އެންމެން ހަމަޔަށް ތިބެގެން އަހަރުމެން ބަލިނުވާނެ: ގާޑިއޯލާ

Read Time:4 Minute, 4 Second

އެންމެން ހަމަޔަށް ތިބެގެން ކުޅެފިނަމަ ލިވަޕޫލް މެޗުން ފެނިގެންދިޔައީ މެންޗެސްޓާ ސިޓީ ބަލިނުވާނެކަން ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ. އޭނާ މިހެން ބުނީ އިނގިރޭސި ޕްރެމިއާ ލީގުގައި ލިވަޕޫލްގެ އަމިއްލަ ދަނޑުގައި އެ ޓީމު 2-1އިން ބަލިކުރުމަށްފަހު އެވެ. “އަހަރެން ވަރަށް ފަހުރުވެރިވަން އަހަރެންގެ ޓީމު މި މެޗުގައި ދެއްކި ކުޅުމާއި ހިތްވަރަށް. މިމެޗަކީ އުނދަގޫ މެޗެއް. އަމުދުން ލިވަޕޫލްގެ އަމިއްލަ ދަނޑުގައި ކުޅޭއިރު އެއީ ކިހާ އުނދަގޫ ޓީމެއްކަން އެންމެނަށް ވެސް އެނގޭނެ. އެކަމަކު އަހަރެންގެ ކުޅުންތެރިން ވެސް މި މެޗުގައި ވަރަށް ރަނގަޅަށް ކުޅުނު. ހާއްސަކޮށް ބޯޅައާއެކު އަހަރުމެން ވަރަށް ރަނގަޅު. މިއިން ދައްކައިދެނީ ހުރިހާ ކުޅުންތެރިން ހަމަޔަށް ތިބެފިނަމަ އަހަރުމެން ބަލި ނުކުރެވޭނެކަން،” 10 އަހަރު ތެރޭގައި ޕްރެމިއާ ލީގުގެ ހަ ތަށި ސިޓީ އަށް ހޯދައިދިން ގާޑިއޯލާ ބުންޏެވެ.

ސިޓީގެ މުހިންމު ބައެއް ކުޅުންތެރިން ތިބީ މިވަގުތު އަނިޔާގަ އެވެ. އޭގެ ތެރޭގައި ވަރަށް މުހިންމު ތިން ޑިފެންޑަރުން ހިމެނެ އެވެ. ރުބެން ޑިއާސް އާއި ޖޯން ސްޓޯންސް އާއި ޖަސްކޯ ގަވަޑިއޯލް އެވެ. މި ކުޅުންތެރިން ނެތުމުން ސިޓީން ވަނީ ހުސްވި ޓްރާންސްފާ މުއްދަތުގައި އިތުރު ދެ ޑިފެންޑަރަކު ވެސް ގަނެފަ އެވެ. މެޗަށް ފަހު ކޯޗު އިތުރަށް ބުނީ ލިވަޕޫލް ލަނޑެއް ޖަހާފައިވަނިކޮށް މެޗުގެ ފަހު 15 މިނިޓް ތެރޭގައި ސިޓީ މޮޅުވި މައިގަނޑު އެއް ސަބަބަކީ ކެޕްޓަނާއި ކުޅުންތެރިން ލީޑަރޝިޕް ރަނގަޅުވުން ކަމަށެވެ. ލިވަޕޫލް އަތުން ސިޓީ މޮޅުކޮށްދިން ލަނޑު ޖެހީ އާލިން ހާލަންޑެވެ. މެޗަށް ފަހު ވާހަކަ ދައްކަމުން އޭނާ އެންމެ ބޮޑަށް ތައުރީފް ކުރީ ގޯލްކީޕަރު އިޓަލީގެ ޖިއާން ލުއިޖީ ޑޮންނަރޫމާ އަށެވެ.

“އޭނާ ވަރަށް މޮޅު ސޭވްތަކެއް ކުރި. މިއީ އަހަރުމެންނަށް މެޗު ތެރޭގައި ތިބެން ފުރުސަތު ލިބުނު ކަމަކީ. އަހަރުމެން މެޗުގެ ފަހު ވަގުތާ ހަމައަށް ވެސް މަސައްކަތް ކުރީ މޮޅުވާން. ފަހަތަށްދިޔަ ކޮންމެ ބޯޅައެއް ޑޮން ވަނީ ސޭވްކޮށްފައި. އެއީ ލިބުނު ހިތްވަރެއް،” ކޯޗު ބުންޏެވެ. މި މެޗުން ބަލިވުން ލިވަޕޫލް އޮތީ 25 މެޗުން 39 ޕޮއިންޓާއެކު ހަ ވަނާގަ އެވެ. ސިޓީ އޮތީ 50 ޕޮއިންޓާއެކު ދެ ވަނާގަ އެވެ. މިއީ އެއްވަނާގައި އޮތް އާސެނަލް އަށް ވުރެ ހަ ޕޮއިންޓް މެދު އަދަދެކެވެ.