Read Time:3 Minute, 7 Second
މެދުއިރުމަތީގެ ހަނގުރާމައާ ގުޅިގެން ރާއްޖޭގެ އިޤްތިޞާދަށާއި ސަލާމަތަށް ކުރިމަތިވެދާނެ ނޭދެވޭ އަސަރުތައް ދެނެގަނެ، ރައްކާތެރިކަމުގެ ފިޔަވަޅުތައް އެޅުމަށް ރައީސުލްޖުމްހޫރިއްޔާ އެކުލަވާލެއްވި ވަޒީރުންގެ ކޮމިޓީން މުހިންމު މަސައްކަތްތަކެއް ފަށާފައިވާ ކަމަށް ޚާރިޖީ ވަޒީރު ޑރ. ޢަބްދުﷲ ޚަލީލު ވިދާޅުވެއްޖެއެވެ. މިގޮތުން ހަނގުރާމަ ފެށުނުތާ ކުޑަވަގުތުކޮޅެއްގެ ތެރޭގައި ކޮމިޓީގެ މަސައްކަތް ފަށައި، މިހާތަނަށް ފަސް ބައްދަލުވުމެއް ބާއްވައިގެން މަސްރަހު ދިރާސާކުރަމުންދާކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވި ގޮތުގައި، ރާއްޖޭގެ އަމާންކަން ދެމެހެއްޓުމަށްޓަކައި އެއްވެސް ޤައުމަކުން ހަމަލާދިނުމަށް ރާއްޖޭގެ ވައިގެ ސަރަހައްދު ބޭނުންކުރުމުގެ ހުއްދަ ނުދޭނެ ކަމަށާއި، އެފަދަ އެދުންތައް ބަލައިނުގަންނާނެ ކަމުގެ ޔަގީންކަން ވަނީ ދެއްވާފައެވެ. މީގެ އިތުރުން، އިމްޕޯޓަށް ބަރޯސާވާ މިންވަރު ބޮޑުވުމުން، ތެލާއި ކާބޯތަކެތި މެދުނުކެނޑި ލިބޭނެ އިންތިޒާމުތައް ހަމަޖެއްސުމަށްޓަކައި މެދުއިރުމަތީގެ އިތުރުން އެހެން ޤައުމުތަކާއި މާކެޓްތައް ހޯދުމުގެ މަސައްކަތް ސަރުކާރުން ދަނީ ކުރަމުންނެވެ. ހަނގުރާމައިގެ ސަބަބުން ފަތުރުވެރިކަމަށް ކުރިމަތިވެދާނެ ހުރަސްތައް ނައްތާލުމަށް އެއަރލައިންތަކާ މަޝްވަރާކުރުމާއި، ހަނގުރާމަ ހިނގާ ސަރަހައްދުތަކުގައި ތިބި ދިވެހިންގެ ހާލަތު ބަލައި އެހީތެރިކަން ފޯރުކޮށްދިނުމުގެ މަސައްކަތްވެސް ކުރިއަށްދާކަމަށް ވަޒީރު ވިދާޅުވިއެވެ. ސަރުކާރުގެ މައިގަނޑު އަމާޒަކީ ބައިނަލްއަޤްވާމީ މަސްރަހަށް އަންނަ ބަދަލުތަކަށް ތައްޔާރުވެ، ޤައުމުގެ މަސްލަހަތާއި ރައްޔިތުންގެ ރައްކާތެރިކަން ކަށަވަރުކުރުމެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0