Read Time:2 Minute, 50 Second
ދިވެހިރާއްޖޭގެ ރަށްތައް އުފެދިފައިވާ ގޮތުން ސިއްޙީ ޚިދުމަތް ފޯރުކޮށްދިނުމުގައި ހުރި ގޮންޖެހުންތަކަށް ޙައްލެއް ހޯދުމަށް ސަރުކާރުން އަންނަނީ “މޯލްޑިވްސް ނޭޝަނަލް އެމްބިއުލާންސް ސަރވިސް” މެދުވެރިކޮށް ވަރުގަދަ ނިޒާމެއް ބިނާކުރަމުންނެވެ. މިގޮތުން އެއްގަމާއި، ކަނޑާއި، ވައިގެ މަގުން ބަލިމީހުން އުފުލުމުގެ ޚިދުމަތް ހަރުދަނާކުރުމަށްޓަކައި، މިހާތަނަށް 56 އައު އެމްބިއުލާންސް ރަށްރަށަށް ފޮނުވާފައިވާއިރު، އިތުރު އެމްބިއުލާންސްތަކާއި ޕެރަމެޑިކް އުޅަނދުތައް ގެނައުމުގެ މަސައްކަތް ދަނީ ކުރަމުންނެވެ.
ކަނޑުމަގުން ބަލިމީހުން އުފުލުމަށް ބޭނުންކުރާ ސީ-އެމްބިއުލާންސް ފްލީޓަށް މިއަހަރު ތެރޭގައި އިތުރު 12 އުޅަނދު އިތުރުކުރުމަށް ވަނީ ރޭވިފައެވެ. އަދި ވައިގެ މަގުން ޚިދުމަތް ދިނުމަށް އެއަރ އެމްބިއުލާންސްގެ ޚިދުމަތް ފަށައި، ތަމްރީނުލިބިފައިވާ ސިއްޙީ މުވައްޒަފުންނާއެކު މިހާރު ދަނީ ބޭނުންކުރަމުންނެވެ. މި ޚިދުމަތް އިތުރަށް ފުޅާކުރުމަށްޓަކައި މިއަހަރު ތެރޭގައި ހެލިކޮޕްޓަރުގެ ޚިދުމަތް ތަޢާރަފްކުރުމަށް ހަމަޖެހިފައިވާއިރު، މީގެ ސަބަބުން އެއަރޕޯޓް ނެތް ރަށްރަށުންނާއި މޫސުން ގޯސް ޙާލަތްތަކުގައި ބަލިމީހުން އުފުލުމަށް ބޮޑު ލުޔެއް ލިބޭނެއެވެ. މީގެ އިތުރުން، ރާއްޖެއިން ބޭރުގެ ޤައުމުތަކަށް އެއަރ އެމްބިއުލާންސްގައި ބަލިމީހުން ގެންދެވޭނެ އިންތިޒާމު ހަމަޖެއްސުމަށް ބޭރުގެ ބައެއް ޤައުމުތަކާއެކު ސަރުކާރުން ދަނީ މަސައްކަތް ކުރަމުންނެވެ. މިއީ ރާއްޖޭގެ ސިއްޙީ ނިޒާމަށް އަންނަ އިންޤިލާބީ ބަދަލެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0