ނަތަންޔާހޫ ހައްޔަރު ކުރުމުގެ އަމުރަށް ރައީސްގެ މަރުހަބާ

Read Time:3 Minute, 50 Second

ފޮޓޯ ކްރެޑިޓްސް: ރައީސް އޮފީސް

އިސްރާއީލުގެ ބޮޑުވަޒީރު، ބެންޖަމިން ހައްޔަރު ކުރަން ބައިނަލްއަގުވާމީ ޖިނާއީ ކޯޓުން ނެރުނު އަމުރަށް، ރައީސް، ޑރ. މުހައްމަދު މުއިއްޒު މަރުހަބާ ވިދާޅުވެއްޖެއެވެ. ބައިނަލްއަގުވާމީ ޖިނާއީ ކޯޓުން މިއަމުރު ނެރެފައިވަނީ މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުން ފަލަސްތީނުގެ ޣައްޒާގައި ހިންގަމުން އަންނަ ގަތުލުއާންމާއި ގުޅިގެންނެވެ. އިއްޔެ ނެރުނު އެ އަމުރުގައި ނަތަންޔާހޫގެ އިތުރުން އޭނާގެ ސަރުކާރުގެ ކުރީގެ ޑިފެންސް މިނިސްޓަރު، ޔޯވް ގަލަންޓް އާއި ހަމާސްގެ އަސްކަރީ ވެރިޔާ މުހައްމަދު ދިއާބް އިބްރާހިމް އަލް މަސްރީ ހައްޔަރު ކުރުމަށް ވެސް އަމުރު ކޮށްފައެވެ.

މިކަމާއި ގުޅިގެން “އެކްސް”ގައި ކުރެއްވި ޕޯސްޓެއްގައި ރައީސް ވިދާޅުވީ، ބައިނަލްއަގުވާމީ ޖިނާއީ ކޯޓުން ނިންމި ނިންމުމަށް ރާއްޖޭން މަރުހަބާ ކިޔާ ކަމަށާއި މިއީ ނިރުބަވެރި އިސްރާއީލުން ހަނގުރާމައިގެ ޖަރީމާތަކާއި އިންސާނިއްޔަތާއި ހިލާފަށް ދެމުން އަންނަ ހަމަލާތަކަށް އެމީހުން ޒިންމާދާރު ކުރުމަށް އެޅޭ ވަރަށް ވެސް މުހިންމު ފިޔަވަޅެއް ކަމަށެވެ. ރައީސް ވިިދާޅުވީ، ބައިނަލްއަގުވާމީ ޖިނާއީ ކޯޓުން އެޅި އެ ފިޔަވަޅަށް ފުރިހަމައަށް ރާއްޖޭން އިހުތިރާމު ކުރާ ކަމަށެވެ. އަދި އެ ކޯޓުން ނިންމުން ތަންފީޒު ކުރުމުގެ މުހިންމުކަން ވެސް ރައީސް ފާހަގަ ކުރެއްވިއެވެ.

The #Maldives welcomes the @IntlCrimCourt‘s decisions today with regard to the situation in the State of Palestine. This is a crucial step towards ensuring accountability for war crimes and crimes against humanity.

The Maldives respects the decisions of the ICC and underscores…

— Dr Mohamed Muizzu (@MMuizzu) November 21, 2024

އިންޓަނޭޝަނަލް ކްރިމިނަލް ކޯޓުގެ ޗީފް ޕްރޮސެކިއުޓާ ކަރީމް ކާން ވިދާޅުވީ އެ މީހުންގެ މައްޗަށް ކުރާ އެ ދައުވާތަކަކީ “ނައްތާލުމަށް މަގުފަހިކޮށްދިނުމާއި، ހަނގުރާމަ ކުރުމުގެ ނަމުގައި ބަނޑުހައިހޫނުކަން އުފައްދައި، އިންސާނީ އެހީގެ ސާމާނު ނުދިނުމާއި، އާންމުންނަށް އަމާޒުކުރުމުގެ ކުށުގެ ދައުވާ” ކަމަށެވެ. 2002 ވަނަ އަހަރު އުފެއްދި އައިސީސީއަކީ ޖަރީމާތަކާއި ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތައް ފަދަ ބޮޑެތި ކުށްތައް ބެލުމަށް އުފައްދާފައިވާ ދުނިޔޭގެ ހަމައެކަނި މިނިވަން ކޯޓެވެ.