ކޮރަޕްޝަންގެ މައްސަލަތައް އޭސީސީން ބަލަނީ މަސައްކަތް ކުރަން ޖެހޭ ސްޕީޑަކު ނޫން: ނާޒިމް

Read Time:4 Minute, 8 Second

ކޮރަޕްޝަންގެ މައްސަލަތައް އެންޓި ކޮރަޕްޝަން ކޮމިޝަން (އޭސީސީ) އިން ބަލަނީ މަސައްކަތް ކުރަން ޖެހޭ ސްޕީޑަކު ނޫން ކަމަށް ރައްޔިތުންގެ މަޖިލިހުގެ ނައިބު ރައީސް، ދިއްގަރު ދާއިރާގެ ޕީއެންސީގެ މެމްބަރު އަހުމަދު ނާޒިމް މިއަދު ވިދާޅުވެއްޖެއެވެ. އޭސީސީ އާއި އިލެކްޝަންސް ކޮމިޝަން (އީސީ) ގެ ރައީސް އައްޔަން ކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް އެ ދެ ކޮމިޝަންގެ ގާނޫނަށް ސަރުކާރުގެ ފަރާތުން އިސްލާހު ގެނައުމަށް ރައްޔިތުންގެ މަޖިލީހަށް ހުށަހެޅި ބިލު، މިނިވަން މުއައްސަސާތަކުގެ ކޮމިޓީން ވަނީ ފާސްކޮށްފައެވެ. ކޮމިޓީ ރިޕޯޓަށް މިއަދު ބަހުސް ކުރައްވަމުން ނާޒިމް ވިދާޅުވީ ކޮރަޕްޝަންގެ ކަންކަން ރާއްޖޭގައި އަށަގެންފައިވާ މިންވަރުން އެކަންކަން ހައްލުކުރުމަށް އެންމެ ބޮޑު ޒިންމާއެއް އެޅިފައިވަނީ އޭސީސީގެ ބޮލުގައި ކަމަށެވެ.

” އެންމެ ފުރަތަމަ ގާނޫނުއަސާސީ ވުޖޫދަށް އައިސްގެން އެކުލަވާލެވުނު އޭސީސީގެ މަސައްކަތުގައި އުޅުނިން. އޭގެ ފަހުން އައި ކޮމިޝަންތަކެއްގައި އެ މަސައްކަތް ކުރެވިފައެއްނުވޭ. އެހެންވީމަ މި ކުރާ މަސައްކަތަކީ ކޮމިޝަންގެ މަސައްކަތް އަލުން ހިނގައިގަނެވޭނެ ގޮތަކަށް ކަންކުރުން.” ނާޒިމް ވިދާޅުވިއެވެ. މި ސަރުކާރު އައި ފަހުން ކޮރަޕްޝަންގެ ކަންކަން ނައްތާލުމަށް ވަރަށް ގިނަ މަސައްކަތްތަކެއް ކުރެވެމުންދާ ކަން ފާހަގަކުރައްވަމުން ނާޒިމް ވިދާޅުވީ ހާއްސަކޮށް ޔުނިފޯމް އަޅާ މުވައްސާތަކުގައި ކޮރަޕްޝަން ނައްތާލުމުގެ މަސައްކަތްތައް ފާހަގަކުރެވޭ ކަމަށެވެ.

” ދާދި ފަހުން ވަނީ ކަރެކްޝަންސްގެ ކޮރަޕްޝަންގެ މައްސަލަތަކެއް ބަލައި އެ މައްސަލަތައް ޝަރީއަތަށް ފޮނުވާފައި. މިހާރު ވެސް ފުލުހުންގެ ތެރޭގައި ވެސް އޮޑިޓް ކުރުމުގެ މަސައްކަތް އޮޑިޓާ ޖެނެރަލް ކުރައްވަމުން ގެންދަވަނީ. އަދި ކަސްޓަމްސްގެ ކަންކަން ވެސް ދަނީ ވަރަށް ގާތުން ބަލަމުން. އެހެންވީމަ އެ ކަންތައްތައް ހަމަޔަކަށް އެޅުވުމަށް ކޮމިޝަންތައް ހަމަޔަކަށް އަޅުވަން ޖެހޭ. އަދި އެތަނުގެ ރައީސް އާއި ނައިބު ރައީސް ބަދަލުކުރަން ގެންދަނީ ހުރިހާ ކޮމިިޝަންތަކުގައި ވެސް ގެންދާ އުސޫލުން.” ނާޒިމް ވިދާޅުވިއެވެ. ނާޒިމް ވިދާޅުވީ ކޮރަޕްޝަންގެ މައްސަލަތަށް ބެލުމުގައި މަސައްކަތް ކުރަން ޖެހޭ ސްޕީޑްގައި އޭސީސީއިން މަސައްކަތް ކުރަމުންނުދާ ކަމަށެވެ.