އަންނަ މާޗް މަހު ރާއްޖޭގައި ހެލިކަޕްޓަރު އޮޕަރޭޓް ކުރަން ފެށޭނެ- އަމީން

Read Time:3 Minute, 16 Second

(ފޮޓޯ ކްރެޑިޓްސް: ވަގުތު)

އަންނަ އަހަރުގެ މާޗް މަހުގެ ތެރޭގައި ރާއްޖޭގައި ހެލިކަޕްޓަރު އޮޕަރޭޓް ކުރަން ފެށޭނެ ކަމަށް ދަތުރުފަތުރާއި މަދަނީ އުފުހުންތަކާއި ބެހޭ ވަޒީރު، މުހައްމަދު އަމީން ވިދާޅުވެފައެވެ. “ޕީއެސްއެމް”ގެ ހަފްތާ 52 ޕްރޮގްރާމްގައި ވާހަކަ ދައްކަވަމުން ވަޒީރު ވިދާޅުވީ، ޒަމާނަށް އައި ބަދަލުތަކާއެކީ ވައިގެ ދަތުރުތަކަށް ވެސް ބަދަލު ގެންނަން ޖެހޭ ކަމަށެވެ. އެގޮތުން ފަތުރުވެރިކަމުގެ ދާއިރާއަށް ބެލިއަސް އަދި ބަލި މީހުން އުފުލުމުގައި ވިއަސް މިއަދުގެ ހާލަތަށް ބަލާއިރު، އެންމެ މުހިންމު އެއް ކަމަކީ ސަލާމަތީ ގޮތުން ރައްކާތެރި ހެލިކަޕްޓަރު އޮޕަރޭޝަންތައް ފެށުން ކަމަށް ވަޒީރު ވިދާޅުވިއެވެ.

އެމަސައްކަތް މިހާރު ކުރިއަށްދާއިރު، ކުރިއަށް އޮތް 10 ނުވަތަ 15 ވަރަކަށް ދުވަސް ތެރޭގައި ހެލިކަޕްޓަރު އޮޕަރޭޓް ކުރެވޭ ފަރާތަކާއި އެކީ ސޮއި ކުރުމުގެ މަރުހަލާ ނިމިގެންދާނެ ކަމަށާއި އަންނަ މާޗް މަހާ ހިސާބަށް ދާއިރު، ރާއްޖޭގައި ހެލިކަޕްޓަރު އޮޕަރޭޓް ކުރެވެން ފެށޭނެ ކަމަށް ވަޒީރު ވިދާޅުވިއެވެ. “މިއަންނަ އަހަރުގެ މާޗް ހިސާބަށް ދާއިރު، އިރާދަކުރެއްވިއްޔާ ރާއްޖޭގައި ހެލިކަޕްޓަރު އޮޕަރޭޓް ކުރެވެން ފެށޭނެ.” ވަޒީރު ވިދާޅުވިއެވެ.

ވަޒީރު ވިދާޅުވީ، އެ ބަދަލަކީ އިނގިރޭސިވިލާތުގެ ސީއޭގެ ރިކޮމެންޑޭޝަންސްތަކާއެކީ ކުރެވިގެންދާނެ ކަމެކެވެ. އަދި އެކަމަށް ބޭނުން ކުރާނީ ސަލާމަތީ ގޮތުން ރާއްޖެއަށް އޮޕަރޭޓް ކުރުމަށް އެންމެ ރަނގަޅު ހެލިކަޕްޓަރު ކަމަށް ވެސް ވިދާޅުވިއެވެ. ހެލިކަޕްޓަރު އޮޕަރޭޝަން ފެށުމުގެ ރަށްރަށުން މާލެއަށް ބަލި މީހުން ގެނައުމަށް ދިމާވެފައިވާ ދަތިތަކާއި، ފަތުރުވެރިންނަށް ރޭގަނޑު ދަތުރު ކުރުމުގައި ދިމާވެފައިވާ ދަތިތަކަށް ހައްލު ލިބިގެންދާނެ ކަމަށް ގަބޫލު ކުރައްވާ ކަމަށް ވަޒީރު ވަނީ ވިދާޅުވެފައެވެ.