އެފޯޑަބަލް ހައުސިން ޔުނިޓްތައް ތަރައްޤީކުރަން ދިވެހި ކުންފުނިތަކާވެސް ހަވާލުކުރާނެ

Read Time:4 Minute, 1 Second

ބީއެމްއެލް އެފޯޑަބަލް ހައުސިން ޔުނިޓްތަކުގެ މަސައްކަތް ދިވެހި ކުންފުނިތަކާވެސް ހަވާލުކުރުމަށް ނިންމާފައިވާކަމަށް ބީއެމްއެލްއިން ވިދާޅުވެއްޖެއެވެ. ބީއެމްއެލް އެފޯޑަބަލް ހައުސިން ޔުނިޓްތައް ތަރައްޤީ ކުރުމުގެ މަސައްކަތުގެ ދަށުން 2000އަށް ވުރެ ގިނަ ޔުނިޓްގެ މަސައްކަތް ކުރުމަށް ބެރުގެ ދެ ކުންފުންޏަކާ ވަނީ ހަވާލުކޮށްފައެވެ.

މި މަޝްރޫޢާ ގުޅޭގޮތުން ބީއެމްއެލްގެ ސްޕޯކްސްޕާސަން މުޙައްމަދު ސަޢީދު ވިދާޅުވީ ބީއެމްއެލް އެފޯޑަބަލް ހޯމް ލީސިންގ ކުންފުނިން މިއަދު މަސައްކަތް ހަވާލުކުރި ހައުސިން ޔުނިޓްގެ އިތުރުން ދިވެހި ކޮންސްޓްރަކްޝަން ކުންފުނިތަކާއެކު އިތުރު ހައުސިންގ ޔުނިޓްގެ މަސައްކަތް ހަވާލުކުރުމަށް ހަމަޖެހިފައިވާކަމަށެވެ. އެއާއެކު ޖުމުލަ 3000 އަށް ވުރެ ގިނަ ހައުސިންގ ޔުނިޓް އިމާރާތްކުރުމުގެ އަމަލީ މަސައްކަތް މިއަންނަ ޖަނަވަރީމަހު ފެށޭނެކަމަށް އޭނާ ވިދާޅުވިއެވެ.

އެފޯޑަބަލް ހައުސިން ޔުނިޓްތައް ތަރައްޤީކުރުމަށް ބެއިޖިން އަރބަން ކޮންސްޓްރަކްޝަން ގްރޫޕްއާއި ޗައިނާ މެޝިނަރީ އިންޖީނިއަރިންގ ކޯޕަރޭޝަންއާ ވަނީ ހަވާލުކޮށްފައެވެ. ބެއިޖިން އަރބަން ކޮންސްޓްރަކްޝަންއާ ހަވާލުކޮށްފައިވަނީ ހުޅުމާލޭ ޒޯން 2ގެ ޖުމްލަ 13،475 އަކަފޫޓުގެ ސަރަހައްދެއްގެ ހަތަރު ބިމެއްގައި 1،117 ހައުސިން ޔުނިޓު ތަރައްގީކުރުމަށެވެ. އަދި ޗައިނާ މެޝިނަރީ އިންޖީނިއަރިންގ ކޯޕަރޭޝަންއާ ހަވާލުކޮށްފައިވަނީ 1،224 އެފޯޑަބަލް ހައުސިން ޔުނިޓް ތަރައްގީ ކުރުމަށެވެ.

ބީއެމްއެލްއިން ވިދާޅުވީ އެ ކުންފުނިތަކާ ހައުސިންގެ މަޝްރޫޢުތައް ކުރިއަށްގެންދިޔުމަށް ހަވާލުކޮށްފައިވަނީ އެމްއެމްއޭގެ އިންކްލޫސިވް ނެޝަނަލް އެފޯޑަބަލް ހައުސިންގ ސްކީމްގެ ދަށުން ގާއިމުކޮށްފައިވާ ގަވަރނަންސް އަދި ރިސްކް ސްޓޭންޑަރޑްތަކާ އެއްގޮތަށް ކުރިއަށް ގެންދިޔަ އިވެލުއޭޝަން މަރުހަލާ ފުރިހަމަކުރުމަށް ފަހުގަކަމަށެވެ. އެގޮތުން، އެއްބަސްވުން ގާއިމުކުރެވުނު ދެ ކުންފުންޏަކީވެސް މާލީ ގޮތުން ގާބިލު، ބައިނަލްއަގުވާމީ މަޝްރޫއުތައް މެނޭޖްކުރުމުގެ ތަޖުރިބާ ހުރި، އަދި ރާއްޖޭގެ ކޮންސްޓްރަކްޝަން ދާއިރާގެ މާހައުލު ރަނގަޅަށް ދަންނަ ދެ ކުންފުނިކަން ބީއެމްއެލްއިން ފާހަގަކުރައްވައެވެ