Read Time:3 Minute, 1 Second
މާލެ ސިޓީ ކައުންސިލްގެ މެޖޯރިޓީ ސަރުކާރު ހިންގާ ޕީއެންސީއަށް އޮތް ނަމަވެސް، މާލޭގެ ތަރައްގީގެ މަސައްކަތްތައް ހުއްޓިފައިވަނީ މޭޔަރު އާދަމް އާޒިމްގެ ސަބަބުން ކަމަށް ރައީސް ޑރ. މުއިއްޒު ތުހުމަތު ކުރައްވައިފިއެވެ. ރައީސް ވިދާޅުވި ގޮތުގައި ކައުންސިލްގެ އިދާރީ ހިންގުމާއި ކަންކަން ތަންފީޒު ކުރުން އޮންނަނީ މޭޔަރުގެ އަތްޕުޅުގައި ކަމަށްވާތީ، މޭޔަރު އެއްބާރުލުން ނުދެއްވާ ނަމަ ރައްޔިތުންނަށް ބޭނުންވާ ޚިދުމަތްތައް ދިނުމަށް ހުރަސް އެޅެއެވެ.
(ފޮޓޯ ކްރެޑިޓްސް: ޕީއެންސީ)
މާލޭގެ ސްޓްރެޓީޖިކް އެކްޝަން ޕްލޭންގައި ހިމެނޭ މަގު ހެދުމާއި، މާރުކޭޓުތައް ތަރައްގީކުރުމާއި، ބޯހިޔާވަހިކަމުގެ މަޝްރޫއުތައް ފަދަ މުހިންމު ކަންކަން ކުރިއަށް ގެންދިއުމަށް ސަރުކާރަށް އެއްބާރުލުންދޭނެ މޭޔަރަކާއި ކައުންސިލެއް ހޮވުމުގެ މުހިންމުކަން ރައީސް ފާހަގަކުރެއްވިއެވެ. ވަކިން ހާއްސަކޮށް މާލޭގެ ވިޔަފާރި ބަނދަރު ސަރަހައްދު ތަރައްގީކޮށް، އެތަނުގައި ބޯހިޔާވަހިކަމާއި މުނިފޫހިފިލުވުމުގެ ވަސީލަތްތައް ގާއިމުކުރުމަކީ ސަރުކާރުގެ ބޮޑު އަމާޒެކެވެ.
ރައީސް އިތުރަށް ވިދާޅުވީ ގޯތިގެދޮރާއި ފްލެޓް ދިނުމުގެ ވައުދުތައް ފުއްދުމަށްޓަކައި ހުޅުމާލެ، ގިރާވަރުފަޅު އަދި ރަސްމާލެ ހިއްކުމުގެ މަސައްކަތް ބާރުސްޕީޑުގައި ކުރިއަށްދާ ކަމަށެވެ. އަދި މާލޭގެ މަގުތައް ހެދުމާއި ޕާކުތައް މަރާމާތުކުރުމުގެ މަސައްކަތް ވެސް ސަރުކާރުން ފަށާފައިވާކަން ފާހަގަކުރައްވައި، ކުރިއަށް އޮތް އިންތިހާބުތަކުގައި ސަރުކާރަށް އެއްބާރުލުންދޭނެ ކެންޑިޑޭޓުން ހޮވައިދިނުމަށް ރައީސް ރައްޔިތުންގެ ކިބައިން އެދިވަޑައިގެންނެވިއެވެ.
Happy
0 %
Sad
0 %
Excited
0 %
Sleepy
0 %
Angry
100 %
Surprise
0 %
1
1