Read Time:4 Minute, 9 Second
ސާފް ފުޓްސަލް ޗެމްޕިއަންޝިޕުގައި ރާއްޖޭގެ ޤައުމީ ފުޓްސަލް ޓީމުން ކުޅުނު 4 ވަނަ މެޗުވެސް ކާމިޔާބުކޮށް ލީގު ތާވަލްގެ އެންމެ ކުރިން ލީޑު ފުޅާކޮށް ޗެމްޕިއަންކަމާ ޕޮއިންޓަކަށް ގާތައް ޖެހިލައިފިއެވެ. މިމެޗު ދިވެހި ޓީމް ކާމިޔާބުކުރީ 2-1 އިންނެވެ. މެޗު ފަށައިގެން ގިނަ ވަގުތު އެޓޭކްކޮށް ބޯޅަހިފަހައްޓައިގެން ކުޅެމުންދިޔައީ ދިވެހި ޓީމުންނެވެ. ފުރަތަމަ ހާފުގައި ގޯލެއް ފެނިގެންނުދިޔަ ނަމަވެސް ދިވެހި ޓީމުން ވަނީ ނުރައްކާތެރި ގިނަ ފުރުސަތުތަކެއް ތަނަވަސްކޮށްފައެވެ. އަދި ނޭޕާލްގެ ގޯލް ކީޕަރު ރަނގަޅު ސޭވްތަކެއް ކުރި އިރު ގޯލު ދަނޑިއަށް ރާއްޖޭގެ 3 ހަމަލާއެއް ވަނީ އަމާޒުވެފައެވެ. މެޗުގެ ފުރަތަމަ ލަނޑު ޖަހާ ލީޑުނެގީވެސް ދިވެހި ޓީމުންނެވެ. މިލަނޑަކީ ދެވަނަ ހާފްގެ ކުރީކޮޅު ނޭޕާލްގެ ފަހަތުން ހެދުނު މިސްޓޭކެއްގެ ފައިދާ ނަގާ އަބްދުﷲ ޝާފިއު ކާމިޔާބުކޮށްދިން ލަނޑެކެވެ. އެއީ އަހުމަދު ހަމީދު ނޭޕާލް ޕެނަލްޓީ އޭރިއާ ތެރެއިން ހޯދާފައި ކީޕަރު ކައިރިންވެސް ނައްޓާލާފައި ޝާފިއުއަށް ޖައްސާލި ބޯޅައިން ކާމިޔާބުކުރި ލަނޑެކެވެ.
މި ލަނޑު ޖެހިތާ މެނެޓެއްގެ ތެރޭގައި ނޭޕާލް އިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ލިބުނު ކޯނަރެއްގެ ބޭނުންހިފާ ބިކްރާތުު ނާސިންގ ރާނާއެވެ. ނޭޕާލްގެ މި ލަނޑަށްފަހުވެސް އެޓީމުން ވަނީ ގާތް ގާތުގައި ދިވެހި ޓީމުގެ ފަހަތަށް ޕްރެޝަރުކޮށްފައެވެ. މެޗު ނިމެން 7 މިނެޓަށް ވެފައިވަނިކޮށް ޝާފިއުއަށް ކުރި ފައުލްއަކަށް ނޭޕާލްގެ އަމިތު ލާމާއަށް ވަނީ ރަތްކާޑު ދައްކާފައެވެ. މިއާއެކު ނޭޕާލްގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުން ސީދާ ގޯލުގެ ތެރެއަށް ވައްދާލާ މެޗުގައި ދެވަނަ ފަހަރަށް ލީޑުނަގައިދީ މެޗުން މޮޅުކޮށްދިން ލަނޑު ޖަހައިދިނީ ކެޕްޓަން މުހައްމަދު އިމްރާނެވެ. މިއީ އިމްރާން މިމުބާރާތުގައި ކާމިޔާބުކުރި 7 ވަނަ ލަނޑެވެ.
މުބާރާތުގައި ދެން ރާއްޖެއަށް އޮންނާނީ ބޫޓާން އާއި ބައްދަލުކުރާ މެޗެވެ. ދިވެހި ޓީމަށް މުބާރާތުގެ ޗެމްޕިއަންކަން ކަށަވަރުކުރަން މިހާރު ބޭނުންވަނީ ކުރިއަށް އޮތް ދެ މެޗުން އެންމެ ދެ ޕޮއިންޓެވެ. އެހެންނަމަވެސް މިއަދު ޕާކިސްތާނާއި ބަންގްލަދޭޝް ބައްދަލުކުރާ މެޗު އެއްވަރުވެއްޖެނަމަ ދިވެހިރާއްޖެއަށް ޗެމްޕިއަންކަން ޔަގީންވާނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0