Read Time:8 Minute, 9 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ނުކުޅެދުންތެރިކަން ހުންނަ ކުދިންގެ ނަފްސާނީ ހާލަތަށް ބެލުމަށްފަހު އެފަދަ ކުދިންނަށް ހޯމް ސްކޫލިން ޕާތުވޭ ފަހިކޮށްދިނުމަށް ޤާނޫނަށް އިސްލާޙް ގެނައުމަށް މަޖިލީހުގެ ފުރަތަމަ ދައުރަށް ހުށަހަޅާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާގެ ރިޔާސީ ބަޔާނުގައި ވަނީ ތަޢުލީމީ ދާއިރާއިން އުމްރާނީ ތަރައްޤީއަށް ކުރައްވާ މަސައްކަތްތަކާއި ނުކުޅެދުންތެރިކަން ހުންނަ ކުދިންނަށް ތަޢުލީމް ފޯރުކޮށްދިނުމަށް ކުރައްވާ މަސައްކަތްތަކަށް އަލި އަޅުވާލައްވަފާއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ނުކުޅެދުންތެރިކަން ހުންނަ ކުދިންނަށް ކިޔެވުމަށް ޚާއްސަ ކްލާސްރޫމްތަކާއި އެކުދިންގެ ޙާލަތަށް ރިޔާއަތްކޮށް ޕްރައިވަސީ ލިއްބައިދޭނެ ގޮތަށް ޚާއްސަ ފާޚަނާތަކާއި އެޑިއުކޭޝަނަލް ސަޕޯޓް ފެސިލިޓީތައް ޤާއިމްކޮށްދެއްވާނެކަމަށެވެ. އަދި އުނގެނުމަށާއި އުނގަންނައިދިނުމަށް ބޭނުންވާ އިކުއިޕްމަންޓާއި ޑިވައިސްތަކާއި ކަމާބެހޭ އެހެނިހެން ވަޞީލަތްތައް ނެތް ހުރިހާ ސްކޫލްތަކެއްގައި މިއަހަރު ހުރިހާ ކަމެއް ފުރިހަމަކޮށްދޭނެކަމުގެ ޔަޤީންކަން ރައީސް ދެއްވެއެވެ.
މީގެ ތެރޭގައި ނުކުޅެދުންތެރިކަން ހުންނަ ކުދިންނަށް އެކި މާއްދާތަކުގެ ފޮތްތައް ތަރައްޤީކުރުމާއި އެކުދިންގެ ނުކުޅެދުންތެރިކަމާ އެކަށީގެންވާ ގޮތެއްގައި އޯލެވެލްއަށް ތައްޔާރުވުމަށް ޚާއްސަ މަސައްކަތްތަކެއް ރާވާ ތަންފީޒް ކުރަން މިއަހަރު ފަށާނެކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ، ދަރިވަރުންގެ ނުކުޅެދުންތެރިކަން ހުންނަ ނިސްބަތަށް ނުވަތަ ނަފްސާނީ ހާލަތު ހުންނަ މިންވަރަށް ބަލާ ހެދޭ އެސެސްމަންޓެއްގެ މައްޗަށް ބިނާކޮށް ކަނޑައެޅޭ ޤަވައިދާ އެއްގޮތްވާގޮތުގެ މަތިން އެފަދަ ކުދިންނަށް ހޯމް ސްކޫލިން ޕާތުވޭ ފަހިކޮށްދިނުމަށް ޤާނޫނަށް އިސްލާޙް ގެނައުމަށް މަޖިލީހުގެ ފުރަތަމަ ދައުރަށް ހުށަހަޅާނެކަމަށެވެ. އަދި ނުކުޅެދުންތެރިކަން ހުންނަ ކުދިން ބަލާ ބެލެނިވެރިންގެ ތެރެއިން ސިވިލް ސަރވިސްގެ ވަޒީފާއަށް ދާ ބެލެނިވެރިންނަށް ވަޒީފާ އަދާކުރުން ވޯކް ފްރޮމް ހޯމްއަށް ބަދަލުކުރުމުގެ ފުރުޞަތު އަންނަ މަހުން ފެށިގެން ލިބިގެންދާނެކަމަށްވެސް ރައީސް ވިދާޅުވިއެވެ.
