ޞުލްޙައިގެ މަޝްވަރާތައް ފެށުމަށް އީރާނުން ހުށަހަޅާފައިނުވޭ

Read Time:4 Minute, 54 Second

(ފޮޓޯ ކްރެޑިޓްސް: ރޮއިޓާރސް)

ޞުލްޙަ ޤާއިމް ކުރުމާ ގުޅޭގޮތުން އީރާނުން އެމެރިކާއާއެކު މި ވަގުތު އެއްވެސް މަޝްވަރާއެއް ނުކުރާނެ ކަމަށް އދއަށް ކަނޑައަޅާފައި ހުންނަވާ އީރާނުގެ ސަފީރު، ޢަލީ ބަޙްރައިނީ ވިދާޅުވެއްޖެއެވެ. ބަޙްރައިނީ އެހެން ވިދާޅުވެފައި މި ވަނީ އެމެރިކާއާއި ޔަހޫދީން އިސްވެ އީރާނަށް ޙަމަލާ ދޭން ފެށިތާ ތިން ދުވަސް ވެފައި ވަނިކޮށެވެ. އެމެރިކާއާއި ޔަހޫދީންގެ ޙަމަލާތަކުގެ ރައްދުގައި އީރާނުން ވެސް ވަރުގަދަ ޙަމަލާތައް ދެމުންދާއިރު، ޙަމަލާތައް ދެމިގެން ދާނީ ކިހާ ދުވަހަކަށް ކަމެއް މި ޙާލަތުގައި ލަފާކުރަން ދައްޗެެވެ. ނޫސްވެރިންނާ ވާހަކަދައްކަވަމުން ބަޙްރައިނީ ވިދާޅުވީ މިހާރު އޮތް ޙާލަތު ރަނގަޅު ކުރުމަށް ސީދާކޮށް ވެސް ނުސީދާކޮށް ވެސް އެމެރިކާއާއެކު މަޝްވަރާ ކުރުމަށް އީރާނުން ހުށަހަޅާފައި ނުވާ ކަމަށެވެ. އަދި އީރާނުގެ ނިއުކްލިޔަރ މަޝްރޫޢުއާ ގުޅޭ ގޮތުން އެއްބަސްވުމަކާ ހަމައަށް އައުމަށް ކުރަމުންދިޔަ މަޝްވަރާތައް ކުރިއަށް ގެންދިޔުމަށް ވެސް އެމެރިކާއާއެކު ވާހަކަ ނުދެކެވޭ ކަމަށް އޭނާ ވިދާޅުވިއެވެ.

ކުރިއަށް އޮތް ދުވަސްތަކުގައި މަޝްވަރާ ކުރުން އެކަށީގެންވޭތޯ ސުވާލުކުރުމުން ބަޙްރައިނީ ވިދާޅުވީ މަޝްވަރާކޮށްގެން ފައިދާއެއް ކުރާނެ ކަމަށް އީރާނުން މި ވަގުތު ޤަބޫލު ނުކުރާ ކަމަށެވެ. އެމެރިކާއާއެކު މުއާމަލާތު ކުރެވޭނެ ހަމައެކަނި ބަހުރުވަ އަކީ ދިފާޢީ ބަހުރުވަ ކަމަށް އޭނާ ވިދާޅުވިއެވެ. އަދި މިއީ އީރާނުގެ ފަރާތުން އެއްވެސް ކަހަލަ އެއްބަސްވުމަކަށް އައުމަށް މަސައްކަތްކުރަންވީ ވަގުތު ނޫން ކަމަށް ވެސް އޭނާ ވިދާޅުވިއެވެ.

އީރާނުގެ ނިއުކްލިޔަރ މަޝްރޫޢުއާ ގުޅޭ ގޮތުން ޢުމާން މެދުވެެރިވެ އެމެރިކާއާއި އީރާނާ ދެމެދު ކުރަމުންދިޔަ މަޝްވަރާތަކުގެ ތިންވަނަ ބުރު ބާއްވާފައި ވަނީ ފެބްރުއަރީ މަހުގެ 26ވަނަ ދުވަހުއެވެ. އެ މަޝްވަރާތަކުގައި ކުރިއެރުންތަކެއް ލިބެމުންދާ ކަމަށް ޢުމާންއިން އޭރު ވަނީ ބުުނެފައެވެ. ނަމަވެސް އޭގެ ދެ ދުވަސް ފަހުން އެމެރިކާއިން ވަނީ ޔަހޫދީންނާ ގުޅިިގެން އީރާނަށް ޙަމަލާ ދޭން ފަށައިފައެވެ. އެ ޙަމަލާތަކުގައި އީރާނުގެ ރޫޙީ ވެރިޔާ އާޔަތުالله ޢަލީ ޚާމަނާއީއާއި ސަރުކާރުގެ އިސް ބޭފުޅުންތަކެއް ވަނީ ޝަހީދުކޮށްލައިފައެވެ. އެއާއެކު އީރާނުން ވެސް ވަނީ އެމެރިކާއާއި ޔަހޫދީންނާ ދެކޮޅަށް ވަރުގަދަ ރައްދު ޙަމަލާތަކެއް ދޭން ފަށައިފައެވެ. މެދުއިރުމަތީގައި ހުންނަ އެމެރިކާގެ އަސްކަރީ މަަރުކަޒުތަކަށާއި މުދަލަށް އީރާނުގެ މިސައިލް އަދި ޑްރޯން ޙަމަލާތައް އަމާޒުކުރަމުންދާއިރު، އެ ޤައުމުން ދަނީ ދުނިޔޭގެ އެކި ސަރަޙައްދުތަކަށް ތެޔޮ އުފުލުމަށް ބޭނުންކުރާ މައި މަގެއް ކަމަށްވާ ހުރްމުަޒް ކަނޑުއޮޅި އުޅަނދުތަކުން ބޭނުންކުރުމަށް ހުރަސް އަޅަމުންނެވެ.