މަޝްވަރާއިން ނިއުކްލިޔަރ މައްސަލަ ޙައްލުކުރެވިދާނެ ކަމަށް ޢޮމާނުން ބުނެފި

Read Time:5 Minute, 5 Second

(ފޮޓޯ ކްރެޑިޓްސް: ރޮއިޓާރސް)

އެމެރިކާއާއި އީރާނާ ދެމެދު މަޝްވަރާކޮށް، އީރާނުގެ ނިއުކްލިޔަރ މައްސަލަތާ ގުޅޭ ގޮތުން އެދެވޭ އެއްބަސްވުމަކާ ހަމައަށް އައުމުގެ ފުރުޞަތު އަދިވެސް އެބަ އޮތް ކަމަށް، ދެ ޤައުމުގެ ދެމެދުގައި މަޝްވަރާތައް ވިލަރެސްކުރާ ޢުމާނުން ބުނެފިއެވެ. ޢުމާނުން މިހެން ބުނެފައި މި ވަނީ ޔަހޫދީންނާއެކު އެެމެރިކާއިން އީރާނަށް ޙަމަލާތައް ދެމުންދާ ދަނޑިވަޅެއްގައެވެ. ޢުމާނުގެ ޚަރިޖީ ވަޒީރު ބަދްރު އަލްބުސައިދީ ވިދާޅުވީ ޙަމަލާ ބަދަލުނުކޮށް ދެ ފަރާތުން ވެސް ވާހަކަ ދައްކައިގެން އަދިވެސް ޞުލްޙަވެރިކަމާއެކު މައްސަލަ ޙައްލު ކުރެވިދާނެ ކަމަށެވެ. ޙަމަލާތައް ދޭން ފެށުމުގެ ކުރިން ސްވިޒަލެންޑުގެ ޖެނީވާގައި ޢުމާން މެދުވެރިވެ ކުރި މަޝްވަރާތަކުގައި އެއްބަސްވުމެއް ޤާއިމްކުރުމާ ގާތަށް ކުރިއެރުންތައް ލިބެމުން ދިޔަ ކަމަށް އޭނާ ވިދާޅުވިއެވެ. އުންމީދަކީ ހަނގުރާމައަކަށް ނުދިޔުން ކަމަށް ވި ނަމަވެސް، ހަނގުރާމައިގެ މާނައަކީ ޞުލްޙައަށް އޮތް އުންމީދު އެއްކޮށް ފޮހެވިގެން ދިޔުން ނޫން ކަމަށް ވެސް އޭނާ ވިދާޅުވިއެވެ. ޞުލްޙަވެރިކަމާއެކު ވާހަކަ ދައްކައިގެން އަދިވެސް މައްސަލަ ޙައްލުކުރެވިދާނެ ކަމުގެ ޔަޤީންކަން އޮތް ކަމަށް އޭނާ ތަކުރާރުކޮށް ވިދާޅުވެފައިވެއެވެ.

ފެބްރުއަރީ މަހުގެ 28ވަނަ ދުވަހު ޔަހޫދީންނާއި އެމެރިކާއިން އީރާނަށް ދޭން ފެށި ޙާމަލާތަކުގައި އީރާނުގެ ރޫހީ ވެރިޔާ، އާޔަތުالله ޢަލީ ޚާމަނާއީ ވަނީ އަވަހާރަވެފައެވެ. އީރާނުން ރައްދުގައި ވަރުގަދަ ޙަމަލާތައް ދެމުންދާއިރު، ޔަހޫދީ ދައުލަތަށާައި މެެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ދަނީ ގެއްލުންތައް ލިބެމުންނެވެ. އަލްބުދައިސީއާއި އީރާނުގެ ޚާރިޖީ ވަޒީރު، ޢައްބާސް އަރާޤްޗީއާ ދެމެދު ކުރެއްވި ފޯނު ކޯލެއްގައި އަލްބުދައިސީ ވަނީ ޙަމަލާ ބަދަލުކުރުން ހުއްޓައިލުމަށް އީރާނަށް ހިތްވަރު ދެއްވައިފައެވެ.

ޢުމާން މެދުވެރިވެ އީރާންއާއި އެމެރިކާއާ ދެމެދު ނުސީދާ މަޝްވަރާތައް ފަށާފައި ވަނީ 2025ވަނަ އަހަރުގެ އޭޕްރިލް މަހުގެ ތެރޭގައެވެ. އެ އަަހަރުގެ ޖޫން މަހުގެ ތެރޭގައި ޔަހޫދީންނާއި އެމެރިކާއިން ވަނީ އީރާނަށް ޙަމަލާދީ، ބާރަ ދުވަސް ވަންދެން ހަނގުރާމަކޮށްފައެވެ. އެއާއެކު އީރާނުން ވަނީ މަޝްވަރާތަކުގައި ބައިވެރިވުން މެދުކަނޑާލައިފައެވެ. އެއަށް ފަހު ދެން ޢުމާން މެދިވެރިވެ މަޝްވަރާތައް އަލުން ކުރަން ފަށާފައި ވަނީ މި އަހަރުގެ ފެބްރުއަރީ މަހުގެ ތެރޭގައެވެ. އެ ގޮތުން ފެބްރުއަރީ މަހުގެ 6ވަނަ ދުވަހު އައު މަޝްވަރާތަކުގެ ފުރަތަމަ ބުރު ބޭއްވިއެވެ. އަދި ފެބްރުއަރީ މަހުގެ މެދުތެރޭގައި ދެވަނަ ބުރު ބާއްވައި، ތިންވަނަ ބުރު ބާއްވާފައި ވަނީ ޙަމަލާތައް ދޭން ފެށުމުގެ ދެ ދުވަސް ކުރިން، ފެބްރުއަރީ މަހުގެ 26ވަނަ ދުވަހުއެވެ. އެ ބުރު ނިންމާލާފައި ވަނީ އިތުރު މަޝްވަރާތައް ކުރުމަށް އެއްބަސްވެފައެވެ.