އިސްރާއީލް ޕާސްޕޯޓް މަނާ ކުރާ ބިލްގެ މަސައްކަތް ގެންދާނީ ރޮކެޓް ސްޕީޑްގައި

Read Time:4 Minute, 4 Second

އިސްރާއީލްގެ ޕާސްޕޯޓް މަނާ ކުރާ ބިލްގެ މަސައްކަތް ގެންދާނީ ރޮކެޓް ސްޕީޑްގައި ކަމަށް ރައްޔިތުންގެ މަޖިލީހުގެ ވިލިމާލޭ ދާއިރާގެ ޕީއެންސީ މެންބަރު މުހައްމަދު އިސްމާއިލް ވިދާޅުވެއްޖެއެވެ. މުހައްމަދު އިސްމާއިލް އެހެން ވިދާޅުވީ އިސްރާއީލްގެ ޕާސްޕޯޓް ބޭން ކުރުން އިނބިލީހުގެ ކައިވެންޏައް ވެއްޖެ ކަމަށް ބުނެ އަލީ ރަޒީމް ކުރެއްވި ޕޯސްޓަކަށް ރައްދު ދެއްވަމުންނެވެ. އޭނާ ވިދާޅުވީ އެ ބިލްގެ މަސައްކަތް ބާރަށް ކުރިއަށް ގެންދަވާނެ ކަމަށެވެ. އަދި މި ފެށޭ ހަފްތާގައި ރޮކެޓް ސްޕީޑަށް އެ ބިލްގެ މަސައްކަތް ގެންދަވާނެ ކަމަށް ވިދާޅުވިއެވެ.

އިސްރާއީލް ޕާސްޕޯޓްގައި ރާއްޖެ އެތެރެވުން މަނާ ކުރުމުގެ ބިލާމެދު ގޮތެއް ނިންމުގެ މަސައްކަތް 241 ކޮމިޓީއިން ކުރަމުންދާއިރު އެންމެ ފަހުން ބޭއްވި ބައްދަލުވުމުގައި އެ ކޮމިޓީއިން ނިންމާފައިވަނީ ގޮތެއް ނިންމުމުގެ ކުރިން އިމިގްރޭޝަނުން ތަފާސްހިސާބުތައް ހޯދައި އެކި އިދާރާތަކާއި ޖަމިއްޔާތަކުން ދެކޭ ގޮތެއް ބެލުމަށެވެ. ވެރިކަން ކުރާ ޕާޓީ ޕީއެންސީން ބުނެފައިވާ ގޮތުގައި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަނިޔާވެރި އަމަލުތައް، ބައިނަލްއަގުވާމީ މަސްރަހުގައި އެންމެ ހަރު އަޑުން ކުށްވެރި ކުރައްވައި، ފަލަސްތީނުގެ ދައުލަތެއް ގާއިމް ކުރުމަށާއި، އިސްރާއީލް ޖަވާބުދާރީ ކުރުވުމަށް އެންމެ ވަރުގަދައަށް ވަކާލާތުކުރައްވާ އެއް ލީޑަރަކީ ރައީސް ޑރ. މުހައްމަދު މުއިއްޒު ކަމަށެވެ.

ފަލަސްތީނުގެ ހައްގުގައި ރާއްޖޭގެ އެއްވެސް ސަރުކާރަކުން މީގެ ކުރިން ނުކުރާ މަސައްކަތް، މި ސަރުކާރުން ކުރާކަން މި ގައުމުގެ ކުރީގެ ރައީސްކަން ކުރައްވާފައިވާ ތަޖުރިބާކާރު ބޭފުޅުން ވެސް ފާހަގަ ކުރައްވާފައިވާ ކަމަށް ޕީއެންސީގެ ބަޔާނުގައިވެއެވެ. ފަލަސްތީނުގެ ރައްޔިތުންނަށް ދިވެހި ސަރުކާރާއި ރައްޔިތުންގެ ފަރާތުން އެންމެ ބޮޑު މާލީ އެހީތެރިކަމެއް ވެސް މިހާތަނަށް ދީފައި އޮތީ ޕީއެންސީގެ ސަރުކާރުން ކަމަށް އެ ޕާޓީން ބުނެއެވެ. ޕީއެންސީން ބުނެފައިވަނީ ކަމާގުޅޭ މާހިރުންގެ ލަފާ އާއި އިރުޝާދާއެކު އިސްރާއީލް ޕާސްޕޯޓު މަނާކުރުމުގެ ބިލުގެ މަސައްކަތް ކުރިޔަށް ގެންގޮސް، ތާވަލާ އެއްގޮތަށް މަސައްކަތައް ނިންމާނެ ކަމާމެދު އެއްވެސް ޝައްކެއް ނެތް ކަމަށެވެ.