“އަޅުގަނޑުގެ ސިޔާސަތަކީ ތަޢުލީމީ ދާއިރާގައިވެސް އަދުލުވެރިކަން ޤާއިމްކުރުން. ދިވެހި ކޮންމެ ކުއްޖެއް އަޅުގަނޑު ކުރިމަތީގައި ހަމަހަމަ. އެކުއްޖެއްގެ ކިބައިގައި ހުންނަ ނުކުޅެދުންތެރިކަމެއްގެ ސަބަބުން އެ ކުއްޖާ ހައްޤުތަކުން މަހުރޫމްވެގެން ނުވާނެ. ހުރހާ ކުދިން ޝާމިލްކޮށްގެން ކިޔެވައިދިނުން، އިންކުލޫސިވް އެޑިއުކޭޝަންގެ ސިޔާސަތު އޭގެ އެންމެ ފުޅާގޮތުގައި ތަންފީޒްކުރުމުގެ ޚާއްސަ މަޝްރޫޢުއެއް މިއަހަރު ކުރިއަށް ހިންގަން ފަށާނެ.” ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސްގެ ވާހަކަފުޅުގައި ވަނީ ނުކުޅެދުންތެރިކަން ހުންނަ ކުދިންނަށް ކިޔަވައިދޭނެ މުދައްރިސުން ތަމްރީންކުރުމުގެ މަސައްކަތް މިއަހަރު ފުޅާކުރައްވާނެކަމަށްވެސް ވިދާޅުވެފައެވެ. ރިޔާސީ ބަޔާނުގައި ރައީސް ވިދާޅުވީ މިއަހަރު ތަޢުލީމީ ދާއިރާގެ މަޢުލޫމާތު ފަސޭހައިން ބެލެހެއްޓޭނެ ޑިޖިޓަލައިޒް ނިޒާމެއް ޤާއިމްކުރެވޭނެކަމަށެވެ. މީގެ ސަބަބުން ރިއަލްޓައިމްގައި ސައްޙަ މަޢުލޫމާތުގެ މައްޗަށް ބިނާކޮށް އުނގެނުމާއި އުނގަންނައިދިނުމާ ގުޅޭ ނިންމުންތައް އެކަށައަޅާ ތަންފީޒްކުރަން ފެށޭނެކަން ފާހަގަކުރެއްވިއެވެ. މިކަމަށްޓަކައި ރާއްޖޭގެ ހުރިހާ ސްކޫލެއްގައި ޑިޖިޓަލް އިންފްރާސްޓްރަކްޗާއާއި ވަޞީލަތްތައް ޤާއިމްކުރުމުގެ މަސައްކަތް މިއަހަރު ކުރިއަށްދާނެކަމަށް ރައީސް ވިދާޅުވިއެވެ.
ސްކޫލްތަކުގައި އުމްރާނީ ވަޞީލަތްތައް ޤާއިމްކުރުމުގެ މަސައްކަތުގެ ދަށުން މިދިޔަ އަހަރުގެ ނިޔަލަށް 142 ކްލާސްރޫމްއާއި 9 މަލްޓިޕާޕަސް ހޯލްއާއި ސައިންސްލެބާއި ސްޓާފްރޫމްއާއި ލައިބްރާރީ ފަދަ މަޝްރޫޢުގެ 56 އެޑިއުކޭޝަން ސަޕޯޓް ފެސިލިޓީގެ މަސައްކަތް ވަނީ ނިންމާފައެވެ. އަދި މިއަހަރުގެ ދިރާސީ އަހަރަށް އިތުރު 16 ކްލާސްރޫމްއާއި 7 މަލްޓިޕާޕަސް ހޯލްއާއި 250 އެޑިއުކޭޝަން ސަޕޯޓް ފެސިލިޓީ ނިންމާ ވަނީ ބޭނުންކުރަން ފަށާފައެވެ.
މިވަގުތުވެސް އިތުރު 955 ކްލާސްރޫމްއާއި 78 މަލްޓިޕާޕަސް ހޯލްއާއި 2923 އެޑިއުކޭޝަން ސަޕޯޓް ފެސިލިޓީގެ މަސައްކަތް ރާއްޖޭގެ އެކި ކަންކޮޅުތަކުގައި ކުރިއަށްދާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
Happy
0 %
Sad
0 %
Excited
80 %
Sleepy
0 %
Angry
0 %
Surprise
20 %
0
0