ރާއްޖޭގެ ކަނޑުގެ ސަރަހައްދުން އަތުލައިގަތް ބޯޓަކުން 468.6 ކިލޯގެ ޑްރަގް ފެނިއްޖެ

Read Time:4 Minute, 35 Second

ފޮޓޯ ކްރެޓްސް: ވަގުތު

ރާއްޖޭގެ ކަނޑުގެ ސަރަހައްދުން އަތުލައިގަތް ސްރީ ލަންކާ މަސް ބޯޓަކުން 468.6 ކިލޯގެ މަސްތުވާތަކެތި ފެނިއްޖެއެވެ. އިސްކަންދަރު ކޮށީގައި މިހާރު ކުރިއަށްގެންދާ ނޫސްވެރިންގެ ބައްދަލުވުމެއްގައި ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ، ހދ. މަކުނުދޫގެ ބޭރުން ލަންކާ މަސް ބޯޓެއް ކަމަށް ބެލެވޭ ބޯޓެއް ހުއްޓުވާ ކޯސްޓް ގާޑުގެ ބެލުމުގެ ދަށުން ހދ. ކުޅުދުއްފުށި ބަނދަރަށް ގެންދިޔަ ކަމަށް ރޭ ދަންވަރު 12:45 ހާއިރު އެމްއެންޑީއެފް އިން ފުލުހުންނަށް މައުލޫމާތު ދީފައިވާ ކަމަށެވެ. މި ބޯޓުގައި އެވަގުތު ލަންކާއަށް ނިސްބަތްވާ ފަސް މީހަކު ތިބިއިރު، އެއީ ފިރިހެނުންނެވެ.

“މިއީ މި ސަރަަހައްދުގައި މިގޮތަށް މޫވް ކުރާ ޝައްކު އުފެދޭ އުޅަނދުތަކުގެ މައުލޫމާތު އެކި ގޮތްގޮތުން އަޅުގަނޑުމެންނަށް ލިބޭ، ހަމަ އެގޮތުން އެމްއެންޑީއެފްއަށް ލިބުނު މައުލޫމާތެއްގެ ތެރެއިން ވެސަލްއެއް މިއީ،”. އޭނާ ވިދާޅުވިއެވެ.

ފޮޓޯ ކްރެޓްސް: ވަގުތު

ޝުޖާއު ވިދާޅުވީ، މިއަދު ހެނދުނު 9:30 ގައި އެމްއެންޑީއެފްގެ ކޯސްޓްގާޑުގެ ބޭފުޅުންނާއެކު، ކުޅުދުއްފުށި ސިޓީ ޕޮލިސްގެ ފުލުހުން، މި އުޅަނދު ބަލާ ފާސް ކުރުމުން ޖުމްލަ 468.6 ކިލޯގެ މަސްތުވާތަކެތި ކަމަށް ޝައްކު ކުރެވޭ ތަކެތި ފެނިފައިވާ ކަމަށެވެ. “މި ތަކެތި އަޅުގަނޑުމެން ޕްރިމިލިނަރީ ނަތީޖާތައް ޓެސްޓުތަކުން ދައްކާގޮތުގައި، މީގެ ތެރޭގައި 344 ކިލޯގެ މެތް، އަދި 124.6 ކިލޯގެ ކޮކެއިން ފެނިފައިވޭ، މި މައްސަލަ ޑްރަގް އެންފޯސްމެންޓާއި ކުޅުދުއްފުށީ ޕޮލިސް ގުޅިގެން ދަނީ ތަހުގީގު ކުރަމުން،”. ޝުޖާއު ވިދާޅުވިއެވެ. ޝުޖާއު ވިދާޅުވީ، މިއީ ރާއްޖެއަށް އެތެރެވާ މަސްތުވާތަކެތި ހުއްޓުވުމަށްޓަކައި އެކި އެޖެންސީތައް ގުޅިގެން ކުރެވުނު މަސައްކަތްތަކުގެ ތެރެއިން ކާމިޔާބު މަސައްކަތެއް ގޮތުގައި ފާހަގަކުރާ ކަަމަށެވެ. އޭނާ ވިދާޅުވީ، މި މައްސަލައިގައި އިތުރަށް ތަހުގީގު ކުރިއަށްދާ ވަރަކުން، ހިއްސާ ކުރަން ޖެހޭ މައުލޫމާތު ހިއްސާ ކުރަމުން ގެންދާނެ ކަމަށެވެ.

ޝުޖާއު ވިދާޅުވިގޮތުގައި މިއީ އެއް ބިލިއަން ރުފިޔާގެ މަސްތުވާތަކެއްޗެވެ. ޝުޖާއު ވަނީ، މި މަސްތުވާތަކެއްޗާއި ދިވެހިންނާއި ނޫނީ ދިވެހި ބަޔަކާއި ގުޅޭތޯ އަދި ދަންނަވަން ދަތި ކަން ހާމަ ކުރައްވާފައެވެ. “ވަރަށް އާލީ ސްޓޭޖެއްގައި މި ދަނީ، އެހެންވީމަ މިކަމަށް އެއްޗެއް ދަންނަވަން އަދި ދަތި، އެ މައުލޫމާތު އަދި ހޯދުމުގެ މަސައްކަތް އަޅުގަނޑުމެން ކުރަމުން މި ދަނީ،”. ޝުޖާއު ވިދާޅުވިއެވެ. މިއީ މިހާތަނަށް އަތުލައިގަނެވުނު އެންމެ ގިނަ އަދަދެއްގެ ޑްރަގް ޝިޕްމެންޓްކަން އަދި ކަށަވަރެއް ނޫނެވެ.