ސްރާއީލް ޕާސްޕޯޓްގެ މައްސަލަ އަވަސްކުރަން ގޮވާލައި ގަރާރު ވެއްދީ ހެޔޮ ނިޔަތެއް ނެތި: ޕީއެންސީ

Read Time:4 Minute, 37 Second

ފޮޓޯ ކްރެޑިޓްސް: ވަގުތު

އިސްރާއީލްގެ ޕާސްޕޯޓް މަނާ ކުރުމުގެ ބިލް އަވަސް ކުރުމަށް ބާރު އެޅުމަށް ގޮވާލައި އިދިކޮޅު އެމްޑީޕީން ހުށަހެޅި ގަރާރު ބޭރުކޮށްލީ އެއީ އެއްވެސް ހެޔޮ ނިޔަތެއް ނެތި ހުށަހެޅި ގަރާރަކަށްވާތީ ކަމަށް ވެރިކަން ކުރާ މައި ޕާޓީ، ޕީއެންސީން މިރޭ ބުނެފިއެވެ.

މި ގަރާރު މަޖިލިހަށް މިއަދު ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީގެ މެމްބަރު މުހައްމަދު އިބްރާހިމެވެ. އެކަމަކު، ޕީއެންސީގެ މެމްބަރުންގެ ވޯޓުން އެ ގަރާރު ވަނީ މަޖިލިހުން ބޭރުކޮށްލައިފައެވެ.

ޕީއެންސީން މިރޭ ނެެރުނު ބަޔާނެއްގައި ބުނީ އިސްރާއީލްގެ ޕާސްޕޯޓު މަނާކުރުމުގެ ބިލުގެ މަަސައްކަތް އަވަސްކުރުމަށް އެމްޑީޕީން މަޖިލީހަށް ހުށަހެޅި ގަރާރަކީ މަޖިލީހުގައި މިއަދު ކުރަންހުރި މަސައްކަތްތަކުގެ ވަގުތު ނަގައިލުމުގެ ބޭނުމުގައި، އެއްވެސް ހެޔޮނިޔަތެއް ނެތި މަޖިލީހަށް ހުށަހެޅި ގަރާރެއް ކަމަށެވެ.

އިސްރާއީލްގެ ޕާސްޕޯޓުގައި ރާއްޖެއަށް އެތެރެވުން މަނާކުރުމުގެ ބިލްގެ މަސައްކަތް ކަނޑައެޅިފައިވާ ތާވަލާ އެއްގޮތަށް ކުރިއަށްދާނެ ކަމަށް ވެސް އެ ބަޔާނުގައިވެއެވެ.

ޕީއެންސީން ބުނި ގޮތުގައި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަނިޔާވެރި އަމަލުތައް، ބައިނަލްއަގުވާމީ މަސްރަހުގައި އެންމެ ހަރު އަޑުން ކުށްވެރި ކުރައްވައި، ފަލަސްތީނުގެ ދައުލަތެއް ގާއިމް ކުރުމަށާއި، އިސްރާއީލް ޖަވާބުދާރީ ކުރުވުމަށް އެންމެ ވަރުގަދައަށް ވަކާލާތުކުރައްވާ އެއް ލީޑަރަކީ ރައީސް ޑރ. މުހައްމަދު މުއިއްޒެވެ.

ފަލަސްތީނުގެ ހައްގުގައި ރާއްޖޭގެ އެއްވެސް ސަރުކާރަކުން މީގެ ކުރިން ނުކުރާ މަސައްކަތް، މި ސަރުކާރުން ކުރާކަން މި ގައުމުގެ ކުރީގެ ރައީސްކަން ކުރައްވާފައިވާ ތަޖުރިބާކާރު ބޭފުޅުން ވެސް ފާހަގަ ކުރައްވާފައިވާ ކަމަށް ޕީއެންސީގެ ބަޔާނުގައިވެއެވެ. ފަލަސްތީނުގެ ރައްޔިތުންނަށް ދިވެހި ސަރުކާރާއި ރައްޔިތުންގެ ފަރާތުން އެންމެ ބޮޑު މާލީ އެހީތެރިކަމެއް ވެސް މިހާތަނަށް ދީފައި އޮތީ ޕީއެންސީގެ ސަރުކާރުން ކަމަށް އެ ޕާޓީން ބުނެއެވެ.

ޕީއެންސީން ބުނީ ކަމާގުޅޭ މާހިރުންގެ ލަފާ އާއި އިރުޝާދާއެކު އިސްރާއީލް ޕާސްޕޯޓު މަނާކުރުމުގެ ބިލުގެ މަސައްކަތް ކުރިޔަށް ގެންގޮސް، ތާވަލާ އެއްގޮތަށް މަސައްކަތައް ނިންމާނެ ކަމާމެދު އެއްވެސް ޝައްކެއް ނެތް ކަމަށެވެ.

ޕީއެންސީއާއި ރައީސް ޑރ. މުއިއްޒުގެ ސަރުކާރުން އަބަދު ވެސް ދެމި އޮންނާނީ ފަލަސްތީނުގެ ރައްޔިތުންނާ އެކު، އެ ގައުމުގެ ރައްޔިތުންގެ ހައްގުގައި ކުރަން ޖެހުނު ކޮންމެ ކަމެއް ކުރުންމަތީގައި ކަމަށް ޕީއެންސީން ބުނެއެވެ.