ޕްރައިމަރީ ބާއްވަން ނުޖެހޭނެ، ޓިކެޓު ރައީސް މުއިއްޒަށް ލިބިވަޑައިގަންނަވާނެ: އަބްދުއްރަހީމް

Read Time:4 Minute, 52 Second

ކުރިއަށް އޮތް ރިޔާސީ އިންތިހާބުގައި މިހާރު ވެރިކަން ކުރާ ޕީއެންސީ ވާދަކުރައްވާނެ ކެންޑިޑޭޓަކު ކަނޑައަޅަން ޕްރައިމަރީއެއް ބާއްވަން ޖެހޭ ހާލަތެއް ނެތް ކަމަށާއި ރައީސް ޑރ. މުއިއްޒު ދެވަނަ ދައުރަކަށް ވާދަކުރައްވަން ބޭނުންފުޅު ނަމަ، އެމަނިކުފާނަށް ޓިކެޓު ލިބިވަޑައިގަންނަވާނެ ކަމަށް ރައްޔިތުންގެ މަޖިލިހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެއެވެ. ޕީއެންސީގެ އެތެރޭގެ އިންތިހާބަށް ފަހު ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ ޕީއެންސީގެ އަސާސީ ގަވާއިދުގައިވާ ގޮތުން ހިނގަމުން އަންނަ ވެރިކަމުގައި އެ ޕާޓީގެ މެމްބަރަކު ރައީސްގެ މަގާމުގައި ހުންނެވި ނަމަ އެ ބޭފުޅަކަށް ޕްރައިމަރީއަކާ ނުލައި ދެވަނަ ދައުރަކަށް ލިބިވަޑައިގަންނަވާނެ ކަމަށެވެ. އެހެންވެ، މިއީ ޕްރައިމަރީ ބާއްވަން ޖެހޭ ހާލަތެއް ނޫން ކަމަށް ވެސް އަބްދުއްރަހީމް ވިދާޅުވިއެވެ.

އެ އުސޫލުން ބަލާ ނަމަ ޕީއެންސީގެ 2028 ގެ ރިޔާސީ ޓިކެޓު ލިބިވަޑައިގަންނަވާނީ ރައީސް މުއިއްޒަށް ކަމަށް އަބްދުއްރަހީމް ވިދާޅުވިއެވެ. “އަޅުގަނޑުމެންގެ އަސާސީ ގަވާއިދު ބުނަނީ ޕީއެންސީގެ ޓިކެޓުގައި ނިކުމެވަޑައިގެން ރާއްޖޭގެ ވެރިކަމަށް އަންނަވާ ބޭފުޅަކު އެ މަގާމުގަ ހުންނަވާ ދެވަނަ ދައުރަކަށް ކުރިމަތިލައްވަން ބޭނުންފުޅު ވަންޏާ ރިޔާސީ ޕްރައިމަރީ އަކާ ނުލާ އެ ޓިކެޓު އެ ބޭފުޅަކަށް ލިބިވަޑައިގަންނަވާނެ ކަމަށް،” އަބްދުއްރަހީމް ވިދާޅުވިއެވެ. “އެހެންވެ އެއީ ޕްރައިމަރީ ބާއްވަން ޖެހޭ ކަމެއް ނޫން،” އަބްދުއްރަހީމް ވިދާޅުވި ގޮތުގައި އެމަނިކުފާނު މަސައްކަތް ކުރައްވަނީ ރާއްޖޭގައި ދެވަނަ ދައުރެއް ފުރިހަމަ ކުރައްވާ ފުރަތަމަ ރައީސަކަށް ރައީސް ޑރ. މުއިއްޒު ހެދުމަށެވެ. އަބްދުއްރަހީމް އެގޮތަށް ވިދާޅުވި ކަމުގައި ވިޔަސް، ދެވަނަ ދައުރަކަށް ކުރިމަތިލެއްވުމާ މެދުގައި ރައީސް ޑރ. މުއިއްޒު އަދި ވަކި އެއްޗެއް ވިދާޅެއް ނުވެއެވެ. އަދި މިހާތަނަށް އައިއިރު، އެކަމާ ގުޅޭ ގޮތުން އެއްވެސް ވާހަކަފުޅެއް ވެސް ނުދައްކަވައެވެ.

އަބްދުއްރަހީމް ވަނީ ކުރިއަށް އޮތް ރިޔާސީ އިންތިހާބުގައި ވާދަކުރެއްވުމުގެ ވިސްނުން ނެތް ކަމަށް ވިދާޅުވެފައެވެ. އަދި އެ ފުރުސަތު ލިބިވަޑައިގެންނެވި ނަމަވެސް އެކަމުން “ސަލާމަތް” ވެވަޑައިގަންނަވަން ބޭނުންފުޅުވާ ކަމުގައި އަބްދުއްރަހީމް ވިދާޅުވިއެވެ. “ރާއްޖޭގެ ވެރިކަމަށް ކުރިމަތިލުމުގެ ވިސްނުމެއް ދުވަހަކު ވެސް ނުގެންގުޅެން. އަދި ކުރިއަށް އޮތްތާކު ވެސް ނުގެންގުޅޭނަން. ވާދައެއް ނުވެސް ކުރާނަން. އެފަދަ ފުރުސަތެއް ލިބުނަސް އެކަމުން ސަލާމަތް ވާނަން،” ރައީސް ޑރ. މުއިއްޒާއެކު އެންމެ އަރިސްކޮށް މަސައްކަތް ކުރައްވާ އަބްދުއްރަހީމް ވިދާޅުވިއެވެ.