Read Time:4 Minute, 0 Second
ހުޅުމާލޭގައި ތަރައްގީކުރަމުންދާ “ކޭ-ޕާކް ރެސިޑެންސް”ގެ އެޕާޓްމަންޓްތައް މަކަރާއި ހީލަތުން އާންމު ފަރާތްތަކަށް ވިއްކައި، ފައިސާއަށް ހިޔާނާތްތެރިވެ އަދި މަނީ ލޯންޑާކުރި ކަމަށް ތުހުމަތުކުރެވޭ މައްސަލައާ ގުޅިގެން، ޖައިޝާން ސައީދު 159 އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައަކީ މއ. އެރަލްސީ، ހަސަން މަމްދޫހް އާއި އިތުރު ބަޔަކު ބައިވެރިވެގެން، ހަންބޯ ކޮމްޕެނީ ޕްރައިވެޓް ލިމިޓެޑްގެ މެޖޯރިޓީ ހިއްސާދާރުކަމުގައިވާ ޗައިނާގެ ޖިން ޝިހޫގެ ސޮއި ފޯޖުކޮށްގެން ލިޔެކިޔުންތަކެއް ހަދައި، ބޭންކް އޮފް މޯލްޑިވްސްގައި ހަންބޯ ކޮމްޕެނީ ޕްރައިވެޓް ލިމިޓެޑްގެ ނަމުގައި ބޭންކް އެކައުންޓް ހުޅުވައިގެން ހިންގާފައިވާ ޖަރީމާތަކެކެވެ. އެގޮތުން، ހަންބޯ ކޮމްޕެނީ ޕްރައިވެޓް ލިމިޓެޑްގެ ފަރާތުން ކޭ-ޕާކް ރެސިޑެންސްގެ ނަމުގައި ހުޅުމާލޭގައި އިމާރާތްކުރަމުންދާ އިމާރާތުގެ އެޕާޓްމަންޓްތައް އޮޅުވާލާއިގެން، މަކަރާއި ހީލަތުން އާންމު ފަރާތްތަކަށް ވިއްކައި، ބައެއް އެޕާޓްމަންޓްތައް އެއް ފަރާތަށް ވުރެ ގިނަ ފަރާތަށް ވިއްކައި، އެ ފައިސާއަށް ހިޔާނާތްތެރިވެ، އެ ފައިސާ މަނީ ލޯންޑާކޮށްފައިވާ ކަމަށް ދައުލަތުން އުފުލި ދައުވާތަކުގައިވެއެވެ.
ޖައިޝާން ސައީދުގެ މައްޗަށް ސާބިތުވި ދައުވާތަކަކީ:
- ޓެކުމުގައި ބައިވެރިވުން: 45 ދައުވާ
- އޮޅުވާލުމުގެ އަމަލެއް ކުރުން: 40 ދައުވާ
- މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަނޫން ލިޔުމެއް ދިނުން: 3 ދައުވާ
- މަނީ ލޯންޑާކުރުމަށް އެހީތެރިވުން: 1 ދައުވާ
މި މައްސަލައިގައި އޭނާގެ މައްޗަށް ކުށް ސާބިތުވާ ކަމަށް ކަނޑައެޅީ މިދިޔަ ބުރާސްފަތި ދުވަހު ބޭއްވި އަޑުއެހުމުގައެވެ. އަދި ކުށްތަކަށް އަދަބު ކަނޑައެޅީ މިއަދު ބޭއްވި ހުކުމްކުރުމުގެ އަޑުއެހުމުގައެވެ. މި މައްސަލާގައި މަނީ ލޯންޑްރިންގެ ދައުވާ ސާބިތުވެފައިވާތީ، އެފް.ޑަބްލިއު ކޮންސްޓްރަކްޝަން ޕްރައިވެޓް ލިމިޓެޑްއިން ހުޅުމާލޭގައި ތަރައްގީކޮށްފައިވާ އެފް.ޑަބްލިއު ރެޒިޑެންސްގެ ނަންބަރު: 02-13 (އޭރިއާ 2597.58) އެޕާޓްމަންޓާއި، އެޕާޓްމަންޓާ ގުޅިފައިވާ ބޭސްމަންޓް (02-13) ޕާކިންގް ސްލޮޓް ދައުލަތަށް ނެގުމަށް ވެސް ކޯޓުން އަމުރުކޮށްފައިވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0