އީރާނުން ނިއުކްލިޔަރ ހަތިޔާރު އުފައްދާކަމުގެ ހެއްކެއް ނެތް

Read Time:5 Minute, 16 Second

(ފޮޓޯ ކްރެޑިޓްސް: ރޮއިޓާރސް)

‏އީރާނުން ނިއުކްލިޔަރ ހަތިޔާރު ތަރައްޤީ ކުރަމުންދާ ކަމަށް އެމެރިކާއާއި ޔަހޫދީން ބުަނަމުން ދިޔަ ނަމަވެސް އެ ކަމުގެ ހެއްކެއް ފެންނަން ނެތް ކަމަށް އދގެ އެޓޮމިކް ހަކަތައާ ބެހޭ އިދާރާ، އައިއޭއީއޭއިން ބުނެފިއެވެ. އައިއޭއީއޭގެ އިސްވެރިޔާ، ރަފައެލް ގްރޮސީ ވިދާޅުވީ ނިއުކްލިޔަރ ހަތިޔާރު އުފެއްދުމުގެ މަޤުސަދުގައި ރޭވުންތެރިކަމާއެކު އީރާނުން މަޝްރޫޢުއެއް ހިންގާ ކަން މިހާތަނަށް ފާހަގަވެފައި ނުވާ ކަމަށެވެ. ނަަމަވެސް އީރާނުން 60 އިންސައްތަ ސާފުމިނަށް ޔުރޭނިއަމް މުއްސަނދިކޮށްފައިވާ ކަމަށް އޭނާ ވިދާޅުވިއެވެ. އެ ފަދަ ގޮތަކަށް ޔުރޭނިއަމް މުއްސަނދި ކުރަނީ ނިއުކްލިޔަރ ހަތިޔާރު ގެންގުޅޭ ޤައުމުތަކުން އެކަނި ކަމަށް ވެސް އޭނާ ފާހަގަކުރެއްވިއެވެ. ނަމަވެސް އީރާނުން ބޮމެއް ތައްޔާރުކުރަން މަސައްކަތް ކުރާ ކަމަކަށް އެ އިދާރާއަށް ނިންމޭ ވަރަށް ހެކި ނުފެންނަ ކަމަށް އޭނާ ތަކުރާރުކޮށް ވިދާޅުވިއެވެ.

ގްރޮސީ އިތުރަށް ވިދާޅުވީ އައިއޭއީއޭއިން ކަންބޮޑު ވަނީ އީރާނުން ޔުރޭނިއަމް މުއްސަނދި ކުރާތީ އެކަނި ކަމަށެވެ. އީރާނުން ފުޅާ ދާއިރާއެއްގައި ޔުރޭނިއަމް މުއްސަނދިކޮށް ޖަމާ ކުރަންޖެހޭ ސަބަބެއް ނެތް ކަމަށް އޭނާ ފާހަގަކުރެއްވިއެވެ. އީރާނުގެ ސެންޓްރިފޫޖްތަކުން އަދިވެސް ޔުރޭނިއަމް މުއްސަނދި ކުރަމުންދާ ކަމަށާއި، އީރާނުން މިހާރު މުއްސަނދިކޮށްފައިވާ ޔުރޭނިއަމްއަކީ ދިހަޔަކަށް ވުރެ ގިނަ ނިއުކްލިޔަރ ވޯހެޑް އުފެއްދޭނެ މިންވަރެއް ކަމަށް އޭނާ ފާހަގަކުރެއްވިއެވެ. ނަމަވެސް އެ ފަދަ ހަތިޔާރެއް އީރާނުގެ އަތުގައި ނެތް ކަމަށް އޭނާ ވިދާޅުވިއެވެ.

ހުޅަނގުގެ ބާރުތަކާއެކު އީރާނުން 2015ވަނަ އަހަރު ޤާއިމްކުރި ނިއުކްލިޔަރ އެއްބަސްވުމުގެ ދަށުން އެ ޤައުމަށް ޔުރޭނިއަމް މުއްސަނދި ކުރެވެނީ 3.67 އިންސައްތައިގެ ސާފު މިނަށެވެ. ނަމަވެސް 2018ވަނަ އަހަރު އެމެރިކާއިން އެ އެއްބަސްވުމުން ވަކިވުމުން އީރާނުން ވަނީ އެ ޤައުމުން ޔުރޭނިއަމް މުއްސަނދި ކުރާ މިންވަރު އިތުރުކުރަން ފަށައިފައެވެ. އެ މިންވަރު މިހާރު 60 އިންސައްތައަށް އިތުރުކޮށްފައިވާއިރު، އެ ނިސްބަތަކީ ހަތިޔާރު އުފެއްދުމަށް ބޭނުންވާ 90 އިންސައްތައާ ގާތްކުރާ ޢަދަދެކެވެ. ނަމަވެސް އެ ޤައުމުން އަބަދު ވެސް ބުނަމުން ދަނީ އެ ޤައުމުގެ ނިއުކްލިޔަރ މަޝްރޫޢުއަކީ ޞުލްޙަވެރި މަޝްރޫޢުއެއް ކަމަށެވެ. އީރާނުން އެހެން ބުނި ނަމަވެސް އެމެރިކާއާއި ޔަހޫދީންނާއި ހުޅަނގުގެ ޤައުމުތަކުން އެ ކަން ޤަބޫލެއް ނުކުރެއެވެ. އެމެރިކާއާއި ޔަހޫދީން މިދިޔަ އަހަރުގެ ޖޫން މަހުގެ ތެރޭގައި ވެސް އީރާނުގެ ނިއުކްލިޔަރ މަޝްރޫޢު ނިމުމަކަށް ގެނައުމަށް ނިއުކްލިޔަރ މަރުކަޒުތަކަށް އަމާޒުކޮށް ޙަމަލާދީ 12 ދުވަސްވަންދެން ހަނގުރާމަކޮށްފައިވެއެވެ. އޭގެ ފަހުން އެއްބަސްވުމަކާ ހަމައަށް އައުމަށް މަޝްވަރާތައް ކުރަމުން ދަނިކޮށް ޔަހޫދީންނާއި އެމެރިކާއިން ގުޅިގެން ވަނީ އަނެއްކާ ވެސް އީރާނަށް ޙަމަލާ ދޭން ފަށައިފައެވެ.