ރައްޔިތުންގެ ވޯޓަށް ދާންޖެހޭ މާއްދާ އިސްލާހު ކުރާނަމަ ރައްޔިތުންގެ ރުހުން ހޯދަން ޖެހޭ ގޮތަށް ފާސްކޮށްފި

Read Time:4 Minute, 6 Second

ފޮޓޯ ކްރެޑިޓްސް: ރައީސް އޮފީސް

ގާނޫނުއަސާސީގައި ރައްޔިތުންގެ ވޯޓަކަށް ދާން ޖެހޭ މާއްދާ އިސްލާހު ކުރާ ނަމަ، ރައްޔިތުންގެ ރުހުން ހޯދަން ޖެހޭ ގޮތަށް ރައްޔިތުންގެ މަޖިލިހުން ފާސްކޮށްފިއެވެ.

ސަރުކާރުގެ ފަރާތުން ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދު ހުށަހެޅުއްވީ ގާނޫނުއަސާސީގެ 262 ވަނަ މާއްދާގެ (ށ) ގެ ފަހަތަށް ހަތަރު ވަނަ ނަމްބަރެއް އިތުރު ކުރުމަށެވެ.

ގާނޫނުއަސާސީގެ 262 ވަނަ މާއްދާގެ (ށ) ގައި ބުނެފައިވަނީ ބައެއް ކަންކަމުގައި ގާނޫނު އަސާސީގެ މާއްދާތަކަށް އިސްލާހެއް ގެންނަން ފާސްކުރާ ބިލްތައް ތަސްދީގު ކުރެވޭނީ އެ އިސްލާހެއް ގެނައުމަށް ރައްޔިތުން ރުހޭތޯ ބެލުމަށް ނަގާ ފެންނަ ނުފެންނަ ވޯޓަކުން އަޣުލަބިއްޔަތު ލިބިއްޖެ ނަމައެވެ. އެކަންކަމުގެ ތެރޭގައި ހިމެނެނީ އަސާސީ ހައްގުތަކާއި މިނިވަންކަން ހިމެނޭ ބާބަށް ބަދަލު ގެނައުމާއި ރައްޔިތުންގެ މަޖިލީހުގެ އުމުރަށް ބަދަލު ގެނައުމާއި ރިޔާސީ ދައުރާއި ރައީސުލްޖުމްހޫރިއްޔާ އިންތިހާބު ކުރާ ގޮތަށް ބަދަލު ގެނައުމެވެ.

ޝާހިދު އެ މާއްދާއަށް އިތުރު ކުރާ ނަންބަރުގައި ބުނެފައިވަނީ ރައްޔިތުންގެ ހިޔާލު ހޯދަން ޖެހޭ މާއްދާ އަށް ވެސް އިސްލާހެއް ގެނެވޭނީ ރައްޔިތުންގެ މެދުގައި ނަގާ ވޯޓަކުން ކަމަށެވެ. މި އިސްލާހު މަޖިލިހުން ފާސް ކުރީ 78 މެމްބަރުންގެ އަޣުލަބިއްޔަތުންނެވެ. އިސްލާހާ ދެކޮޅަށް ވޯޓު ދެއްވީ 13 މެމްބަރުންނެވެ.

ރައީސް ޑރ. މުހައްމަދު މުއިއްޒު ކުރިން ވަނީ ބައެއް ކަންކަމުގައި ރައްޔިތުން ދެކޭ ގޮތް ބަލަން ވޯޓަކަށް އަހާނެ ކަމަށް ވިދާޅުވެފައެވެ.

އެ ކަންކަމުގެ ތެރޭގައި ހިމެނެނީ ރިޔާސީ އިންތިހާބުގެ ދެވަނަ ބުރު އުވާލައި، ރިޔާސީ އިންތިހާބުގެ ފުރަތަމަ ބުރު އެކަނި ބާއްވަން ފެނޭތޯ އާއި ރައީސުލްޖުމްހޫރިއްޔާ ހުވާ ކުރައްވާ ދުވަހުގެ ގޮތުގައި މިހާރު އޮތް ނޮވެމްބަރު 17 ވަނަ ދުވަސް، ކުރިން އޮތް ގޮތަށް ނޮވެމްބަރު 11 އަށް ބަދަލު ކުރަން ފެނޭތޯއެވެ. އަދި ލޯކަލް ކައުންސިލް އިންތިހާބުގައި ރަށްރަށަށް އައްޔަން ކުރާ ކައުންސިލަރުންގެ އަދަދު މަދު ކުރަން ފެނޭތޯ ވޯޓަށް އަހާނެ ކަމަށް ރައީސް ވަނީ ވިދާޅުވެފައެވެ.

މީގެއިތުރުން ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގެ ބާއްވަން ފެނޭތޯ ވޯޓަކަށް އަހާނެ ކަމަށް ވެސް އެމަނިކުފާނު ވިދާޅުވިއެވެ.