ދިރާގުގެ އާންމު ހިއްސާދާރުން ތަމްސީލުކުރާނެ ޑިރެކްޓަރގެ މަޤާމަށް ހުޅުވާލައިފި

Read Time:3 Minute, 58 Second

(ފޮޓޯ ކްރެޑިޓްސް: ދިރާޤު)

ދިރާގުގެ ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލުކުރާނެ ޕަބްލިކް ޑިރެކްޓަރުގެ މަޤާމަށް ކުރިމަތިލުމުގެ ފުރުޞަތު ހުޅުވާލައިފިއެވެ. ޕަބްލިކް ޑިރެކްޓަރުގެ މަޤާމަކީ، މެޖޯރިޓީ ހިއްސާދާރުން ފިޔަވައި އެހެން ހިއްސާދާރުންގެ މެދުގައި ނެގޭ ވޯޓަކުން ހޮވޭ، އާންމު ހިއްސާދާރުން ތަމްސީލުކުރާ ފަރާތެވެ. މި މަޤާމަށް ހޮވޭ ފަރާތެއްގެ ދައުރަކީ، އެ ފަރާތެއް އިންތިޚާބުކުރާ އަހަރީ އާންމު ޖަލްސާއިން ފެށިގެން، އޭގެ ފަހުން ބާއްވާ ދެވަނަ އަހަރީ އާންމު ޖަލްސާގެ ނިޔަލަށެވެ. މި އިންތިޚާބު އޮންނާނީ 2026 ވަނަ އަހަރުގެ އޭޕްރީލް މަހު ބޭއްވުމަށް ހަމަޖެހިފައިވާ ދިރާގުގެ 37 ވަނަ އަހަރީ އާންމު ޖަލްސާގައިކަމަށް އެ ކުންފުނިން ވަނީ ބުނެފައެވެ.

ޝަރުތުހަމަވާ އާންމު ހިއްސާދާރުން “ޕަބްލިކް ޑައިރެކްޓަރުކަމަށް އެދޭ ފޯމު” ހުށައެޅުމަށް ދިރާގުން ވަނީ ބުނެފައެވެ. 12 މާރިޗު 2026 ވާ ބުރާސްފަތި ދުވަހުގެ 15:00 ގެ ކުރިން ހުށަހެޅޭނެކަމަށް ދިރާގުން ބުނެއެވެ. ހުށަހަޅާ އެޕްލިކޭޝަންތައް ވަކި ހަމަޖެހިފައިވާ އުސޫލެއްގެ ދަށުން އިވެލުއޭޓްކޮށް ޝޯޓްލިސްޓް ކުރުމުގެ މަސައްކަތް ކުރިއަށްގެންދާނީ ބޯޑުގެ އާރް.އެން.ޖީ (RNG) ކޮމިޓީންނެވެ. މިގޮތުން، ޝޯޓްލިސްޓްކުރުމަށްޓަކައި މަޤާމަށް އެދި ހުށަހަޅައިފައިވާ ފަރާތްތަކާ އިންޓަރވިއު ކުރުމަކީވެސް އެކަށީގެންވާ ކަމެއްކަމަށް ދިރާގުން ވަނީ ބުނެފައެވެ.

އެއަށްފަހު، ކޮމިޓީން ނިންމާ ނަންތައް ބޯޑުގެ ހުއްދައާއެކު އަހަރީ އާންމު ޖަލްސާގެ ނޯޓިސްގައި ހިމަނައި، ވޯޓަށް ހުށައަޅާނެއެވެ. މި މަގާމަށް ހޮވޭނީ އެންމެ ގިނަ ވޯޓު ލިބޭ ފަރާތެއްކަމަށް ދިރާގުން ބުނެއެވެ. ވޯޓު ދިނުމުގެ ފުރުޞަތު ލިބޭނީ ޖަލްސާއަށް ހާޒިރުވާ، ނުވަތަ އޮންލައިންކޮށް ބައިވެރިވާ، ނުވަތަ ޖަލްސާގައި ހިއްސާދާރުން ތަމްސީލުކުރާ ފަރާތްތަކަށެވެ. ކޮންމެ ހިއްސާދާރަކަށް ނުވަތަ ހިއްސާދާރެއް ތަމްސީލުކުރާ ފަރާތަކަށް ވެސް ވޯޓު ދެވޭނީ އެ ފަރާތަކަށް ނިސްބަތްވާ ޖުމްލަ ހިއްސާގެ އަދަދަށް ކޮންމެ ހިއްސާއަކަށް ވޯޓެއްގެ އުސޫލުންނެވެ. ޝަރުތުހަމަވާ އަންހެން ހިއްސާދާރުން މި މަޤާމަށް ކުރިމަތިލުމަށް ބާރުއަޅައި ހިތްވަރުދޭކަމަށް ދިރާގުން ވަނީ ބުނެފައެވެ.