Read Time:2 Minute, 41 Second
(ފޮޓޯ ކްރެޑީޓްސް: ރައީސް އޮފީސް)
އިސްލާމީ ދުނިޔޭގައި އާބާދީގެ ނިސްބަތުން އެންމެ ގިނަ ހާފިޡުން ތިބި ޤައުމަކަށް ރާއްޖެ ހެދުމަކީ ސަރުކާރުގެ އަމާޒެއް ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. ޙާފިޡުންގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، ކުރިއަށް އޮތް 5 އަހަރުގެ ތެރޭގައި ރާއްޖޭގެ ޙާފިޡުންގެ އަދަދު 500 އަށް އިތުރުކުރުމަށް މަސައްކަތް ކުރައްވާނެ ކަމަށެވެ. މިހާރު ރާއްޖޭގައި 301 ޙާފިޡުން ތިބިއިރު، މިއަހަރަކީ ތާރީޚީ ގޮތުން އެންމެ ގިނަ ޙާފިޡުން (31 ބޭފުޅުން) ދަސްވެނިވި އަހަރެވެ.
ޤުރްއާނުގެ ޢިލްމު ފުޅާކުރުމަށް ސަރުކާރުން މިދިޔަ އަހަރު 19 މިލިއަން ރުފިޔާ ޚަރަދުކޮށް، ހިތުދަސްކުރާ ކުދިންގެ އެލަވަންސް ވަނީ ބޮޑުކޮށްފައެވެ. އަދި ކޮންމެ ރަށެއްގައި ޤުރްއާނާ ބެހޭ މަރުކަޒުގެ ގޮފިތައް ޤާއިމުކުރުމުގެ މަސައްކަތުގެ ދަށުން މިއަހަރު 50 ގޮފި އުފެއްދުމަށް ވަނީ ރޭވިފައެވެ. މިވަގުތުވެސް 1800 އަށްވުރެ ގިނަ ކުދިން ޤުރްއާން ހިތުދަސްކުރަމުންދާއިރު، މި ދާއިރާ އިތުރަށް ކުރިއެރުވުމަށް ދައުލަތުގެ ބަޖެޓުގެ އިތުރުން ޒަކާތު ފަންޑާއި ހެޔޮއެދޭ ފަރާތްތަކުގެ އެހީތެރިކަން ލިބެމުންދާކަން ވަޒީރު ފާހަގަކުރެއްވިއެވެ. މީގެ އިތުރުން، އިސްލާމީ މަރުކަޒުތަކާއި މިސްކިތްތައް ބިނާކުރުމުގައި ވިޔަފާރިވެރިންގެ އެހީތެރިކަމަށްވެސް ވަޒީރު ވަނީ އިލްތިމާސްކުރައްވާފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0