Read Time:3 Minute, 45 Second
އިސްލާމީ ޢަޤީދާގެ މަތީގައި ތިބި، ޤައުމު ދެކެ ލޯބިވާ ދަރިންތަކެއް ބިނާކުރުމަށް އެންމެން ގުޅިގެން މަސައްކަތްކުރުމަށް ރައީސް، ޑރ. މުހައްމަދު މުއިއްޒު އިލްތިމާސްކުރައްވާފައެވެ. ރައީސް މިގޮތަށް އިލްތިމާސް ކުރެއްވީ މާފަންނު މަދަރުސާއަށް 40 އަހަރު ފުރުމުގެ މުނާސަބަތުގައި އިއްޔެ ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވީ، ދިވެހިރާއްޖޭގެ މުސްތަޤުބަލަކީ އުޖާލާ މުސްތަޤުބަލެއް ކަމަށާއި، މިއަދުގެ ރަސްމިއްޔާތުގައި ދަރިވަރުން ހުށަހެޅި ހުށަހެޅުންތަކުން އެކަން ސާބިތުވެއްޖެ ކަމަށެވެ. އަދި މާފަންނު މަދަރުސާގެ ތަރައްޤީއަށް ސަރުކާރުން އެހީތެރިވެދޭނެ ކަމަށް ވިދާޅުވެ، މާލޭ ސިޓީ ކައުންސިލުން ވެސް ސްކޫލަށް އެހީތެރިވުމަށް ގޮވާލައްވާފައިވެއެވެ. މީގެ އިތުރުން، 2025 ވަނަ އަހަރުގެ ތެރޭގައި ސްކޫލުގެ ގްރައުންޑް ފްލޯރގައި އިސްރަށްވެހިންނަށް ފަސޭހައިން ބޭނުންކުރެވޭނެ ހޯލެއް ތަރައްޤީކޮށްދެއްވާނެ ކަމުގެ ޔަޤީންކަން ރައީސް ދެއްވާފައިވެއެވެ. އަދި ޚާއްޞަ އެހީއަށް ބޭނުންވާ ދަރިވަރުންނަށް އިތުރު އަހަންމިއްޔަތުކަމެއް ދެއްވާނެ ކަމަށާއި، އެ ރޮނގުން މުދައްރިސުން ތަމްރީނުކުރުމުގެ މަސައްކަތް 2025 ވަނަ އަހަރު އިތުރަށް ފުޅާކުރައްވާނެ ކަމަށް ވެސް ވިދާޅުވިއެވެ.
ރައީސް އިތުރަށް ވިދާޅުވީ، ކޮންމެ ސްކޫލަކުން ސަރުކާރުގައި ދަތިވާ ކަނކަމަށް އެދިއްޖެނަމަ ރައީސްގެ ސަރުކާރުން އެކަންކަން ކޮށްދެއްވާނެ ކަމަށެވެ. އަދި މާފަނުނު މަދަރުސާއަކީ ވެސް ގައުމަށް ފައިދާހުރި އެތަކެއް ދަރިންނެއް ތައްޔާރުކޮށްދެއްވާފައިވާ ސްކޫލެއްކަން ރައީސް ފާހަގަކުރެއްވިއެވެ. ރަސްމިއްޔާތުގައި ރައީސް ވަނީ މާފަންނު މަދަރުސާއަށް ދިގު މުއްދަތަކަށް ޚިދުމަތްކޮށްދެއްވާފައިވާ މުވައްޒަފުންނަށް ހަނދާނީ ފިލާ ޙަވާލުކޮށްދެއްވާފައެވެ. މާފަންނު މަދަރުސާ ފުރަތަމަ ހުޅުވުނީ 1984 ވަނަ އަހަރުގެ ފެބުރުއަރީ މަހުގެ 15 ވަނަ ދުވަހުއެވެ. މިހާރު މި ސްކޫލަކީ ނާސަރީއާއި ޕްރީ ސްކޫލު ޢުމުރުފުރާގެ ދަރިވަރުންނަށް ޚާއްޞަކުރެވިފައިވާ ސްކޫލެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0