Read Time:2 Minute, 20 Second
(ފޮޓޯ ކްރެޑިޓްސް: ރައްޔިތުންގެ މަޖިލިސް)
މިސްކިތްތަކަށް ގެއްލުންދިނުމަކީ ޓެރަރިޒަމްގެ އަމަލެއްގެ ގޮތުގައި ކަނޑައެޅުމަށް ޓެރަރިޒަމް މަނާކުރުމުގެ ގާނޫނަށް ހުށަހެޅި އިސްލާހަށް ރައްޔިތުންގެ މަޖިލީހުގެ މެންބަރުންގެ ފުރިހަމަ ތާއީދު ލިބިއްޖެއެވެ. ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ހުށަހެޅުއްވި މި ބިލު މަޖިލީހަށް ބަލައިގަތުމަށް މެންބަރުން ވަނީ އިއްތިފާގުވެފައެވެ.
މި އިސްލާހުގެ މައިގަނޑު މަގުސަދަކީ މިސްކިތްތަކަށް ގެއްލުންދިނުން އިތުރުވަމުންދާތީ، އެފަދަ ތަންތަނުގެ ކަރާމާތާއި ރައްކާތެރިކަން ކަށަވަރުކުރުމެވެ. ބިލަށް ބަހުސްކުރެއްވި މެންބަރުން ފާހަގަކުރެއްވި ގޮތުގައި، މިސްކިތްތަކަށް ގެއްލުންދޭ މީހުންނަކީ ބުއްދިގޯސް މީހުން ކަމަށް ބުނެ އަދަބުން ސަލާމަތްވުމަށް އޮންނަ ފުރުސަތު މި ބިލުގެ ސަބަބުން ހަނިވެގެންދާނެއެވެ. ސަރުކާރު ހިންގާ ޕީއެންސީގެ މެންބަރުންވެސް ވަނީ މި ބިލަށް ފުރިހަމައަށް ތާއީދުކުރައްވައި، ކޮމިޓީ މަރުހަލާގައި މަސައްކަތް އަވަސްކޮށްދެއްވާނެ ކަމުގެ ޔަގީންކަން ދެއްވާފައެވެ. ޓެރަރިޒަމްގެ ގާނޫނުގައި މިހާރު ކަނޑައަޅާފައިވާ ގޮތުން، އެފަދަ ކުށެއް ކުރާ މީހަކަށް 20 އަހަރާއި 25 އަހަރާ ދެމެދުގެ ޖަލު ހުކުމެއް އަންނާނެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0