ދަރަންޏާ ބެހޭ ބިލް މަޖިލީހުން ފާސްކޮށްފި

Read Time:3 Minute, 48 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ދަރަންޏާ ބެހޭ ބިލް ރައްޔިތުންގެ މަޖިލިހުން މިއަދު ފާސްކޮށްފިއެވެ. ސަރުކާރުގެ ފަރާތުން މަޖިލީހަށް އެ ބިލް ހުށަހެޅުއްވީ ފުނަދޫ ދާއިރާގެ ޕީއެންސީގެ މެންބަރު މުހައްމަދު މަމްދޫހެވެ. އެ ބިލް ފާސްކުރުމަށް މިއަދު ވޯޓަށް އެހުމުން ވޯޓުގައި ބައިވެރިވެވަޑައިގެންނެވި 81 މެމްބަރުންގެ އިއްތިފާގުން ބިލް ފާސްކުރަން ވަނީ ވޯޓު ދެއްވައިފައެވެ.

ބިލްގައި ވަނީ އެ ގާނޫނަށް އަމަލުކުރާތާ ހަ މަސް ދުވަހުގެ ތެރޭގައި ޑެޓް މެނޭޖްމެންޓް އޮފީހެއް، މާލީ ވުޒާރާގެ ދަށުން ހިންގަން ފަށަން ވާނެ ކަމަށް ބުނެފައެވެ. އަދި މާލީ ވުޒާރާގެ ދަށުން މިހާރު ހިންގާ ޑެޓް މެނޭޖްމެންޓުގެ ހުރިހާ ޒިންމާތަކާއި މުވައްޒަފުންނާއި މުދަލާއި ވަސީލަތްތަކާއި އިމްތިޔާޒުތައް ޑެޓް މެނޭޖްމެންޓް އޮފީހަށް ބަދަލުވާނެ ކަމަށް ވެސް ބިލްގައިވެއެވެ. އެ އޮފީސް ހިންގާނީ ސިޔާސީ ނުފޫޒުން އެއްކިބާވެ، ޕްރޮފެޝަނަލް ކަމާ އެކުގައި ކަމަށް ވެސް ބިލްގައިވެއެވެ. ނަމަވެސް އެ އޮފީހުގެ ކަންކަމާ ގުޅޭ ގޮތުން ރައްޔިތުންގެ މަޖިލީހަށް ޖަވާބުދާރީ ވާން ޖެހޭނީ މާލީ ވަޒީރު ކަމަށް ވެސް ބުނެފައިވެއެވެ.

އޭގެ އިތުރުން ދައުލަތުގެ ދަރަންޏާ ބެހޭ ބިލުގައި ވަނީ ސޮވްރިން ގެރެންޓީ ދޭގެ ގޮތްތަކާއި ލޯކަލް ކައުންސިލްތަކާއި ސަރުކާރު ހިއްސާވާ ކުންފުނިތަކުން ދަރަނި ނެގުމުގައި އަމަލުކުރާނެ ގޮތްތައް ވެސް ބަޔާން ކޮށްފައެވެ. އަދި ދައުލަތުގެ ދަރަންޏާ ގުޅޭ މައުލޫމާތުތައް އެކްސްޓާނަލް އޮޑިޓަރެއް މެދުވެރިކޮށް އޮޑިޓެއް ހަދަން ޖެހޭނެ ވެސް ބުނެފައިވެއެވެ. ބިލްގައި ވަނީ ދައުލަތުގެ ދަރަނީގެ ސްޓްރެޓެޖީ ރައީސްއަށް ހުށަހަޅައި ކޮންމެ އަހަރެއްގެ ޖުލައި މަހުގެ 15 ކުރިން ފާސް ކުރަން ޖެހޭނެކަމަށެވެ.

މި ބިލް އެޖެންޑާ ކޮށްފައިވާއިރު، މި ސަރުކާރުން އަންނަނީ ހަރަދު ކުޑަކުރުމަށް ގިނަ ފިޔަވަޅުތަކެއް އަޅުވައްވަމުންނެވެ. އެގޮތުން މާލީ ވުޒާރާއިން ވެސް ވަނީ ސަރުކާރުގެ ހަރަދުތައް ކުޑަކޮށް އަދި އާމްދަނީ އިތުރުކުރުމުގެ ފިޔަވަޅުތައް ކުރިއަށް އޮތް ދުވަސްތަކުގައި އަޅަން ނިންމާފައިވާ ކަން ހާމަ ކުރައްވާފައެވެ.