ރައީސްގެ ވައުދު ފުއްދަވާފި. އައްޑޫ ޝަންގްރިއްލާ ރިސޯޓު އަލުން ހުޅުވައިފި!

Read Time:4 Minute, 12 Second

(ފޮޓޯ ކްރެޑިޓްސް: ރައީސް އޮފީސް)

ރައީސް ޑރ. މުހައްމަދު މުއިއްޒުގެ ރިޔާސީ ވައުދެއްގެ ގޮތުގައި ހިމެނޭ އައްޑޫ ޝަންގްރިއްލާ ވިލިނގިލި ރިސޯޓް އެންޑް ސްޕާ، ބޮޑު މަރާމާތަކަށް ފަހު މިއަދު އަލުން ހުޅުވައިފިއެވެ. ކޮވިޑް-19 ބަލިމަޑުކަމާ ގުޅިގެން 2020 އޮގަސްޓްގައި ބަންދުކުރި މި ރިސޯޓު އަލުން ހުޅުވުމަށް ކުރީގެ ސަރުކާރުން ވެސް މަސައްކަތްކުރި ނަމަވެސް އެކަން ކާމިޔާބުވެފައެއް ނުވެއެވެ.

ރައީސް މުއިއްޒުގެ 2023 ގެ ރިޔާސީ ކެމްޕެއިންގައި އައްޑޫ ރައްޔިތުންނަށް ދެއްވި އެންމެ މުހިންމު އެއް ވައުދަކީ މި ރިސޯޓު އަލުން ހުޅުވުމެވެ. މި ވައުދާ އެކު، ޝަންގްރިއްލާގެ މެނޭޖުމަންޓާ ގުޅިގެން ކުރެވުނު މަޝްވަރާތަކަށް ފަހު، މި އަހަރު ނިމުމުގެ ކުރިން ރިސޯޓު ހުޅުވާނެކަން މިދިޔަ ސެޕްޓެމްބަރު މަހު ވަނީ އިއުލާނުކޮށްފައެވެ. ޓޫރިޒަމް މިނިސްޓްރީން ބުނީ، ރިސޯޓު އަލުން ހުޅުވައި، ފުރަތަމަ ޓޫރިސްޓަށް މަރުހަބާ ކިޔާފައިވާ ކަމަށެވެ.

ޝަންގްރިއްލާ ބަންދުކުރީއްސުރެ އަލުން ހުޅުވަން ސަރުކާރުން ގިނަ މަޝްވަރާތައް ކޮށްފައިވާއިރު، ކުރީގެ ސަރުކާރުން ވަނީ ކުންފުނީގައި އޮތް ސަރުކާރުގެ 30 ޕަސެންޓް ހިއްސާ ދޫކޮށްލުމަށް ވެސް އެއްބަސްވެފައެވެ. އައްޑޫ ގަން އިންޓަނޭޝަނަލް އެއާޕޯޓުން ފަސް މިނިޓުން ދެވޭހާ ކައިރީގައި ހުންނަ މި ރިސޯޓަކީ 2008 ގައި ހުޅުވި އިރު، މުއްސަނދި ޓޫރިސްޓުން ޒިޔާރަތްކުރާ ތަނެއްގެ ގޮތުގައި މަޝްހޫރުވެފައިވާ ތަނެކެވެ. ރިސޯޓު ހުޅުވިފައި ހުރި ދުވަސްވަރު އައްޑޫގެ އިގުތިސާދަށް ބޮޑު ކުރިއެރުމެއް ލިބި، ގިނަ އަދަދެއްގެ ޕްރައިވެޓް ޖެޓްތައް ވެސް އައްޑުއަށް ދަތުރުކުރިއެވެ. ރިސޯޓު ހުޅުވުމުގެ ތައްޔާރީތަކުގެ ތެރެއިން މިދިޔަ ނޮވެމްބަރު މަހުގެ ކުރީކޮޅުން ފެށިގެން މުވައްޒަފުން ނެގުމުގެ މަސައްކަތް ކުރިއަށް ގެންގޮސްފައިވާއިރު، ރައީސް މުއިއްޒު ވެސް ވަނީ އެ މަހު ރިސޯޓަށް ވަޑައިގެން މަސައްކަތްތައް ބައްލަވާލައްވާފައެވެ.

ޓޫރިޒަމް މިނިސްޓްރީން ބުނީ ޝަންގްރިއްލާ އަލުން ހުޅުވުމަކީ އައްޑޫގެ އިގްތިސާދަށް ލިބުނު ބޮޑު ކުރިއެރުމެއް ކަމަށާއި، މީގެ ސަބަބުން އައްޑޫގެ ގިނަ ބަޔަކަށް ވަޒީފާގެ އާ ފުރުސަތުތައް ހުޅުވި، އެ ސަރަހައްދުގެ ޓޫރިޒަމަށް އާ ދިރުމެއް ލިބިގެންދާނެ ކަމަށެވެ. ބަންދުކުރުމާ ހަމައަށް 500 އަށް ވުރެ ގިނަ މުވައްޒަފުން އެ ތަނުގައި މަސައްކަތް ކޮށްފައިވެއެވެ.