Read Time:2 Minute, 42 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ކަޅުތުއްކަލާކޮށީގައި މިއަހަރު ފެށުމަށް ހަމަޖެހިފައިވާ އުމްރާނީ ތަރައްޤީގެ މަޝްރޫޢުގެ ސަބަބުން، ސިފައިންގެ އެކަމަޑޭޝަން މައްސަލައަށާއި އިދާރީ ހިންގުމަށް ބޮޑެތި ފަސޭހަތަކެއް ލިބިގެންދާނެ ކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ. ވަޒީރު ފާހަގަކުރެއްވި ގޮތުގައި، 2000 ވަނަ އަހަރުގެ ފަހުން ސިފައިންގެ އިމާރާތްތައް މަރާމާތުކޮށް އާބާތުރަ ފިލުވުމުގެ މަސައްކަތް އެކަށީގެންވާ ގޮތެއްގައި ކުރެވިފައި ނުވުމުގެ ސަބަބުން، މިހާރުގެ ހާލަތު ހުރީ އެންމެ އެދެވޭ ފެންވަރެއްގައެއް ނޫނެވެ. ޚާއްޞަކޮށް މާލޭގައި މަސައްކަތްކުރާ ސިފައިންނަށް ކުރިމަތިވެފައިވާ ބޯހިޔާވަހިކަމުގެ ދަތިކަމަށް މި މަޝްރޫޢުން ހައްލެއް ލިބޭނެއެވެ.
މާލޭގެ އިތުރުން އަތޮޅުތެރޭގެ އޭރިއާ ކޮމާންޑްތަކުގައިވެސް އެކަމަޑޭޝަނާއި ވަސީލަތްތައް ތަރައްޤީކުރުމުގެ މަސައްކަތް މިއަހަރާއި އަންނަ އަހަރު ކުރިއަށްދާނެއެވެ. މި ހުރިހާ މަސައްކަތްތަކެއްވެސް ކުރިއަށްގެންދާނީ ދައުލަތަށް ބުރަ ނުވާނެހެން، އިޤްތިޞާދީގޮތުން ފައިދާހުރި އަދި ޒަމާނީ ފެންވަރަށް ސިފައިންގެ މިލިޓަރީ އިންޖިނިއަރުންގެ ބެލުމުގެ ދަށުންނެވެ. މީގެ އިތުރުން، ސިފައިންގެ ތަމްރީނުތަކަށް ޚާއްޞަކޮށް ގިރިފުށި ހިއްކައިގެން އެތަން ޒަމާނީ ފެންވަރަށް ތަރައްޤީކުރުމާއި، އައްޑޫގައި ހުންނަ ތަމްރީނު މަރުކަޒު އިތުރަށް ތަރައްޤީކުރުމަށްވެސް ވަނީ ރޭވިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0