Read Time:3 Minute, 57 Second
(ފޮޓޯ ކްރެޑިޓްސް: ރޮއިޓާރސް)
އިންޑިއާއަކީ ޗައިނާގެ “ރަނގަޅު”، އަވައްޓެރިއެއް، ބައިވެރިއެއް އަދި ރަހުމަތްތެރިއެއްގެ ގޮތުގައި، ޗައިނާގެ ރައީސް ޝީ ޖިންޕިންގ ސިފަކުރައްވައިފިއެވެ. އިއްޔެ ފާހަގަކުރި އިންޑިއާގެ ޖުމްހޫރީ ދުވަހުގެ މުނާސަބަތުގައި އިންޑިއާގެ ރައީސަށް ފޮނުއްވި މެސެޖުގައި، ފާއިތުވި އަހަރެއްހާ ދުވަހުގެ ތެރޭގައި، އިންޑިއާ އާއި ޗައިނާގެ ގުޅުން ވަރަށް ބޮޑަށް ބަދަހިވެފައިވާ ކަން ޝީ ފާހަގަކުރެއްވިއެވެ. އަދި ދެ ޤައުމުގެ ދެމެދުގައި އޮންނަ ހަރުދަނާ އަދި ބަދަހި ގުޅުމަކީ، މުޅި ދުނިޔޭގެ ސުލްޙަ މަސަލަސްކަމާއި ފާގިތަކަން ދެމެހެއްޓުމަށް މުހިންމުކަމެއްގެ ގޮތުގައި ޝީ ވަނީ ވިދާޅުވެފައެވެ.
ޝީ ވިދާޅުވި ގޮތުގައި، އަވައްޓެރި، ރަހުމަތްތެރި ރަނގަޅު ގުޅުމުގެ އިތުރުން ރަނގަޅު ބައިވެރިންގެ ގޮތުގައި ދެ ޤައުމު ދެމިތިބުމަކީ، ޗައިނާ އަދި އިންޑިއާއަށް ވެސް އެންމެ ރަނގަޅު ގޮތެވެ. އަދި މުސްތަޤުބަލުގައި ދެ ޤައުމުގެ ގުޅުން އިތުރު ދާއިރާތަކަށް ފުޅާކޮށް، ދިމާވެދާނެ ގޮންޖެހުންތަކާއި ކަންބޮޑުވުންތަކުން އަރައިގަތުމަށް، އެކުގައި މަސައްކަތް ކުރެވޭނެކަމަށް އުއްމީދުކުރައްވާ ކަމަށް ވެސް ޝީ ވިދާޅުވިއެވެ. ދުނިޔޭގެ ނިއުކްލިޔަރ ވަރުގަދަ ދެ ބާރުގެ ގޮތުގައި އޮތް، އިންޑިއާ އާއި ޗައިނާ ވަކިވެފައިވަނީ 3،800 ކިލޯމީޓަރުގެ ސަރަޙައްދީ ރޮނގަކުންނެވެ. ދެ ޤައުމުގެ ސަރަޙައްދީ ރޮނގާމެދު 1950ވަނަ އަހަރުން ފެށިގެން ދެ ޤައުމުގެ މެދުގައި އެކި ފަހަރުމަތިން ވަނީ ޚިލާފުތައް އުފެދިފައެވެ.
މިގޮތުން، 2020ވަނަ އަހަރުގެ ތެރޭގައި، ހިމާލަޔާ ފަރުބަދަ ކައިރީގައި އިންޑިއާ އާއި ޗައިނާގެ ސިފައިންނާ ދެމެދު ހިނގި ކުރިމަތިލުންތަކުގައި އިންޑިއާ ސިފައިންގެ 20 މީހުންނާއި ޗައިނާ ސިފައިންގެ ހަތަރު މީހުން ވަނީ މަރުވެފައެވެ. އޭރު ވަރަށް ބޮޑަށް ހީނަރުވި ގުޅުން ރަނގަޅުކުރުމަށް، މިދިޔަ އަހަރުގެ ތެރޭގައި ދެ ޤައުމުން މަސައްކަތް ފަށައި، މަތީފަންތީގެ ގިނަ ބައްދަލުވުންތަކެއް ވަނީ ބާއްވައިފައެވެ. އެއާ އެކު، މިދިޔަ އަހަރުގެ ތެރޭގައި އިންޑިއާ އާއި ޗައިނާއާ ދެމެދު ވަނީ ވައިގެ ސީދާ ދަތުރުތައް އަލުން ފަށައި، ވިޔަފާރީގެ ރޮނގުން ވެސް އެކުގައި ގިނަ މަސައްކަތްތަކެއް ކުރުމަށް ފަށައިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0