ޒަކާތު ފަންޑުގެ އެހީގައި މި އަހަރު ބޯންމެރޯއަށް 8 މިލިއަން ރުފިޔާ ހަރަދު ކޮށްފި

Read Time:3 Minute, 51 Second

ފޮޓޯ ކްރެޑިޓްސް: ވަގުތު

ޒަކާތު ފަންޑުގެ ހަރަދުގައި ބޯންމެރޯ ޓްރާންސްޕްލާންޓް ހެދުމަށް މި އަހަރު 8 މިލިއަން ރުފިޔާ ހަރަދު ކޮށްފައިވާ ކަމަށް އެންސްޕާއިން ވިދާޅުވެއްޖެއެވެ. މި ސަރުކާރުން ބޯން މެރޯ ހެދުމަށް މި އަހަރު ތެރޭގައި ރާއްޖެއިން ބޭރަށް ފޮނުވީ 14 ކުދިންނެވެ. މިއަހަރުތެރޭ ބޯން މެރޯ ހަދަން މި ސަރުކާރުން ފޮނުވި ކުދިންގެ ތެރެއިން 1 ކުއްޖަކު ނިޔާވެފައިވާއިރު، 3 ކުއްޖަކު އެއްކޮށް ފަރުވާ ނިމި ބަލިން ފަސޭހަވެފައި ވެއެވެ. އެންސްޕާއިން މިއަދު އާއްމު ކުރި މައުލޫމާތަށް ބަލާއިރު، ބޯންމެރޯއަށް ފޮނުވި ކުދިންގެ ތެރެއިން ޓްރާންްސްޕްލާންޓް ނިމިފައި ވަނީ އަށް ކުދިންނެވެ. އަދި ބޯންމެރޯ ޓްރާންސްޕްލާންޓް ކުރަމުންދާ ކުދިންގެ އަދަދަކީ 5 އެވެ.

މިކަންކަމަށް މިހާތަނަށް 8 މިލިއަން ރުފިޔާ ޒަކާތު ފަންޑުން ހަރަދު ކޮށްފައި ވެއެވެ. ސަރުކާރުން ނިންމަވާފައިވާ ގޮތުގައި، ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން ބޯންމެރޯ ހެދުމަށް ރާއްޖެއިން ބޭރަށް ފޮނުވާނެއެވެ. މި ޕްރޮގްރާމްގެ ދަށުން އަންނަ އަހަރު ފޮނުވާ 10 ކުދިން ކަނޑައެޅުމުގެ މަސައްކަތް މިހާރު ވަނީ ފަށާފައެވެ. ބޯންމެރޯ ހަދަން އެދި ހުށަހަޅާފައިވާ ކުދިންގެ ތެރެއިން، ސިއްޙީ ޙާލަތު ތަންދޭ ކުދިން ދެނެގަތުމަށް ބޭނުންވާ ޓެސްޓުތައް ހެދުމުގެ މަސައްކަތް މިހާރު ދަނީ ކުރަމުންނެވެ. ކުދިންނަށް އެހީތެރިވުމަށް ސަރުކާރުން ފަށާފައިވާ މުހިންމު މަޝްރޫއެކެވެ. ޒަކާތު ފަންޑުގެ އެހީގައި މި ޕްރޮގްރާމް ހިންގުމަށް ނިންމުމަކީ، އިސްލާމީ އުސޫލުތަކާ އެއްގޮތަށް، މުޖުތަމައުގެ ބޭނުންތެރި ދާއިރާތަކަށް ޒަކާތުގެ ފައިސާ ބޭނުންކުރުމަށް ފެށި މަސައްކަތެކެވެ.

މި ޕްރޮގްރާމްގެ ސަބަބުން، ގިނަ އަދަދެއްގެ ދިވެހި ކުދިންނަށް އެކުދިންގެ ފުރާނަ ސަލާމަތްކުރުމަށް ބޭނުންވާ މުހިންމު ފަރުވާ ލިބިގެންދާނެއެވެ. އަދި މީގެ ސަބަބުން އެ ކުދިންގެ އާއިލާތަކަށް ލުޔެއް ލިބި، ޤައުމީ ފެންވަރުގައި ސިއްހީ ދާއިރާ ކުރިއެރުވުމަށް މަގުފަހިވެގެންދާނެއެވެ. ފަރުވާ ހޯދުމަށް ބޯން މެރޯ އޮޕަރޭޝަން ކުރުމަށްފަހު 3-6 މަހުގެ މުއްދަތަކަށް ރާއްޖެއިން ބޭރުގައި ތިބެން ޖެހެއެވެ.