ޚާމަނާއީ ޝަހީދުކޮށްލުމުން ޕާކިސްތާނުގައި ހިނގި ހަމަނުޖެހުންތައް ތަޙްޤީޤްކުރަން ގޮވައިލައިފި

Read Time:3 Minute, 9 Second

(ފޮޓޯ ކްރެޑިޓްސް: ރޮއިޓާރސް)

އެމެރިކާއާއި ޔަހޫދީންގެ ޙަމަލާތަކުގައި އީރާނުގެ ރޫޙީ ވެރިޔާ، އާޔަތުالله ޚަމަނާއީ އަވަހާރަކޮށްލުމުން، އެ ޙަމަލާއާ ދެކޮޅަށް އަޑު އުފުލައި ޕާކިސްތާނުގައި މުޒާހަރާ ކުރި ބަޔަކު މަރައިލުމާ ގުޅިގެން، އެ ކަން ތަހުޤީޤު ކުރުމަށް އިންސާނީ ހައްޤުތަކަށް ވަކާލާތު ކުރާ އެމްނެސްޓީ އިންޓަނޭޝަނަލްއިން ގޮވާލައިފިއެވެ. ޚާމަނާއީ އަވަހާރަކޮށްލުމާ ގުޅިގެން ޕާކިސްތާނުގައި ކުރި މުޒާހަރާތަކުގައި 26 މީހުން މަރުވެފައިވެއެވެ. އެމްނެސްޓީ އިންޓަނޭޝަނަލްއިން ވަނީ އެ މައްސަލައާ ގުޅޭ މިނިވަން، ވަކި ފަރާތަކަށް ނުޖެހޭ، އަދި ފުރިހަމަ ތަހުޤީޤެއް ކުރުުމަށް ގޮވާލައިފައެވެ. މުޒާހަރާގެ ބައިވެރިން މެރުމާއި މުޒާހަރާ ރޫޅައިލުމަށް ސަލާމަތީ ބާރުތަކުން ވަޒަން ބޭނުން ކުރުމަކީ ޤަވާއިދާ ޚިލާފަށް ބާރުގެ ބޭނުންކުރުމާ ގުޅޭ ބޮޑެތި ކަންބޮޑުވުންތައް އުފެދޭ ކަމެއް ކަމަށް އެ ޖަމްޢިއްޔާއިން ނެރުނު ބަޔާނެއްގައި ބުނެފައިވެއެވެ.

އެމްނެސްޓީ އިންޓަނޭޝަނަލްގެ ސަރަޙައްދީ ޑިރެކްޓަރުގެ ނައިބު، ބާބޫ ރާމް ޕަންޓް ވިދާޅުވީ މުޒާހަރާގެ ބައިވެރިންނަށް ޞުލްޙަވެރިކަމާއެކު އެއްވެ އުޅުމުގެ ހައްޤާއި ހިތްހަމަނުޖެހުން ފާޅުކުރުމުގެ ހައްޤު ލިބިގެންވާ ކަމަށެވެ. މި ފަދަ ހައްސާސް ޙާލަތްތަކުގައި މީހުންގެ ފުރާނަ ރައްކާތެރިކުރުމާއި ޞުލްޙަވެރިކަމާއެކު އެއްވުމުގެ ފުރުޞަތު ދިނުމަށް ސަލާމަތީ ބާރުތަކުން އިސްކަން ދޭން ޖެހޭ ކަމަށް އޭނާ ވިދާޅުވިއެވެ. ޔަހޫދީންނާއި އެމެރިކާއިން އީރާނަށް ޙަމަލާ ދިނުމުން ޕާކިސްތާނުގެ އިތުރުން ޢިރާޤުގައި ވެސް މުޒާހަރާކޮށްފައިވެއެވެ. އެ ޤައުމުގައި ވެސް މުޒާހަރާ ރޫޅާލުމަށް ފުލުހުން ވަނީ ކަރުނަ ގޭހާއި ސްޓަން ގްރެނޭޑު ބޭނުންކޮށްފައެވެ.