Read Time:3 Minute, 29 Second
(ފޮޓޯ ކްރެޑިޓްސް: ރޮއިޓާރސް)
ޤަޠަރުގެ ދައުޙާގައި ބޭއްވި 17 ވަނަ އަލް ޖަޒީރާ ފޯރަމްގައި ބައިނަލްއަޤްވާމީ އިސްވެރިން ވަނީ ޣައްޒާގައި ޔަހޫދީން ހިންގަމުންދާ ނަސްލުހޭދު ކުރުމުގެ ޢުދުވާނާއި، އޭގެ ސަބަބުން ދުނިޔޭގެ ސިޔާސީ މަޝްރަހަށާއި ބައިނަލްއަޤްވާމީ ޤާނޫނީ ނިޒާމަށް ކުރަމުންދާ ނޭދެވޭ އަސަރުތަކާ މެދު ކަންބޮޑުވުން ފާޅުކުރައްވާފައެވެ. މި ޢުދުވާނުގެ ސަބަބުން ބައިނަލްއަޤްވާމީ އިދާރާތަކުގެ ނުކުޅެދުންތެރިކަން ހާމަވެ، އިންސާފުގެ ބަދަލުގައި ގަދަބާރުގެ ބޭނުންކުރުން އިސްވެފައިވާކަން ވެރިން ފާހަގަކުރެއްވިއެވެ.
އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ވިދާޅުވި ގޮތުގައި މެދުއިރުމަތީގެ ކުރިމަގު ބައްޓަންވާނީ ފަލަސްޠީނުގެ މައްސަލައާ ގުޅިގެންނެވެ. އޭނާ ވަނީ ޔަހޫދީންނަށް ހަތިޔާރު ވިއްކުން ހުއްޓާލައި، އެ މީހުން އިންސާފުގެ ކުރިމައްޗަށް ގެނައުމަށް ގޮވާލައްވާފައެވެ. ސޮމާލިޔާގެ ރައީސް ޙަސަން ޝައިޚް މަޙްމޫދު ފާހަގަކުރެއްވި ގޮތުގައި، ފަލަސްޠީނުގެ މިނިވަން ދައުލަތެއް ޤާއިމްނުކުރެވިއްޖެ ނަމަ މުޅި ދުނިޔެއަށް ނުތަނަވަސްކަން ފެތުރޭނެއެވެ. އަދި ޔަހޫދީން ސޮމާލީލޭންޑާ ގުޅޭގޮތުން ނިންމި ނިންމުމަކީ ސަރަޙައްދީ ސަލާމަތަށް އޮތް ނުރައްކަލެއް ކަމަށް އޭނާ ސިފަކުރެއްވިއެވެ.
ތުރުކީވިލާތުގެ މަންދޫބު ބުރްހާނަތިން ދުރާން ވިދާޅުވީ ޒަމާނީ ހަނގުރާމައިގައި މީޑިޔާއާއި ޑިޖިޓަލް މަންސަތަކަކީ މީހުންގެ ވިސްނުން ބަދަލުކުރުމަށް ބޭނުންކުރާ ހަތިޔާރެއް ކަމަށެވެ. އަލް ޖަޒީރާ ނެޓްވޯކުގެ މުޤައްރިރު ޝައިޚް ހަމަދު ބިން ޘާމިރު ވަނީ ހަޤީޤަތް ހާމަކުރުމުގައި ނޫސްވެރިން ވަމުންދާ ޤުރުބާނީތައް ފާހަގަކުރައްވައި، ޔަހޫދީން ނޫސްވެރިންނަށް އަމާޒުކޮށް ޙަމަލާދޭ ކަން ހާމަކުރައްވާފައެވެ. ފޯރަމްގެ ބައިވެރިން އެއްބަސްވެވަޑައިގެންނެވި ގޮތުގައި ޣައްޒާގެ ޢުދުވާނަކީ މުޅި އިންސާނިއްޔަތަށް ހުރި ބޮޑު ގޮންޖެހުމެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0