ފަރަންސޭސިވިލާތުން އިންޑޮނީޝިއާއަށް އެންމެ ފަހުގެ ހަނގުރާމަމަތީ މަތިންދާބޯޓުތަކެއް

Read Time:3 Minute, 27 Second

(ފޮޓޯ ކްރެޑިޓްސް: ރޮއިޓާރސް)

އެތައް ބިލިއަން ޑޮލަރުގެ ދިފާޢީ އެއްބަސްވުމެއްގެ ދަށުން، ފަރަންސޭސިވިލާތުން އިންޑޮނީޝިއާއަށް “ޣަފަލް” މަރުކާގެ ތިން ހަނގުރާމަމަތީ މަތިންދާބޯޓު ފޯރުކޮށްދީފިއެވެ. އިންޑޮނީޝިއާގެ ބައުވެފައިވާ އަސްކަރީ އާލާތްތައް އައުކުރުމަށްޓަކައި، 8 ބިލިއަން އެމެރިކާ ޑޮލަރުގެ ދިފާޢީ އެއްބަސްވުމެއްގައި ފަރަންސޭސިވިލާތާއެކު ސޮއިކޮށްފައިވަނީ 2022ވަނަ އަހަރުގެ ތެރޭގައެވެ. އެ އެއްބަސްވުމުގެ ދަށުން، ފަރަންސޭސިވިލާތުން އުފައްދާ “ޣަފަލް” މަރުކާގެ 42 ހަނގުރާމަމަތީ މަތިންދާބޯޓާއި ސަބްމެރިން ފަދަ އަސްކަރީ އާލާތްތައް އިންޑޮނީޝިއާއަށް ފޯރުކޮށްދޭނެއެވެ.

ފަރަންސޭސިވިލާތުގެ ދިފާޢީ ވުޒާރާގެ ތަރުޖަމާނު ވިދާޅުވި ގޮތުގައި، މި އަހަރުގެ ތެރޭގައި އިތުރު މަތިންދާބޯޓުތައް އިންޑޮނީޝިއާ ޙަވާލުކުރާނެއެވެ. ނަމަވެސް، މި އަހަރު ޙަވާލުކުރާނެ މަތިންދާބޯޓުތަކުގެ ސީދާ ޢަދަދެއް ތަރުޖަމާނު ވިދާޅުވެފައެއް ނުވެއެވެ. އިންޑޮނީޝިއާގެ އަސްކަރިއްޔާގެ އިސް ވެރިއެއްގެ ގޮތުގައި ގިނަ އަހަރުތަކެއް ޚިދުމަތްކުރައްވާފައިވާ، ޕްރަބޯވޯ ސުބިއަންތޯ އެ ޤައުމުގެ ރައީސްކަމަށް ވަޑައިގެން، އަސްކަރީ އާލަތްތައް ޒަމާނީ ކުރުމުގެ މަސައްކަތް ވަނީ ފައްޓަވައިފައެވެ. ފަރަންސޭސިވިލާތުގެ އިތުރުން، ޗައިނާ، އެމެރިކާ އަދި ތުރުކީވިލާތުން ވެސް ހަނގުރާމަމަތީ މަތިންދާބޯޓުތަކާއި ޒަމާނީ އަސްކަރީ އާލާތްތައް ހޯދުމުގެ މަޝްވަރާތައް ދަނީ ކުރެވެމުންނެވެ. މީގެއިތުރުން، ހަނގުރާމަމަތީ މަތިންދާބޯޓުތަކާއި އަސްކަރީ ޑްރޯންތައް ހޯދުމަށް ޕާކިސްތާނާއެކު ވެސް އެއްބަސްވުމެއް އެކުލަވައިލުމުގެ މަޝްވަރާތައް މިދިޔަ މަހުގެ ތެރޭގައި ކުރެވުނުކަމަށް ރޮއިޓަރސް ނޫހުން ރިޕޯޓުކޮށްފައިވެއެވެ.

އިންޑޮނީޝިއާގެ އަސްކަރީ އާލާތްތައް ޒަމާނީ ކުރުމަށްޓަކައި، ސުބިއަންތޯގެ ސަރުކާރުން ވަނީ ދިފާޢީ ބޮޑު ބަޖެޓެއް ވެސް ކަނޑައަޅުއްވައިފައެވެ.