ފޯޅަވަހީގެ މިލްކުވެރިކަމަށް ދައުވާކުރަނީ ތާރީޚްގެ މުހިންމު ޙިއްޞާއަކަށް ވުމުން

Read Time:3 Minute, 14 Second

(ފޮޓޯ ކްރެޑިޓްސް: ރައީސް އޮފީސް)

ފޯޅަވަހީގެ މިލްކުވެރިކަން މޮރިޝަސްއަށް ބަދަލުކުރުމަށް އިނގިރޭސިވިލާތުން ނިންމާފައިވީ ނަމަވެސް، އެ ޖަޒީރާތަކަކީ ތާރީޚީ އަދި ޖިއޮގްރަފީ ގޮތުން ރާއްޖޭގެ ބައެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ. އިނގިރޭސި ނޫހަކަށް ދެއްވި ބަސްދީގަތުމެއްގައި ރައީސް ފާހަގަކުރެއްވި ގޮތުގައި، ފޯޅަވައްސާއި ރާއްޖެއާ ދެމެދު އޮތް ގުޅުން މޮރިޝަސްއަށްވުރެ މާ ބޮޑެވެ. މިގޮތުން މޮރިޝަސްއަށްވުރެ ރާއްޖެއާ ފޯޅަވަހި މާ ކައިރިވުމާއި، އެ ރަށްރަށުން ފެނިފައިވާ 900 އަހަރުވީ ދިވެހި މަހާނަގާތަކާއި، 16 ވަނަ ގަރުނުގެ ރަސްމީ ލިޔެކިޔުންތަކަކީ މިކަމުގެ ހެކިތަކެވެ. އަދި ފޯޅަވަހީގެ އަސްލު ވަޒަންވެރިންގެ ޑީ.އެން.އޭ އިންވެސް ދިވެހި ނަސްލުގެ ހިއްސާ ފެންނަން އޮތްކަން އެމަނިކުފާނު ފާހަގަކުރެއްވިއެވެ.

މި މައްސަލައިގައި ދިވެހި ސަރުކާރުގެ ކަންބޮޑުވުންތަކާއި ދަޢުވާ ރަސްމީކޮށް އިނގިރޭސި ސަރުކާރަށް މިހާރު ވަނީ ހުށަހަޅާފައެވެ. ރައީސް ވިދާޅުވި ގޮތުގައި އިނގިރޭސިވިލާތުން މޮރިޝަސްއާއެކު ވެފައިވާ އެއްބަސްވުމުގެ ސަބަބުން އެ ޤައުމަށް އިޤްތިސާދީ ބުރައެއް އުފުލަންޖެހޭއިރު، ރާއްޖޭގެ ހުށަހެޅުމަށް އަމަލުކޮށްފިނަމަ ބޮޑު ޚަރަދެއް ސަލާމަތް ކުރެވޭނެއެވެ. މި މައްސަލައިގެ ސަބަބުން ރާއްޖެއާއި އިނގިރޭސިވިލާތުގެ ގާތް ގުޅުމަށް އެއްވެސް ބަދަލެއް ނާންނަކަމަށާއި، ފަތުރުވެރިކަމުގެ ދާއިރާއިންނާއި އެހެނިހެން ގޮތްގޮތުން ދެ ޤައުމުގެ ދެމެދުގައި އޮތީ ވަރުގަދަ ގުޅުމެއްކަން ރައީސް ތަކުރާރުކުރެއްވިއެވެ. މިއީ ހަމައެކަނި ސިޔާސީ ކަމެއް ނޫން ކަމަށާއި، މިއީ ރާއްޖޭގެ ތާރީޚީ ތަރިކަ އާއި އިންސާފު ހޯދުމަށް ކުރާ ޤައުމީ މަސައްކަތެއް ކަމަށްވެސް އެމަނިކުފާނު ވިދާޅުވިއެވެ.