Read Time:2 Minute, 36 Second
ސްޓްރޯކެއް ޖެހިގެން ހޮސްޕިޓަލަށް ގެންގޮސް ފަރުވާ ދޭން ފެށި ރާއްޖޭގެ މަޝްހޫރު ފިލްމު ޑައިރެކްޓަރު އަޙްމަދު ނިމާލް ނިޔާވެއްޖެއެވެ. ނިމާލް ނިޔާވެފައިވަނީ މިއަދު ހެނދުނު ވަގުތެއްގައެވެ. ނިމާލަށް ސްޓްރޯކެއްޖެހި އައިޖީއެމްއެޗްގައި ފަރުވާދޭން ފެށީ މިދިޔަ އަހަރުގެ ޑިސެންބަރު މަހުގެ 31 ވަނަ ދުވަހުއެވެ. މައުލޫމާތު ލިބިފައިވާ ގޮތުގައި އުމުރުން 62 އަހަރުގެ ނިމާލަށް ސްޓްރޯކެއް ޖެހުނީ، މާލޭގައި ސައިކަލު ދުއްވާފައި ދަނިކޮށެވެ. އަދި ސްޓްރޯކް ޖެހުމާއެކު އޭނާ ސައިކަލު މަޑުކުރި ވަގުތު ބިންމައްޗަށް ވެއްޓުނު ކަމަށް މަންޒަރު ދުށް ބައެއް މީހުން ބުނެފައިވެއެވެ.
ނިމާލަކީ، ދިވެހި ފިލްމީ ދާއިރާގައި ފާހަގަކޮށްލެވޭ ފުންނާބު އުސް ފަންނާނެކެވެ. އޭނާ ފިލްމީ ދާއިރާއަށް ނުކުތީ, 1984 ވަނަ އަހަރު އީސާ ޝަރީފުގެ “ނުފޫޒު” ފިލްމުން އެކްޓަރެއްގެ ގޮތުގައެވެ. އޭގެ ފަހުން 1993 ވަނަ އަހަރު ނިމާލް ލިޔެ، ޑައިރެކްޓުކޮށް އަދި އެކްޓުކުރި “ސިޓީ” އަކީ ދިވެހި ތާރީޚުގައި އާންމުންގެ ބޮޑު މަޤުބޫލު ކަމެއް ހޯދި ފިލްމެކެވެ. ނިމާލް ޑައިރެކްޓު ކުރި އަދި މުހިންމު ރޯލުތައް އަދާކުރި މަޝްހޫރު ފިލްމުތަކުގެ ތެރޭގައި “ޒަލްޒަލާ”، “ޔޫސުފް” އަދި “ނިއުމާ” ފަދަ ކާމިޔާބު ފިލްމުތައް ހިމެނެއެވެ. ފިލްމީ ދާއިރާއަށް އޭނާ ކޮށްދީފައިވާ އަގުހުރި ޚިދުމަތްތަކުގެ އަގުވަޒަންކޮށް، ސަރުކާރުން ވަނީ 1991 ވަނަ އަހަރު އޭނާއަށް ހިތްވަރުދިނުމުގެ ޤައުމީ އިނާމު ދެއްވާފައެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0