ރަޝިޔާއިން ހަމަލާދީފާނެތީ ޔޫކުރެއިންގެ ގާނޫނު ހަދާ މަޖިލީހުގެ ބައްދަލުވުން ކެންސަލް

Read Time:4 Minute, 7 Second

ރަޝިޔާގެ ހަމަލާއެއް އަމާޒުވެދާނެ ކަމުގެ ބިރަށް މިދިޔަ ހުކުރު ދުވަހު ބާއްވަން ތާވަލުކުރި ޔޫކުރެއިންގެ ގާނޫނު ހަދާ މަޖިލީހުގެ ބައްދަލުވުމެއް ކެންސަލްކޮށްފިއެވެ.ރަޝިއާއާއި ޔޫކްރެއިނުން ކުރަމުން އަންނަ ހަނގުރާމަ އިތުރަށް ފުޅާވެފައިވާއިރު ރަޝިއާއިން ވަނީ މިސައިލް ހަމަލާތައް ވަރުގަދަކޮށްފައެވެ. އެގޮތުން އަޑަށް ވުރެ ބާރަށް ދަތުރުކުރާ ހައިޕާސޮނިކް ބެލެސްޓިކް މިސައިލުތައް ބޭނުންކޮށްގެން ރަޝިއާއިން ވަނީ ޔޫކްރެއިންގެ ޑްނީޕްރޯއަށް މިދިޔަ ބުރާސްފަތި ދުވަހު ހަމަލާދީފައެވެ.

އެ ހަމަލާތަކާ ހެދި މިދިޔަ ހުކުރު ދުވަހު ބާއްވަން ތާވަލު ކުރި ޔޫކްރެއިންގެ ގާނޫނު ހަދާ މަޖިލީހުގެ ޕްލޭނަރީ ސެޝަނެއް ވަނީ ކެންސަލްކޮށްފައެވެ. ގާނޫނު ހަދާ މަޖިލީހުގެ މެމްބަރުންގެ ފުރާނައަށް ނުރައްކާ އޮތް ކަމަށް ބުނެ އެ ބައްދަލުވުން ފަސްކުރީ މި ހަފްތާއަށެވެ. ރަޝިއާއިން ހައިޕާސޮނިކް މިސައިލްތައް އަލަށް ބޭނުންކުރަން ނިންމާފައިވާއިރު އެފަދަ މިސައިލްތަކުން ޔޫކްރެއިންގެ ވެރިރަށް ކީވްއަށް ހަމަލާދީފާނެކަމުގެ ބިރު އޮތުމުން އެ ސިޓީ ވަނީ ކުއްލި ހާލަތަށް ގެނެސްފައެވެ. ރަޝިއާގެ މިސައިލެއް އަމާޒުވެދާނެކަމުގެ ބިރަށް ޔުކްރެއިންގެ މަޖިލިސް ކެންސަލް ކުރުމުގެ އިތުރުން ކީވްގައި ހުންނަ ބޭރު ގައުމުތަކުގެ އެމްބަސީތައް ވެސް ވަނީ ބަންދުކޮށްފައެވެ. ރަޝިއާއިން އިތުރު މިސައިލް ހަމަލާއަކަށް ތައްޔާރުވަމުން އަންނައިރު، ޔޫކްރެއިނުން ވަނީ މިދިޔަ ހަފުތާގައި އެމެރިކާއިން އެ ގައުމަށް ފޯރުކޮށްދިން ދިގު ރާސްތާ މިސައިލްގެ އިތުރުން އިނގިރޭސިވިލާތުގެ މިސައިލުތައް ވެސް ރަޝިއާއަށް ފޮނުވާލައިފައެވެ.

ޔޫކްރޭނުން އެމެރިކާގެ މިސައިލުތައް ބޭނުންކޮށްފައިވާއިރު އެ މިސައިލު އޮޕަރޭޓުކުރުމުގައި ހަރަކާތްތެރިވެފައިވަނީ ވެސް އެމެރިކާ ސިފައިން ކަމަށް ރަޝިޔާއިން ތުހުމަތުކުރެއެވެ. އެ ހަމަލާއަށްފަހު ރަޝިއާއިން ވަނީ ހުޅަނގުން އެ ހަނގުރާމައިގައި ރަސްމީކޮށް ބައިވެރިވުމާއެކު ރަޝިއާއިން ވެސް ދޭ ހަމަލާތައް ނުރައްކާވާނެ ކަމަށް ބުނެފައެވެ. އެމެރިކާގެ ދިގު ރާސްތާ މިސައިލުތައް ބޭނުންކުރަން ފަށައިފިނަމަ ނޭޓޯއާއި އެމެރިކާއާ ދެކޮޅަށް ހަނގުރާމަ ކުރާނެ ކަމުގެ އިންޒާރު މީގެ ކުރިން ރަޝިއާގެ ރައީސް ވްލެޑްމިއާ ޕޫޓިން ވަނީ ދެއްވައިފައެވެ.