Read Time:4 Minute, 12 Second
(ފޮޓޯ ކްރެޑިޓްސް: ރައްޔިތުންގެ މަޖިލިސް)
ސަރުކާރުގެ ފަރާތުން ރައްޔިތުންގެ މަޖިލިހަށް ހުށަހެޅި އާބަން ޑިވެލޮޕްމަންޓް ބިލް މަޖިލީހުން ފާސްކޮށްފިއެވެ. މި ބިލް ސަރުކާރުގެ ފަރާތުން މަޖިލިހަށް ހުށަހެޅުއްވީ ވިލިނގިލީ ދާއިރާގެ ޕީއެންސީގެ މެމްބަރު އާޒިމް އަބްދުލް އަޒީޒެވެ. މަޖިލީހުގެ މިއަދުގެ ޖަލްސާގައި ވަނީ އެ ބިލް ފާސް ކުރަން ފެނޭތޯ ނެގި ވޯޓުގައި ފެންނަ ކަމަށް 70 މެމްބަރު ވޯޓު ދެއްވިއިރު ފާސްކުރުމަށް ނުފެންނަ ކަަމަށް 11 މެމްބަރު ވޯޓު ދެއްވާފައިވެއެވެ.
މި ބިލުގައި ބަޔާންކޮށްފައިވާ ގޮތުން އާބަން ސަރަހައްދުތައް ކަނޑައެޅުމާއި އާބަން ސަރަހައްދުތައް ތަރައްގީކޮށް ހިންގުމާބެހޭ ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީޙުގެ ލަފާގެ މަތިން ރައީސުލްޖުމްހޫރިއްޔާއެވެ. އަދި މި ސިޔާސަތު ކަނޑައަޅާ އާންމު ކުރަންވާނެ ކަމަށާއި، އަދި ސިޔާސަތު ތަންފީޒުކުރެތޯ ބެލުމުގެ ޒިންމާ އަދާކުރާނީ މިނިސްޓަރު ކަމަށް ބަޔާންކޮށްފައިވެއެވެ. މީގެއިތުރުން އާބަން ސަރަހައްދުތަކުގެ އޭރިޔާ ޑިވެލޮޕްމަންޓް މާސްޓާ ޕްލޭން ތައްޔާރުކޮށް އެފަދަ ސަރަހައްދުތައް ތަރައްގީކުރާ ފަރާތްތަކަށް ތަރައްގީކުރުމުގެ ހުއްދަތައް ދިނުމާއި އެފަރާތްތަކުން އެ ސަރަހައްދުތަކުގައި ކުރިއަށްގެންދާ ތަރައްގީގެ މަސައްކަތްތައް ވިލަރެސްކުރުމަށްޓަކައި “އާބަން ޑިވެެލޮޕްްމަންޓް އޮތޯރިޓީ”ގެ ނަމުގައި ސަރުކާރުގެ އިދާރާއެއް އުފެދޭނެ ކަމަށް ބަޔާންކޮށްފައިވެއެވެ.
ރާއްޖޭގައި 7 އާބަން ސެންޓަރުތައް ގާއިމުކުރުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. އާބަން ޑިވެލޮޕްމަންޓް ރީޖަނެއްގައި އެއް އާބަން ސެންޓަރަށްވުރެ ގިނަ އާބަން ސެންޓަރުތަކެއް ހިމެނިދާނެ ކަމަށާއި އާބަން ސެންޓަރުތަކުގެ މައްޗަށް އާބަން ރީޖަން އެއް ބިނާވެ އުފެދިގެން އަންނާނެ ކަމަށް ސަރުކާރުން މީގެ ކުރިން ވަނީ ވިދާޅުވެފައެވެ. އަދި އެ ރީޖަނެއްގައި ހިމެނޭ ރަށްރަށުގައި ދިރިއުޅޭ އާބާދީ ޖުމްލަކުރުން 50،000 އަށް ވުރެ އާބާދީ ދަށް ނުވާނޭ ގޮތްތަކެއް ބަލައިގެން މިކަންކަން ކުރިޔަށް ގެންދާނެ ކަމަށާއި މި އާބާދީ ކުރިޔަށް އޮތް 2033 ވަނަ އަހަރާ ހަމަޔަށްދާއިރު އިތުރަށް ފުޅާކޮށް ދެގުނައަށް ހެދުމަށް ސިޔާސަތުތަކެއް އެކަށައަޅައިގެން ކުރިޔަށް ގެންދަން ނިންމާފައިވާ ކަމަށް ރައީސް އޮފީހުން މީގެ ކުރިން ވަނީ ވިދާޅުވެފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0