި އެނޫންވެސް ބޭރު ފައިސާއާ ބެހޭ މުއާމަލާތްތަކާ ގުޅޭ ހަމަތަކާއި އުސޫލުތައް ކަނޑައަޅައި ހިންގުމަށް ބޭނުންވާނޭ ކަމާބެހޭ ހަރުދަނާ އޮނިގަނޑެއް ވަނީ ހިމަނާފައެވެ. މި ބިލާއި ގުޅޭގޮތުން މައުލޫމާތު ދެެއްވަމުން އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވީ، އެ ބިލަށް ބަދަލު ގެނެސްފައިވަނީ އާންމުންނާއި، ބައެއް އިދާރާތަކުގެ އެދުމާއެކު ކަމަށާއި، މި ބިލަށް ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ ޚިޔާލާއި މަޝްވަރާކޮށް އެންމެ ރަނގަޅު ގޮތުގައި ކަމަށެވެ.

ބިލަށް އަލަށް ގެނެސްފައިވާ މައިގަނޑު ބަދަލަކީ “ކެޓެގަރީ އޭ ޓޫރިޒަމް އެސްޓެބްލިޝްމަންޓް” މަހެއްގެ ތެރޭގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން މާރު ކުރުން ނުވަތަ ކޮންމެ މަހެއްގެ ޖުމްލަ އާމްދަނީގެ 20 އިންސައްތަ ޑޮލަރު މާރު ކުރުމެވެ. ދެވަނަ ކެޓަގަރީގައި ރަޖިސްޓަރީކޮށްފައިވާ ޓޫރިސްޓް އުޅަނދުތަކާއި، ޓޫރިސްޓް ހޮޓާތަކުގެ އިތުރުން ޓޫރިސްޓް ގެސްޓްހައުސްތަކަކުން ހިދުމަތް ހޯދާ ކޮންމެ ފަތުރުވެރިއެއްގެ ބޮލަކަށް 25 އެމެރިކާ ޑޮލަރު މާރުކުރުން ނުވަތަ މަހެއްގެ ތެރޭގައި އެ ފަރާތަށް ލިބޭ ބޭރު ފައިސާގެ އާމްދަނީގެ 20 ޕަސެންޓު މާރުކުރަން ޖެހޭނެއެވެ.

އެމްއެމްއޭއިން ވިދާޅުވީ، ބޭރު ފައިސާއިން އަދާ ކުރަންޖެހިފައިވާ ޓެކްސްގެ އިތުރުން ސަރުކާރަށް ބޭރު ފައިސާއިން އަދާކުރަންޖެހޭ މުއާމަލާތްތައް އިސްތިސްނާ ކުރުމަށް ނިންމާފައިވާ ކަމަށެވެ.

މި ހާލަތުގައި އިސްތިސްނާވާ ފަރާތްތަކެއް ބިލްގައި ކަނޑައަޅާފައިވޭ. އެއީ:

1- ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުން
2- އުމުރުން ދެ އަހަރު ފުރިހަމަނުވާ ކުޑަކުދިން
3- ހިލޭ ނުވަތަ ކޮމްޕްލިމެންޓްރީކޮށް ތިބޭ މީހުން

ބޭރު ފައިސާއާ ބެހޭ ބިލްގައިވާ ގޮތުން ގާނޫނާ އެއްގޮތްވާ ގޮތުގެ މަތިން ރުފިޔާއަށް ނިސްބަތްކޮށް، ބޭރު ފައިސާގެ އެކްސްޗޭންޖު ރޭޓް އޮތޯރިޓީން ކަނޑައަޅައިފި ނަމަ، އެކަން އާންމުކޮށް ޝާއިއު ކުރަން ވާނެއެވެ. އަދި ފައިސާއެއްގެ އެކްސްޗޭންޖް ރޭޓަށް އަންނަ ބަދަލުތައް ވެސް ގަވައިދުން އާންމުކޮށް ޝާއިއު ކުރަން ވާނެ ކަމަށް ބިލްގައި ބުނެފައިވެއެވެ. އޮތޯރިޓީން ކަނޑަނާޅާ ބޭރު ފައިސާއެއްގެ އެކްސްޗޭންޖް ރޭޓް ކަނޑައަޅާނީ އެ މުއާމަލާތް ކުރާ ފަރާތުން ކަމަށް އޭގައިވެއެވެ.

ބިލްގައި ބުނީ ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުގެ ތެރެއިން މީރާގައި ރަޖިސްޓްރީކޮށްފައިވާ ފަރާތްތަކަށް ލިބޭ ބޭރު ފައިސާގެ އާމްދަނީ “ރިއަލައިޒްޑް ޕްރޮސީޑްސް” އެކުގައި އެ މަހަށް ފަހު ހިނގާ ތިން ވަނަ މަހުގެ 28 ވަނަ ދުވަހުގެ ކުރިން ރާއްޖޭގައި ރަޖިސްޓްރީކޮށް ހިންގާ ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޓްރާންސްފާ ނުވަތަ ޖަމާކުރަން ވާނެ ކަމަށެވެ. އޮތޯރިޓީން ހުއްދަ ކުރާ ކޮންމެ ފައިސާއަކުން ވެސް ބޭންކަށް ޖަމާ ކުރެވޭނެ ކަމަށް ބިލްގައިވެއެވެ.