ނަޝާތާއި އާސިފް ވަކި ކުރިއިރު، ޒާހިރު ވަކިކުރަން ފާހެއް ނުވި!

Read Time:6 Minute, 3 Second

އިލެކްޝަންސް ކޮމިޝަންގެ ނައިބު ރައީސް އަލީ ނަޝާތު، (ކ) އަދި އެ ކޮމިޝަންގެ މެމްބަރު ޒާހިރާއި އާސިފް.

މިދިޔަ އަހަރުގެ ރިޔާސީ އިންތިޚާބުގެ ޑޭޓާބޭސްއިން މައުލޫމާތު ނަގައިގެން އެޕްލިކޭޝަންތައް ވިއްކުމާއި ރީ-ރަޖިސްޓްރޭޝަން އޮޅުވާލުމުގެ ސީރިއަސް ތުހުމަތުތަކެއް ކުރެވުނު އިލެކްޝަންސް ކޮމިޝަން (އީސީ) ގެ ބައެއް މެމްބަރުން ވަކިކުރަން ރައްޔިތުންގެ މަޖިލިހުން މިއަދު ފާސްކޮށްފިއެވެ. އިލެކްޝަންސް ކޮމިޝަންގެ ނައިބު ރައީސް އަލީ ނަޝާތާއި އެ ކޮމިޝަންގެ މެމްބަރުންގެ ގޮތުގައި ތިއްބެވި މުހައްމަދު އާސިފް، އަދި ޑރ. މުހައްމަދު ޒާހިރު ވަކިކުރަން މަޖިލިހުގެ މިނިވަން މުއައްސަސާތަކުގެ ކޮމިޓީން ފާސްކޮށް، އެ ކޮމިޓީގެ ރިޕޯޓު މަޖިލިހަށް ވަނީ ހުށަހަޅައިފައެވެ. މަޖިލިހުގެ ތަޅުމުގައި ނެގި ވޯޓުގައި ޒާހިރު ފިޔަވައި ޒާހިރު ފިޔަވައި ދެން ތިއްބެވި ދެ ބޭފުޅުން ވަކިކުރަން މަޖިލިހުން ވަނީ ފާސްކޮށްފައެވެ.

އެގޮތުން ނަޝާތު ވަކިކުރަން ފެނޭތޯ ނެގި ވޯޓުގައި މަގާމުން ވަކިކުރަން ފެންނަ ކަމަށް ވޯޓު ދެއްވީ 69 މެމްބަރުންނެވެ. މަގާމުގައި ބަހައްޓަން ފެންނަ ކަމަށް ވޯޓު ދެއްވީ 10 މެމްބަރުންނެވެ. އާސިފް މަގާމުން ވަކިކުރަން ފެންނަ ކަމަށް 68 މެމްބަރުން ވޯޓު ދެއްވިއިރު، 10 މެމްބަރުން ވޯޓު ދެއްވީ އޭނާ މަގާމުގައި ބެހެއްޓުމަށެވެ. ޒާހިރު މަގާމުން ވަކިކުރަން ފެނޭތޯ ނެގި ވޯޓުގައި 70 މެމްބަރުން ވޯޓު ދެއްވީ އޭނާ މަގާމުގައި ބަހައްޓަން ފެންނަ ކަމަށެވެ. ތިން މެމްބަރުންގެ މައްޗަށް ކުރި 19 ތުހުމަތުގެ ތެރޭގައި، އިލެކްޝަންސް ކޮމިޝަނުގެ ޑޭޓާ ބޭސްއިން މައުލޫމާތު ނަގައިގެން އެޕްލިކޭޝަންތައް ހަދައި ސިޔާސީ ޕާޓީތަކަށް ވިއްކުމާއި، ވަކި ޕާޓީއަކަށް އިންތިހާބު ކާމިޔާބުކޮށްދިނުމަށް މަސައްކަތްކުރި ކަމުގެ ތުހުމަތު ހިމެނެއެވެ. އަދި ރިޔާސީ އިންތިހާބުގެ ދުވަސްވަރު ރީ ރަޖިސްޓްރޭޝަން އޮޅުވާލުމުގެ ތުހުމަތާއި ވަކި ސިޔާސީ ޕާޓީއެއް އުވާލުމުގެ މަގުސަދުގައި ވަގު ފޯމު ހެދުމާއި، އެ ޕާޓީއަށް 3،000 މެމްބަރުން ހަމަވިޔަ ނުދިނުމަށް މަސައްކަތްކުރި ކަމުގެ ތުހުމަތު ކުރިއެވެ.

މީގެއިތުރުން އީސީއަށް ބޭނުންވާ ކޮމްޕިއުޓާ ސިސްޓަމްތަކެއް ވަކި ވިޔަފާރި ކުންފުންޏެއް މެދުވެރިކޮށް ހޯދުމާއި ސިންގަލް ސޯސް ޕްރޮކިއުމެންޓް އުސޫލުން އެ މެންބަރުންނާ ގުޅުން އޮންނަ ވިޔަފާރިކުރާ ފަރާތެއްގެ ކުންފުނިން ބައެއް ތަކެތި ހޯދުން ވެސް ހިމެނެއެވެ.

އަދި އީސީގެ މުވައްޒަފުންނާ މުއާމަލާތްކުރުމުގައި އިހްތިރާމް ކުޑަކޮށް އަދި ބޭއަދަބީ ބަހުން ނަޝާތު މުއާމަލާތް ކުރެއްވުމާއި ކޮރަޕްޝަނަކީ މައްސަލައެއް ނޫން ކަމަަށް ވިދާޅުވެ، ފައިސާއަށްޓަކައި ވޯޓު ވިއްކާނެކަމުގެ ވާހަކަ ދައްކަވައި އެ ކަންކަމަކީ މައްސަލައެއް ނޫން ކަން ދޭހަވާ މޭރުމުން މެމްބަރުން ވާހަކަ ދައްކަވާ ކަމަށް ތުހުމަތުކޮށްފައިވެއެވެ. ނަޝާތު، އީސީގެ ބައެއް މުވައްޒަފުން ކޮންޓްރޯލްކޮށްގެން ގެންގުޅުއްވައި އެ މުވައްޒަފުންގެ ކެއުން ހަމަޖައްސައި ދެއްވައި އެ މުވައްޒަފުންނަށް މަންފާ ހޯއްދަވާ ކަމުގެ ތުހުމަތު ވެސް ކޮށްފައިވެއެވެ. ކޮމިޝަންގެ ބައެއް މުވައްޒަފުންނާއި ނަޝާތު ލޯބީގެ ގޮތުން ގުޅުން ބޭއްވިކަމުގެ ތުހުމަތު ވެސް ކުރިއެވެ.

ހަމައެއާއެކު، ބިޑް ކޮމިޓީގެ މެމްބަރުންނަށް ބިރު ދެއްކެވުމާއި ކޮރަޕްޝަންގެ އަމަލުތަކުގައި ބައިވެރިނުވާ މުވައްޒަފުންނަށް ވެސް ބިރު ދެއްކި ކަމަށް އޭގައިވެއެވެ.