އިސްރާއީލްގެ ޕާސްޕޯޓް މަނާކުރުމާ މެދު ފަލަސްތީނާއި އަރަބި ގައުމުތަކުގެ ލަފާ ހޯދަންޖެހޭ: ފަލާހް

Read Time:4 Minute, 4 Second

އިސްރާއީލް ޕާސްޕޯޓްގައި ރާއްޖެއަށް އެތެރެވުން މަނާކުރުމުގެ މައްސަލައިގައި ފަލަސްތީނާއި އަރަބި ގައުމުތަކުގެ ލަފައެއް ހޯދަންޖެހޭ ކަމަށް އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕްގެ ލީޑަރު އިބްރާހިމް ފަލާހް ވިދާޅުވެއްޖެއެވެ. ފަލާހް މިހެން ވިދާޅުވީ އިސްރާއީލް ޕާސްޕޯޓް މަނާކުރުމުގެ މައްސަލައިގައި ސަލާމަތީ ހިދުމަތްތަކާއި ބެހޭ ކޮމިޓީގައި ވާހަކަދައްކަވަމުންނެވެ. ފަލާހް ވިދާޅުވީ އިސްރާއީލް ޕާސްޕޯޓުގައި ރާއްޖެއަށް އެތެރެވުން މަނާކުރުމަކީ ވަރަށް މުހިންމު އިސްލާހެއް ކަމަށެވެ. އަދި ފަލަސްތީނުގެ ރައްޔިތުންނާ މެދު އިސްރާއީލުން ހިންގަމުންގެންދަނީ ވަރަށް ވަރުގަދަ ލާއިންސާނީ، އަނިޔާވެރި ގަތުލްއާންމުގެ އަމަލުތަކެއްކަން ފާހަގަކުރެއްވިއެވެ.

މި މައްސަލައިގައި ފަލަސްތީނުގެ ބަހެއް ހޯދަން ޖެހޭކަން ފަލާހް ފާހަގަކުރެއްވެވިއެވެ. އަދި ރާއްޖެއަށް އިސްރާއީލް ރައްޔިތުން އައުން މަނާ ކުރުމުން ފަލަސްތީނުން ބޭނުންވާނަމަ އެ ގައުމަށް އެކަމުގައި ކިހާ މަންފާއެއް، ފައިދާއެއް ހުރިތޯ ނުވަތަ ލިބޭނެ ހިތްހަމަޖެހުމާއި އުފާވެރިކަން އޮތްތޯ ބަލަން ޖެހޭ ކަމަށް ވިދާޅުވިއެވެ. “ފަލަސްތީނުގެ އިތުރުން، މި މައްސަލައިގައި އަރަބި އެހެން ގައުމުތަކާއި ދުނިޔޭގެ ބޮޑެތި އެހެން ގައުމުތަކުގެ ކަމާ ގުޅުން ހުރި އިދާރާތަކުގެ ލަފާ ވެސް ހޯދަން ޖެހޭ. އެއީ އިސްރާއީލްގައި ވެސް އެތައް ސަތޭކަ މުސްލިމުން ވެސް އެބަ އުޅޭ. އިސްރާއީލް ޕާސްޕޯޓު މަނާ ކުރާއިރު މިއީ އަވަސް އަރުވާލައިގެން ނިންމޭ ކަހަލަ މައްސަލައެއް ނޫން. އެހެންވީމާ ވަރަށް ފުޅާ ދާއިރާއެއްގައި މި މައްސަލަ ދިރާސާކޮށްފައި ނޫނީ ގޮތެއް ނިންމައިގެން ނުވާނެ.” ފަލާހް ވިދާޅުވިއެވެ.

އިސްރާއީލް ޕާސްޕޯޓް މަނާކުރުމަށް ނިމިދިޔަ އެމްޑީޕީ މެޖޯރިޓީ މަޖިލީހުގައި ވެސް ހުށަހެޅި ކަމަށާއި ނަމަވެސް ސަރުކާރު ނިމިގެން ދިޔައިރު އެކަމުގައި ގޮތެއް ނުނިންމުނު ކަމަށް އޭނާ ވިދާޅުވިއެވެ. އެއީ ކޮންމެވެސް ސަބަބެއް އޮތުމުން ކަމަށް ފަލާހް ވިދާޅުވިއެވެ. ފަލާހް ވިދާޅުވީ އިސްރާއީލް ޕާސްޕޯޓް މަނާކުރުމަކީ ސިޔާސީ ގޮތުން ގައުމަށް ގެއްލުން ހުރި ކަމަކަށް ވެގެން ނުވާނެ ކަމަށެވެ. އެހެންކަމުން އެކަމާ މެދު ފުޅާ ދާއިރާގައި މަޝްވަރާ ކުރަން ޖެހޭ ކަމަށެވެ.